Valentine's Day ឆ្នាំនេះ ប្រជាជនអាមេរិកកាន់តែច្រើន ស្វែងរកគូស្នេហ៍តាមអនឡាញ

2016-02-14 22:09:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថិតិមួយរកឃើញថា ប្រជាជនអាមេរិកច្រើនឡើងៗ ស្វែងរកដៃគូស្នេហា តាមរយៈប្រព័ន្ធអនឡាញ ពោលគឺច្រើនជាង ៤ដងធៀបនឹងឆ្នាំ ២០១៣។

បើយោងទៅតាមមជ្ឈមណ្ឌល សិក្សាស្រាវជ្រាវ Pew បង្ហាញឲ្យដឹងកាលពីថ្ងៃព្រហស្បតិ៍កន្លងទៅថា អ្នកជំនាញបានធ្វើស្ថិតិលើមនុស្សចំនួន ២០០១ នាក់ ដោយ ១៥% ចុះឈ្មោះលើគេហទំព័រ ឬកម្មវិធីទូរសព្ទ ក្នុងការណាត់ជួបគ្នា គឺកើនពី ១៣% កាលឆ្នាំ ២០១៣។

២៧% នៃពលរដ្ឋអាមេរិកអាយុចន្លោះពី ១៨ ដល់ ២៤ឆ្នាំ បានប្រើប្រាស់អនឡាញសម្រាប់ជួបគ្នាដែរ។ ចំណែកអ្នកប្រើប្រាស់កម្មវិធីទូរសព្ទសម្រាប់ជួបគ្នាឈ្មោះថា Tinder បានកើនដល់ ២២% ធៀបនឹងឆ្នាំ ២០១៣ មានត្រឹម ៥% ប៉ុណ្ណោះ។

អនុប្រធាន មជ្ឈមណ្ឌលស្រាវជ្រាវអនឡាញខាងលើលោក Aaron Smith និយាយថា៖ "អ្នកប្រើប្រាស់បច្ចេកវិទ្យាទំនើបសម័យនេះ អាចស្វែងរកដៃគូមានប្រសិទ្ធភាព ងាយស្រួល និងចំណាយពេលតិចជាង ការស្វែងរកដៃគូ តាមវិធីពីមុនៗ"។

កម្មវិធី (App) ណាត់ជួបលើទូរសព្ទត្រូវយុវជនអាមេរិកម្នាក់ ក្នុងចំណោម ១០នាក់ប្រើប្រាស់ គឺកើន ៣ដងធៀបនឹង ៣ឆ្នាំមុន។ ឯពលរដ្ឋអាមេរិកអាយុចន្លោះពី ៥៥ ដល់ ៦៤ឆ្នាំ មាន ១២% ណាត់ជួបតាមអនឡាញ គឺកើនឡើងទ្វេដងធៀបនឹងឆ្នាំដូចគ្នាខាងលើ។ នេះបើតាមការធ្វើស្ថិតិចុងក្រោយ៕