ផ្លែចេក

2016-03-14 16:05:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្លែចេក មានសារប្រយោជន៍ខ្លាំងណាស់ចំពោះសុខភាព និងសម្រស់ ដែលអ្នកណាៗក៏ដឹងដែរ។ តែក្រោយមកក៏មានគេបន្តុះបង្អាប់ផ្លែចេកទៅប្រដូចទៅនឹងអ្វីផ្សេងទៅវិញទាក់ទងនឹងមនុស្ស រហូតដល់មិត្តភ័ក្ដិខ្ញុំសង្ស័យថាការយកចេកទៅតំណាងដូច្នេះ ជាហេតុដែលខ្ញុំមិនញ៉ាំចេក។

មែន! ទោះជាចេកល្អចំពោះពោះវៀនយ៉ាងណាក៏ខ្ញុំចាត់ទុកថាចេកជាផ្លែឈើដែលខ្ញុំស្អប់បំផុត។ ប៉ុន្តែមិនមែនមានន័យថារាល់ផលិតផលដែលទាក់ទងនឹងចេក សុទ្ធតែខ្ញុំមិនចូលចិត្តទេ។ ចេកដែលកែច្នៃរួចដូចជាចេកខ្ទិះ ចេកឆាប ចេកឆឹង ចេកចៀន ដំណាប់ចេក ស្ករគ្រាប់ចេក ការ៉េមចេកខ្ញុំចូលចិត្តញ៉ាំណាស់។ ទាស់តែផ្លែចេកហ្នឹងហ្មង!

អ្វីៗសុទ្ធតែមានមូលហេតុរបស់វា តែមិនមែនដោយសារការយកចេកទៅតំណាងអ្វីផ្សេងនោះទេ គឺរឿងវាបែបនេះឯង...

កាលខ្ញុំអាយុ៦ឆ្នាំខ្ញុំចូលចិត្តញ៉ាំចេកណាស់ បើបណ្ដោយឱ្យខ្ញុំញ៉ាំមួយស្និតក៏អស់ដែរ ព្រោះត្រូវប៉ាម៉ាក់បញ្ជោរថាខ្ញុំឆ្លាតដោយសារញ៉ាំចេក។ ដូច្នេះញ៉ាំផ្ដាច់ព្រលឹងតែម្ដង បើមិនឃាត់ទេអាចញ៉ាំទាំងសម្បកទៀត...

នៅថ្ងៃមួយក្រោយចេញពីរៀន ប៉ាបានមកយកខ្ញុំនៅសាលាហើយគាត់បែរជាទុកខ្ញុំចោលនៅផ្ទះមិត្តភ័ក្ដិគាត់ ដោយប្រាប់ថាគាត់រវល់ទៅក្រៅឱ្យខ្ញុំញ៉ាំបាយថ្ងៃត្រង់នៅផ្ទះមិត្តភ័ក្ដិគាត់សិន។

ទោះមិនចង់ក៏ត្រូវបង្ខំខ្លួនអង្គុយក្នុងផ្ទះមិត្តភ័ក្ដិប៉ាខ្ញុំដែរ។ ដល់ម៉ោងបាយថ្ងៃ មីងដែលជាមិត្តភ័ក្ដិប៉ាបានស្រូបឆាសណ្ដែកគួរសាច់មាន់ ដែលឃើញមានសាច់មាន់តែមួយដុំគត់ជាមួយនឹងបាយមួយចានឱ្យខ្ញុំ ហើយដាក់លើរនាបរានហាលផ្ទះគាត់ដែលខ្ញុំកំពុងអង្គុយ។ ខ្ញុំមិនចេះញ៉ាំបន្លែទេ ចេះតែញ៉ាំសាច់ ហើយគាត់ដួសសាច់តែមួយដុំឱ្យ ធ្វើម៉េចខ្ញុំញ៉ាំកើត? ខ្ញុំក៏មិនហ៊ានប្រាប់គាត់ដែរ ដូច្នេះខ្ញុំសុខចិត្តអង្គុយលេបទឹកមាត់ បន់ឱ្យប៉ាឆាប់ម៉ោវិញ។

