ស្វែង សុជាតា បើកឆាករឿងដំបូង ក្រោយឃ្លាតឆ្ងាយជាង២ឆ្នាំ
- 2016-02-04 17:37:28
- ចំនួនមតិ 0 | ចំនួនចែករំលែក 0
ស្វែង សុជាតា បើកឆាករឿងដំបូង ក្រោយឃ្លាតឆ្ងាយជាង២ឆ្នាំ
ចន្លោះមិនឃើញ
ការវិលត្រឡប់មកសម្ដែងរឿងដំបូង "បណ្ដាសាអថ័ន" ក្រោយបាត់មុខជាង២ឆ្នាំ ម្ចាស់ពានអាណាចក្រតារាប្រាប់ថា ពិបាកខ្លះដែរព្រោះរឿងនេះទាក់ទងនឹងការប្រើអារម្មណ៍ ជាក់ស្ដែងមានយំជាដើម ធ្វើឲ្យប៉ះពាល់អារម្មណ៍ខ្លាំង។
“រឿងនេះត្រូវការប្រើអារម្មណ៍ច្រើន បងពិបាកបន្តិចដែរអូន មានឈុតយំ ឈុតប្រើអារម្មណ៍កម្សត់ផ្សេងៗធ្វើឲ្យប៉ះពាល់អារម្មណ៍បង និងធ្វើឲ្យបងនឹកឃើញកាលឆ្នាំចាស់ៗកាលបងនៅឈឺ...ពេលដែលបងជួបលំបាកអី ចឹងអូន ប៉ុន្តែបងឥឡូវលែងអីហើយ ព្រោះបងទទួលបានការងារសិល្បៈច្រើនអាចចិញ្ចឹមជីវិតបងមិនឲ្យខ្វះ ខាតដូចប៉ុន្មានឆ្នាំមុននោះទេ"។ ស្វែង សុជាតា ថ្លែង។
តារាសម្ដែងជើងចាស់រហស្សនាមឆ្នាស់ឆ្នើម ស្វែង សុជាតា ថ្លែងមកកាន់ Sabay មុននេះថា "បណ្ដាសាអថ័ន" ជារឿងដំបូងសម្រាប់ការវិលចូលសិល្បៈក្រោយពីបាត់មុខជាង២ឆ្នាំ ទៅព្យាបាលជំងឺលើភ្នំគូលែន។ ក្នុងនោះមានផលិតកម្មច្រើនបន្តបន្ទាប់ទៀតបានទាក់ទង នាង ឲ្យសម្តែងផងដែរ។
ស្វែង សុជាតា បន្ថែម៖ "ចាសអូន...បងសប្បាយចិត្តណាស់ពេលខាងផលិតកម្ម អភិមង្គលបានផ្ដល់ឱកាសឲ្យបងសម្ដែងរឿងឲ្យគាត់ ហើយនេះជារឿងដំបូងដែលបងបានសម្ដែងក្រោយបាត់មុខយូរ។ ហើយមកដល់ឥឡូវនេះបងទទួលបានច្រើនរឿងដែរ ប្រហែលជា៧រឿង"។
ជាមួយគ្នានេះអ្នកដឹកនាំរឿងខាងលើលោក បូនីតា ដារ៉េស៊ី បង្ហាញគោលជំហរថា រឿងនេះគឺធ្វើតម្រូវ ស្វែង សុជាតា តែម្ដងក្រោយនាងសម្រាកព្យាបាលជំងឺ និងបាត់មុខពីសិល្បៈជាង២ឆ្នាំ ដោយសម្អាងហេតុផលថា ស្វែង សុជាតា ជាមនុស្សម្នាក់ដែលមានភាពតស៊ូ គោរពពេលវេលាការងារជានិច្ច។
អ្នកដឹកនាំផលិតកម្មអភិមង្គលថ្លែង៖ "បាទអូន...បងធ្វើរឿងគឺតម្រូវឲ្យគាត់សម្តែង ដូចអូនដឹងហើយថា គាត់បាត់មុខពីសិល្បៈយូរដែរ ហើយបណ្តាផលិតកម្មផ្សេងៗហាក់បំភ្លេចគាត់ចោល ដូច្នេះបងត្រូវហៅគាត់មកសម្ដែងដើម្បីមានឱកាសចូលពិភពសិល្បៈស្តារមុខមាត់ឡើងវិញផងដែរ។ ហើយគាត់ជាតារាដែលមានប្រជាប្រិយភាព តស៊ូនឹងការងារគោរពពេលវេលា គាត់ធ្វើអ្វីដែលខ្ញុំចង់បានពេលខ្លះ លើសពីអ្វីដែលខ្ញុំរំពឹងទៅទៀត៕
រីយ៉ា ក្ដាប់តំណែងតួឯកដំបូងក្នុងជីវិតសិល្បៈ
អត្ថបទ៖ ថា ម៉ាលីដា