ឃាត់ខ្លួន៤នាក់ ពាក់ព័ន្ធគ្រោះថ្នាក់ស្លាប់ប្រធានតូតាល់
- 2014-10-23 22:59:53
- ចំនួនមតិ 0 | ចំនួនចែករំលែក 0
ឃាត់ខ្លួន៤នាក់ ពាក់ព័ន្ធគ្រោះថ្នាក់ស្លាប់ប្រធានតូតាល់
ចន្លោះមិនឃើញ
រដ្ឋអាជ្ញារុស្ស៊ី បានបញ្ជាឲ្យឃាត់ខ្លួនអ្នកធ្វើការនៅព្រលានយន្តហោះរដ្ឋធានីមូស្គូ ៤នាក់បន្ថែមទៀត ពាក់ព័ន្ធនឹងករណីគ្រោះថ្នាក់យន្តហោះ ដែលបណ្ដាលឲ្យនាយកប្រតិបត្តិតូតាល់ លោក Christophe de Margerie បាត់បង់ជីវិតកាលពីថ្ងៃអង្គារកន្លងទៅ។ នេះបើតាមការបញ្ជាក់ពីគណៈកម្មការស៊ើបអង្កេតរបស់រុស្ស៊ីនៅថ្ងៃនេះ។
យន្តហោះដែលជួបគ្រោះថ្នាក់
ការឃាត់ខ្លួននេះ ធ្វើឡើងដើម្បីសាកសួរ និងស្វែងរកអ្នកទទួលខុសត្រូវចំពោះសោកនាដកម្ម ដែលធ្វើឲ្យប៉ះពាល់ដល់កិត្តិនាមសុវត្ថិភាពហោះហើរនៅក្នុងប្រទេសរុស្ស៊ី។ គណៈកម្មការបានបញ្ជាក់នៅក្នុងសេចក្ដីថ្លែងការណ៍ថា រដ្ឋអាជ្ញាបានបញ្ជាឲ្យឃាត់ខ្លួនប្រធានសេវាបច្ចេកទេសវាលយន្តហោះ ដែលមើលការខុសត្រូវលើការងារឈូសសម្អាតព្រិលនៅពេលយប់កើតហេតុ។ ចំណែកឯមនុស្ស ៣នាក់ទៀតដែលត្រូវឃាត់ខ្លួនជាមួយគ្នាមាន ប្រធានផ្នែកហោះហើរ សិក្ខាកាមផ្ដល់ដំណឹងពីការហោះហើរ និងអ្នកបម្រើការងារផ្នែកផ្ដល់ដំណឹងម្នាក់ទៀត។
កាលពីថ្ងៃអង្គារកន្លងទៅ យន្តហោះឯកជនដែលនាយកប្រតិបត្តិតូតាល់ជិះ បានបុកជាមួយត្រាក់ទ័រឈូសសម្អាតព្រិលនៅផ្លូវហោះឡើង បណ្ដាលឲ្យមនុស្ស ៤នាក់នៅលើយន្តហោះស្លាប់ទាំងអស់។ ចំណែកនាយកប្រតិបត្តិថ្មី ត្រូវបានគេបោះឆ្នោតតែងតាំងហើយកាលពីថ្ងៃពុធម្សិលមិញនេះ ដោយជ្រើសរើសយកលោក Patrick Pouyanne ដែលពីមុនជាប្រធានផ្នែកចម្រាញ់ប្រេង និងត្រូវដឹកនាំក្រុមហ៊ុនប្រេងលំដាប់ទី៣ នៅអឺរ៉ុបនេះ រហូតដល់ដំណាច់ឆ្នាំ២០១៥។
ចុចអាន៖ ប្រធានក្រុមហ៊ុនប្រេងឥន្ធនៈតូតាល់ ស្លាប់ក្នុងគ្រោះថ្នាក់យន្តហោះយប់មិញ
ចុចអាន៖ មូលហេតុលម្អិតគ្រោះថ្នាក់យន្តហោះប្រធានក្រុមហ៊ុនតូតាល់
ប្រែសម្រួល៖ គង់ វិសាល
ប្រភព៖ businessinsider