យ៉ាង​ហោច​មាន​មនុស្ស​ ៧ នាក់ បាន​ស្លាប់ ក្នុង​ពេល​អ្នក​បើកបរ​រថយន្ត​ លុចស៊ីស បើក​ធ្លាក់ចូល​ទឹក​ទន្លេ​ ពេល​ចុះ​ទូកដ​ អុងប៉ាង ត្រើយ​ខាង​កើត​ទន្លេ​បាសាក់ ស្តិត​ក្នុង​ភូមិ បារ៉ែន​លើ ឃុំ​ស្វាយ​ប្រទាល ស្រុក​ស្អាង​ ខេត្ត​កណ្ដាល។ នេះ​បើ​ផ្អែក​តាម​កំណត់​ហេតុ​របស់​ អធិការ​ស្រុក​ស្អាង ប្រាប់​មក​កាន់​ Sabay ព្រឹក​នេះ។

តាម​រយៈ​កំណត់​ហេតុ​របស់ អធិការ​ស្រុក​ស្អាង លោក សេង សុជាតិ​ បាន​បញ្ជាក់​បន្ថែម​ថា ករណី​បើក​រថយន្ត​ធ្លាក់​ទូកដ​បណ្ដាល​ស្លាប់​មនុស្ស ០៧ នាក់​ប្រុស ០៥ នាក់ ស្រី ០២​នាក់ ក្នុង​នោះ​ក្មេង ០៥ នាក់ កើតហេតុ​នៅ​ថ្ងៃទី ០៣ ខែ​មេសា​ឆ្នាំ ២០១៦ វេលា​ម៉ោង ១៩,១៥ នាទី នៅ​ចំណុច​កំពង់ចម្លង​អុងប៉ាង ត្រើយ​ខាងកើត​ទន្លេបាសាក់។

 អ្នកស្លាប់​នៅ​ក្នុង​ហេតុការណ៍​បើក​រថយន្ដ​ធ្លាក់​ទន្លេ ពេល​កំពុង​ចុះទូក​ នៅ​ទូកដ​ អុងប៉ាង (រូបភាព៖ Police)

ចំពោះ​មូលហេតុ លោក សេង សុជាតិ បាន​និយាយ​នៅ​ក្នុង​កំណត់​ហេតុ​​ថា អ្នក​ទាំង11នាក់ បាន​ធ្វើ​ដំណើរ​ចេញពី​ ផ្សារ​ព្រែក​តា​ជន ភូមិ​ខ្ពប​លើ ឃុំ​ខ្ពប ដោយ​អ្នក​បើក​បរ​បាន​សេព​គ្រឿង​ស្រវឹង​អស់​ពីរ​កំប៉ុង ពេល​បើក​ចុះ​ទូកដ​ អុងប៉ាង ភូមិ​បា​រ៉ែ​ន​លើ ឃុំ​ស្វាយ​ប្រទាល អ្នក​ដែល​នៅ​រស់ 3 នាក់​បាន​ចុះ​ពី​រថយន្ត បន្ទាប់មក​អ្នកបើកបរ​រថយន្ត​បាន​បើក​រថយន្ត​ចុះទូក ដោយ​ជាន់​ហ្គែរ​ខ្លាំង​លើស​ល្បឿន​រថយន្ត​ ក៍​ឡើងលើ​កំណល់​ធ្លាក់ទឹក​តែម្ដង ហើយ​អ្នក​បើក​ក៏​ចេញ​តាម​ទ្វារ​ ដោយ​កញ្ចក់​បើក​ស្រាប់​ក្រៅពីនោះ​ឈ្លក់​ទឹក​ស្លាប់​ទាំងអស់ ៧ នាក់។ ចំពោះ អ្នក​បើកបរ​សមត្ថកិច្ច​បាន​ឃាត់​ខ្លួន ហើយ​កំពុង​កសាង​សំណុំ​រឿង​បញ្ជូន​ទៅ​កាន់​តុលាការ។

ខាងក្រោម​នេះ គឺជា វីដេអូ ដែល​សមត្ថកិច្ច​កំពុង​សួរនាំ អ្នក​បើកបរ​រថយន្ដ​ លុចស៊ីស

គួរ​កត់​សម្គាល់​ថា អ្នកបើកបរ​រថយន្ត​ឈ្មោះ ឈ្មោះ​ សាក់ សារ៉ាក់ ភេទ​ប្រុស អាយុ33ឆ្នាំ​មុខ​របរ ជាង​ឌី​ណាម៉ូ ម៉ូតូ មាន​ទីលំនៅ​ភូមិ​ព្រែក​ហូ សង្កាត់​ព្រែក​ហូ ក្រុង​តាខ្មៅ ខេត្ត​កណ្ដាល បាន​បើកបរ​រថយន្ត​លុចស៊ីស RX300 ពណ៍ ស ពាក់​ផ្លាក​លេខ​ភ្នំពេញ​ 2F-9169ធ្វើដំណើរ​ពី​សង្កត់ផ្នូរ ​នៅ​ផ្សារ​ព្រែក​តា​ជន ភូមិ​ខ្ពប​លើ ឃុំ​ខ្ពប ត្រឡប់​ទៅ​ផ្ទះ​វិញ មក​ឆ្លង​ដ ​ព្រែក​អុងប៉ាង ត្រើយ​ខាងកើត​ទន្លេបាសាក់​ទៅ​ត្រើយ​ខាងលិច ដោយ​នៅ​ក្នុង​រថយន្ត​នោះ​មាន​គ្នា 11នាក់ ក្មេង06នាក់

1-ឈ្មោះ​វឿ​ង ភេទ​ប្រុស អាយុ35ឆ្នាំ ស្លាប់ 2-ឈ្មោះ​សឿន សុ​វណ្ណា​រី​ទ្ធ ភេទ​ប្រុស អាយុ7ឆ្នាំ​ស្លាប់។ 3-ឈ្មោះ​គឿន សុ​វណ្ណា​រាជ ភេទ​ប្រុស អាយុ4ឆ្នាំ​ស្លាប់ 4-ឈ្មោះ​រ៉ា​ក់ ឆៃ​ណា​រ៉ា ភេទ​ប្រុស អាយុ12ឆ្នាំ​ស្លាប់ 5-ឈ្មោះ​វឿន គីម​ឡាង ភេទ​ស្រី អាយុ13ឆ្នាំ​ស្លាប់ 6-ឈ្មោះ​ចាន់ថន រចនា ភ​ទ​ស្រី អាយុ8ឆ្នាំ​ស្លាប់ 7-ឈ្មោះ​ខន ឡេ​ន ភេទ​ស្រី អាយុ35ឆ្នាំ​ស្លាប់ 8-ឈ្មោះ​ផ្លុំ ចាន់ថន ភេទ​ប្រុស អាយុ36ឆ្នាំ នៅរស់ 9-ឈ្មោះ​ខន ប្រាំង ភេទ​ស្រី អាយុ28ឆ្នាំ នៅរស់ 10-ឈ្មោះ​វឿន គីម​ហុង ភេទ​ស្រី អាយុ3ឆ្នាំ​នៅ​រស់ អ្នក​ទាំង ១០ នាក់ ​រស់នៅ​ភូមិ​លេខ ១ ឃុំ​ស្វាយ​រលំ ស្រុក​ស្អាង ខេត្ត​កណ្ដាល ជាមួយគ្នា៕

ដោយ៖ បុត្រ រូបភាព និង វីដេអូ៖ ប៉ូលីស