ជាសិស្សពូកែដែរ តែខ្ញុំមិនស្រឡាញ់!

2016-03-18 17:14:10
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សស្រីណាក៏ត្រូវការពាក្យស្រឡាញ់ដែរ តែសម្រាប់ខ្ញុំមានមនុស្សប្រុសម្នាក់ ដែលគេជាសិស្សពូកែទូទាំងខេត្ត មកស្រឡាញ់ខ្ញុំតាំងពីថ្នាក់ទី១០ ខ្ញុំបែរជាស្អប់គេទៅវិញ។

គេនោះ ទោះបីជារៀនពូកែមែនតែចរិតឡប់ៗ ឱ្យខ្ញុំវ៉ៃហើយជេររាល់ថ្ងៃ។ រឿងហេតុ គឺដោយសារមិត្តភ័ក្ដិបង្អាប់ខ្លាំងពេក ទើបគេដល់ថ្នាក់ស្រឡាញ់មែនទែន។

មនុស្សខុសគេខុសឯងនោះ មិនដូចប្រុសផ្សេង ដែលស្រឡាញ់លាក់ក្នុងចិត្តនោះទេ គេនិយាយកោកៗឱ្យមនុស្សក្នុងថ្នាក់ដឹងទាំងអស់ រហូតដល់ថ្នាក់ចង់ប្រាប់ប៉ាម៉ាក់គេឱ្យមកស្ដីដណ្ដឹងខ្ញុំទៀត។ រឿងនេះខ្ញុំដឹងតាមរយៈ មិត្តភ័ក្ដិខ្ញុំដែលត្រូវជាក្មួយរបស់គេ។

រូបតំណាង

អានអត្ថបទ៖ ផ្លែចេក

អានអត្ថបទ៖ មនុស្សដែលខ្ញុំចងចាំទាំងអស់

គ្រាន់តែដឹងភ្លាមពេលទៅដល់ថ្នាក់ខ្ញុំវ៉ៃគេចង់ងាប់ហើយ រហូតដល់មិត្តភ័ក្ដិជួយអូសគេចេញកុំឱ្យនៅក្បែរខ្ញុំ។ នៅចាំទៀតថា មិនថា លំហាត់កិច្ចការផ្ទះ ប្រឡងប្រចាំខែ ឬប្រឡងឆមាសទេ ពេលធ្វើហើយគេតែងយកក្រដាសរបស់គេឱ្យខ្ញុំមើលជានិច្ចទោះខ្ញុំប្រាប់គេថាខ្ញុំធ្វើហើយក៏ដោយ ព្រោះខ្ញុំមិនចង់ឱ្យគេគិតកាន់តែជ្រៅ។ ចំណែកកំពូលមិត្តខ្ញុំដែលអង្គុយបៀមប៊ិចនោះ ទៅប្រាប់គេថាខ្ញុំមិនទាន់ធ្វើហើយទេ ទើបគេទុកឱ្យខ្ញុំមើល ឯគូកនខ្ញុំផ្សេងទៀតក៏បានមើលដែរ។

វ៉ៃគេរាល់ថ្ងៃ តែបើប្រឡងចម្លងគេមិនបន្ធូរដៃដែរ តែបើសួរថា ស្រឡាញ់អត់ គឺអត់ទេ? ព្រោះឡប់ៗពេក ហើយស្ទីលស្លៀកពាក់គឺ ទឺនុយលើកកប់ៗផ្ចិត។ តាំងពីគេសារភាពមុខគេមុខឯងមក ខ្ញុំមិនចង់និយាយរកគេប៉ុន្មានទេ លុះឡើងទី ១២ ក៏និយាយរកគេធម្មតាវិញ។

មកដល់ឥឡូវក្នុងមួយឆ្នាំ យើងជួបជុំគ្នាម្ដង ក្នុងឱកាសបុណ្យធំៗ ដែលយើងចេញពីភ្នំពេញទៅលេងស្រុក។ ពេលជួបមុខគេខ្ញុំនៅនិយាយសួរសុខទុក្ខធម្មតា ហើយគេមិនសូវឡប់ៗដូចកាលមុនទេ៕

ចុះប្រិយមិត្តវិញ មានរឿងរ៉ាវចង់ចែករំលែកអំពីមនុស្សដែលអ្នកចងចាំ ដូចរ័ត្ន ដែរឬទេ?

បើមានសូមផ្ញើទៅកាន់ e-mail: kong.chanvanneng@sabay.com

ឬ ទូរសព្ទទៅលេខ ០១០ ៧០០ ៧២៧

អត្ថបទ៖ រ័ត្ន