កូរ៉េខាងជើង គំរាមបាញ់ក្រុងសេអ៊ូល និងវ៉ាស៊ីនតោនឲ្យក្លាយជាផេះ
- 2016-03-28 17:19:57
- ចំនួនមតិ 0 | ចំនួនចែករំលែក 0
កូរ៉េខាងជើង គំរាមបាញ់ក្រុងសេអ៊ូល និងវ៉ាស៊ីនតោនឲ្យក្លាយជាផេះ
ចន្លោះមិនឃើញ
ប្រទេសកូរ៉េខាងជើង បានគំរាមបាញ់គ្រាប់លើការិយាល័យប្រធានាធិបតីក្រុងសេអ៊ូលជាថ្មី ប្រសិនបើលោកស្រីប្រធានាធិបតី ផាក គឺនហេ (Park Geun-hye) មិនសុំទោសចំពោះអំពើក្បត់ជាតិ របស់មន្ត្រីអ្នកស្រីទេនោះ។ នេះបើតាមកាសែតរដ្ឋកូរ៉េខាងជើងចេញផ្សាយកាលពីថ្ងៃសៅរ៍ គឺភ្លាមៗក្រោយពីក្រុងព្យុងយ៉ាងបញ្ចេញវីដេអូពណ៌នាពីការវាយប្រហារនុយក្លេអ៊ែរលើទីក្រុងវ៉ាស៊ីនតោន។
គីម ជុងអ៊ុន
កូរ៉េខាងជើង ទើបបញ្ចេញសារព្រមានខ្លាំងៗលើក្រុងសេអ៊ូល និងវ៉ាស៊ីនតោន ក្រោយទីក្រុងទាំងពីរធ្វើសមយុទ្ធយោធាធំបំផុតមិនធ្លាប់មាន ជាការឆ្លើយតបនឹងការបាញ់នុយក្លេអ៊ែរ និងតេស្តមីស៊ីលចម្ងាយឆ្ងាយកូរ៉េខាងជើង។ សារដែលប្រទេសកុម្មុយនិស្តមួយនេះបញ្ចេញគឺ សម្ព័ន្ធទាំងពីរប្រទេសនឹងត្រូវរងគ្រោះព្រោះគ្រាប់មីស៊ីល និងនុយក្លេអ៊ែរ។
កងកម្លាំងកាំភ្លើងធំចម្ងាយឆ្ងាយរបស់កងទ័ពប្រជាជនកូរ៉េខាងជើង បានដាក់ចេញឱសានវាទ កាលពីថ្ងៃសៅរ៍កន្លងទៅលើប្រធានាធិបតី ផាក និងអ្នកគាំទ្រលោកស្រី ឲ្យសុំទោសបែបថ្លៃថ្នូរបំផុតចំពោះពាក្យការបង្កហេតុខាងលើ និងស្នើឲ្យកាត់ទោសប្រហារជីវិតមន្ត្រីលោកស្រី ដែលរៀបចំគម្រោងធ្វើឃាតមេដឹកនាំកូរ៉េខាងជើងលោក គីម ជុងអ៊ុន អំឡុងមានសមយុទ្ធរវាងសេអ៊ូល និងវ៉ាស៊ីនតោន។
កងកម្លាំងដដែលនិយាយថា "ប្រសិនបើលោកស្រីផាក គឺនហេ និងមន្ត្រីគាត់មិនឆ្លើយតបចំពោះឱសានវាទរបស់កងទ័ពទេនោះ កងកម្លាំងកាំភ្លើងធំនឹងចាត់វិធានការយោធាគ្មានប្រណីជាមិនខាន"។ តែឱសានវាទនេះ មិនបានបញ្ជាក់ថ្ងៃផុតកំណត់ទេ។
កូរ៉េខាងជើងក៏បានរំឭកថា វិមាន Blue House នឹងត្រូវបាញ់ដោយគ្រាប់ចម្ងាយឆ្ងាយ ហើយប្រសិនបើក្រុងព្យុងយ៉ាងបើកដៃ ការិយាល័យប្រធានាធិបតី និងទីកន្លែងធ្វើការជាច្រើនទៀតនឹង "ក្លាយជាផេះក្នុងមួយរំពេច"។
ចំណែកប្រទេសកូរ៉េខាងត្បូង ជំរុញឲ្យកូរ៉េខាងជើង បញ្ឈប់ប្រើពាក្យអុចអាលទាំងនោះ និងព្រមានវិញថាការបង្កហេតុដូចនេះនឹងនាំឲ្យកូរ៉េខាងជើងខ្លួនឯងត្រូវអន្តរាយ៕
ចុចអាន៖ ជាងថតរូបត្រូវព្រមានព្រោះហ៊ានលាតត្រដាងពីការពិតនៅកូរ៉េខាងជើង
ប្រែសម្រួល៖ ឡេង ភារុណ ប្រភព៖ Korean Joongang Daily