"បើគ្មានដើមទុន ធ្វើអ្វីដែលខ្លួនពូកែ បើកអ្វីដែលខ្លួនស្រលាញ់"
- 2016-02-29 18:50:11
- ចំនួនមតិ 0 | ចំនួនចែករំលែក 0
"បើគ្មានដើមទុន ធ្វើអ្វីដែលខ្លួនពូកែ បើកអ្វីដែលខ្លួនស្រលាញ់"
ចន្លោះមិនឃើញ
បំណងអនាគតចង់ក្លាយជាថៅកែ ប៉ុន្តែពុំមានប្រាក់រាប់ម៉ឺនដុល្លារ កញ្ញា សុន កណ្ណិកា បានប្រើជំនាញឌីហ្សាញ និងដេប៉ាក់ ដែលខ្លួនចេះស្ទាត់តាំងពីតូច ជួយឪពុកម្ដាយដើម្បីសន្សំលុយបើកក្រុមហ៊ុន។ "បើគ្មានដើមទុន ធ្វើអ្វីដែលខ្លួនពូកែ បើកអ្វីដែលខ្លួនស្រលាញ់"។ នេះជាទស្សនៈរកលុយរបស់យុវតីវ័យ ១៨ ឆ្នាំ ហើយសព្វថ្ងៃនាងជាម្ចាស់ហាង The Teeth Whitening Shop ក្រោមស្លាកពាណិជ្ជកម្មក្រុមហ៊ុន Sonn Kanika Co.,LTD ដូចក្ដីបំណង។
អតីតអ្នកអ៊ុតសៀវភៅ តាមសាលា និងតាមផ្លូវ កណ្ណិកា បានបង្ហើបថា ៖ "ពីក្មេងខ្ញុំចង់បើកក្រុមហ៊ុនមួយ យកផលិតផលមកលក់ តែ សុបិនហ្នឹងធំពេក ខ្ញុំគ្មានមានលុយទេ ខ្ញុំត្រូវការដើម ប៉ុន្តែខ្ញុំមានបទពិសោធន៍ខាងឌីហ្សាញ ដេប៉ាក់ អ៊ីចឹងខ្ញុំបានប្រើជំនាញនេះ ជាស្ពានដើម្បីរកលុយបើកក្រុមហ៊ុនដែលខ្ញុំស្រលាញ់"។
នាយកប្រតិបត្តិវ័យក្មេង នៃក្រុមហ៊ុននាំផលិតផល ធ្វើឱ្យធ្មេញសរូបនេះ បានប្រាប់ថា នេះជាវិធីសាស្ត្រល្អមួយសម្រាប់អ្នក ដែលពុំទាន់ដើមទុន រាប់ពាន់រាប់ម៉ឺនដុល្លារ ធ្វើអាជីវកម្ម ឬបើកក្រុមហ៊ុន។
កញ្ញាថ្លែងថា ៖ "ធ្វើអ៊ីចឹងយើងជោគជ័យ ៥០%។ ដល់ពេលយើងបើកក្រុមហ៊ុន គឺមិនងាយភ័យថាដួល ព្រោះយើងមានប្រភពទុនសម្រាប់ទប់"។
កូនស្រីច្បងក្នុងគ្រួសារប្រកបអាជីវកម្មដេប៉ាក់ និងបោះពុម្ពនៅម្ដុំបាក់ទូក និងស្ទឹងមានជ័យ បានឱ្យដឹងថា ក្រុមហ៊ុនរបស់កញ្ញាបើកដំណើរក្នុងឆ្នាំ ២០១៦ ក្រោមដើមទុនខ្ទង់ប្រមាណខ្ទង់ពាន់ដុល្លារ។ យ៉ាងណាបើតាមការបញ្ជាក់របស់និស្សិតឆ្នាំទីពីរ សម្បុរស ដែលកំពុងក្រេបជញ្ជក់ចំណេះដឹងនៅសាលា CamEd រូបនេះគឺថា ការបើកក្រុមហ៊ុន មិនមែនចេះតែបើកតាមចិត្តចង់ទេ គឺត្រូវធ្វើការស្រាវជ្រាវ ត្រូវស្វែងយល់ទីផ្សារ ត្រូវស្វែងរកអ្វីដែលថ្មី ត្រូវគិតពីគុណភាព ត្រូវមានទំនួលខុសត្រូវ និងត្រូវសិក្សាពីតម្លៃផលិតផលថាសមរម្យ ដែលអតិថិជនអាចទទួលយកបានឬក៏អត់។
កញ្ញា កណ្ណិកា បានសង្កត់ធ្ងន់ថា ៖ "បើយើងអត់ធ្វើគេនឹងធ្វើ។ ការធ្វើជំនួញមិនសំខាន់លើអាយុទេ បើអ្នកណាធ្វើបានមុន អ្នកហ្នឹងជោគជ័យមុន"៕
អត្ថបទ៖ អ៊ុំ សុភក្តិ