តាំងពីម៉ោង ១១ ដល់ម៉ោង ២ រសៀលខ្ញុំមិនព្រមញ៉ាំបាយដូច្នេះបងម៉ាប់ ដែលជាឈ្នួលស្រីនៅផ្ទះមីងនោះក៏កាន់ចេកពងមាន់មួយស្និតដាក់ចានមកយកមកឱ្យខ្ញុំញ៉ាំ។ ពេលដែលគាត់លើកមកខ្ញុំបានគិតថារស់ហើយពេលនោះ... ប៉ុន្តែទម្លាប់ជាក្មេងខ្លាចគេខ្ញុំមិនហ៊ានញ៉ាំភ្លាមទេ គឺខ្ញុំចាំបងម៉ាប់ចូលទៅក្នុងវិញសិនចាំញ៉ាំ។ បងម៉ាប់មិនព្រមទៅវិញសោះ! គាត់ថែមទាំងអង្គុយយាមចេកមួយស្និតនោះ ហើយប្រាប់ឱ្យខ្ញុំញ៉ាំ ឯក្នុងចិត្តខ្ញុំវិញបន់ឱ្យតែគាត់ដើរចេញន្អាលនឹងញ៉ាំចេក។

(រូបតំណាង)

ការចងចាំប្លែកៗ

បងម៉ាប់កំពូលសាំមិនព្រមទៅណាទេ «ញ៉ាំទៅមីអូន! មិនញ៉ាំបងញ៉ាំហើយ»។ គាត់នៅតែតឿនឱ្យខ្ញុំញ៉ាំម្ដងជាពីរដង តែទ្រាំមិនបានគាត់ញ៉ាំខ្លួនឯង។ ខ្ញុំមើលទៅគាត់ទាំងហួសចិត្ត ភ្ញៀវមិនទាន់ញ៉ាំម្ចាស់ផ្ទះញ៉ាំអស់!

ពេលដែលគាត់កំពុងទំពាចេកឡើងពេញក្នុងមាត់ គាត់ហារមាត់និយាយជាមួយខ្ញុំ ធ្វើឱ្យខ្ញុំឃើញបំណែកចេកប៉ិៗ វ៉ល់ៗ លឿងៗ ដូច... (មិនបាច់ប្រាប់ក៏គួរតែដឹងហើយថាខ្ញុំសំដៅលើអី!) ហើយធ្វើឱ្យខ្ញុំខ្ពើមជាខ្លាំង។ រហូតខ្ញុំសម្រេចចិត្តមិនញ៉ាំចេក សុខចិត្តញ៉ាំបាយដែលទុកចោលនឹងចាននោះវិញ។

ម៉ោងប្រហែល៤ កន្លះទើបប៉ាមកយកដោយបាន ចេកអំបូងមួយស្ទងផងព្យួរដៃម៉ូតូគុបអាស្ទាំង។ ពេលទៅដល់ផ្ទះ បាយល្ងាចហើយប៉ាកាត់ចេកមួយស្និតមក ដៃរៀបនឹងលូកទាញចេកញ៉ាំ ស្រាប់តែស្រមៃដល់ទិដ្ឋភាពថ្ងៃមិញ ធ្វើឱ្យខ្ញុំដកដៃចេញវិញ ហាក់ដូចជាខ្ពើមចេកណាស់។

ហើយម៉ាក់ប៉ាក៏ឆ្ងល់ថាហេតុអី ខ្ញុំទៅជាមិនញ៉ាំចេក តែខ្ញុំមិនបានប្រាប់គាត់ឡើយ។ រហូតមកដល់ឥឡូវនេះ ខ្ញុំនៅតែមិនញ៉ាំផ្លែចេក បើទោះវាល្អក្ដី។ នេះហើយរឿងពិតរវាងខ្ញុំនិងផ្លែចេក គឺដោយសារបងម៉ាប់កូនឈ្នួលមិត្តភ័ក្ដិប៉ាខ្ញុំតែម្នាក់គត់៕

ចុចអាន៖ ដោយសារភាពស្មោះត្រង់… ចោលអាំងប៉ាវ ១០០ដុល្លារ យក ១០ដុល្លារ អត្ថបទ៖ ស្រីណា

តើអ្នកចង់ចែករំលែករឿងរ៉ាវដែលអ្នកចងចាំទេ? បើចង់សូមផ្ញើទៅកាន់ e-mail: kong.chanvanneng@sabay.com

ឬ ទូរសព្ទទៅកាន់លេខ ០១០ ៧០០ ៧២៧