មូលហេតុលម្អិតគ្រោះថ្នាក់យន្តហោះប្រធានក្រុមហ៊ុនតូតាល់

2014-10-22 00:24:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្រុមហ៊ុនតូតាល់ Christophe de Margerie បានបាត់បង់ជីវិត នៅក្នុងហេតុការណ៍គ្រោះថ្នាក់យន្តហោះកាលពីយប់មិញនេះ ប៉ុន្តែភ្លាមៗនោះមិនមានរបាយការណ៍លម្អិតបង្ហាញពីមូលហេតុនោះទេ។ ទោះយ៉ាងណា មកដល់ពេលនេះ គេបានស្រាវជ្រាវរកឃើញថា អ្នកបើកបរត្រាក់ទ័រសម្អាតព្រិលដែលយន្តហោះបុកនោះ បានស្ថិតនៅក្នុងស្ថានភាពស្រវឹង (ចុចអាន)។

លោក Christophe de Margerie

ប្រធានក្រុមហ៊ុនប្រេងលំដាប់ទី៣ នៅអឺរ៉ុប Christophe de Margerie បានធ្វើដំណើរទៅរដ្ឋធានីមូស្គូ ដើម្បីចូលរួមប្រជុំជាមួយនាយករដ្ឋមន្ត្រីរុស្ស៊ី Dmitry Medvedev ពិភាក្សាលើការវិនិយោគពីបរទេសនៅក្នុងប្រទេសរុស្ស៊ី។ បុរសវ័យ ៦៣ឆ្នាំនេះ បានជិះនៅលើយន្តហោះម៉ាក Falcon 50 ដែលក្នុងនោះមានក្រុមការងារលើយន្តហោះ ៣នាក់ផ្សេងទៀត។

ពេលកំពុងរត់លើផ្លូវក្នុងព្រលានVnukovo ដើម្បីហោះត្រលប់ទៅបារាំងវិញ យន្តហោះបានបុកកង់ខាងមុខជាមួយត្រាក់ទ័រឈូសសម្អាតព្រិល បណ្ដាលរមៀលធ្លាក់ផ្លូវ និងបុកដីផ្ទុះឆេះតែម្ដង។ អ្នកបើកត្រាក់ទ័រស្រវឹងស្រាបណ្ដាលឲ្យមានគ្រោះថ្នាក់កើតឡើង បានរួចរស់ជីវិត និងកំពុងទទួលការសាកសួរព័ត៌មានពីគ្រោះថ្នាក់នេះ។

ទិដ្ឋភាពនៅកន្លែងយន្តហោះជួបគ្រោះថ្នាក់

លោក Vladimir Putin បាននិយាយថា "លោកសូមផ្ដល់តម្លៃខ្ពស់ចំពោះការលះបង់របស់គាត់ ក្នុងការរឹតចំណងសាមគ្គីភាពរវាងប្រទេសរុស្ស៊ី និងបារាំង"។ ហើយនៅថ្ងៃនេះដែរ ប្រធានាធិបតីរុស្ស៊ីរូបនេះ បានផ្ញើសារចូលរួមរំលែកទុក្ខគ្រួសារប្រធានក្រុមហ៊ុនតូតាល់ Christophe de Margerie ផងដែរ។

ចំណែកនាយករដ្ឋមន្ត្រីបារាំង Manuel Valls បានថ្លែងថា "បារាំងបានបាត់បង់អ្នកដឹកនាំអស្ចារ្យប្លែកគេម្នាក់ ដែលអាចប្រែតូតាល់ឲ្យក្លាយជាក្រុមហ៊ុនយក្សលើលោក"។ លោកបានបន្តទៀតថា "បារាំងបានបាត់បង់អ្នកនាំមុខគេផ្នែកឧស្សាហកម្ម និងអ្នកស្នេហាជាតិដ៏អស្ចារ្យ"។

សារព័ត៌មាន Life News របស់រុស្សី បានបង្ហោះវីដេអូបង្ហាញពីសោកនាដកម្ម បន្ទាប់ពីគ្រោះថ្នាក់កើតឡើង។ នៅក្នុងវីដេអូរយៈពេល ៥៣វិនាទី យើងអាចឃើញគ្រោងយន្តហោះ កំពុងមានភ្លើងឆេះ និងផ្សែងហ៊ុយទ្រលោម ហើយពេលនោះដែរ ជើងហោះហើរទាំងអស់ត្រូវបានផ្អាកការឡើងចុះបណ្ដោះអាសន្ន។

សូមទស្សនាវីដេអូ៖

http://youtu.be/sqOw-zXbumU

ចុចអាន៖ ប្រធានក្រុមហ៊ុនប្រេងឥន្ធនៈតូតាល់ ស្លាប់ក្នុងគ្រោះថ្នាក់យន្តហោះយប់មិញ

ប្រែសម្រួល៖ គង់ វិសាល

ប្រភព៖ dailymail