រឿងមិនបានការ៤យ៉ាង ដែលនារីៗគួរឈប់ធ្វើដាក់គ្នាបន្តទៀត
- 2016-04-29 14:05:08
- ចំនួនមតិ 0 | ចំនួនចែករំលែក 0
រឿងមិនបានការ៤យ៉ាង ដែលនារីៗគួរឈប់ធ្វើដាក់គ្នាបន្តទៀត
ចន្លោះមិនឃើញ
មនុស្សស្រីចូលចិត្តកាច់កុងគ្នា។ នេះជាបញ្ហាដែលគេមិនសូវលើកមកនិយាយ ប៉ុន្តែវាពិតជាកើតមានច្រើនក្នុងសង្គម។ ប៉ុន្មានចំណុចខាងក្រោមនេះមិនមែនសំដៅលើមនុស្សស្រីគ្រប់គ្នានោះឡើយ ប៉ុន្តែសម្រាប់អ្នកដែលមានទម្លាប់បែបនេះច្រើន គួរតែបញ្ឈប់។
១. ប្រើពាក្យសម្ដីវាយប្រហារគ្នា
ភាគច្រើនគេឃើញថា ប្រសិនមនុស្សស្រីម្នាក់មិនចូលចិត្តមនុស្សស្រីម្នាក់ណាមួយទៀតហើយ នាងនឹងប្រើពាក្យអសុរោះ ដាច់សាច់ហៅឈ្មោះនារីម្នាក់នោះ។ វាគួរតែបញ្ឈប់ ព្រោះថាទីមួយអ្នកដែលយើងហៅនោះ មិនអាក្រក់ដល់ថ្នាក់ត្រូវប្រើពាក្យដូច្នោះទេ ហើយទីពីរវាហាក់បង្ហាញថាយើងជាមនុស្សមិនទាន់យល់ការ ឬមនុស្សអាក្រក់ជាដើម។ គួរចាំថា បើគ្មានអ្វីល្អៗនិយាយ អ្នកគួរកុំនិយាយអ្វីល្អជាង។
២. និយាយអាក្រក់ពីក្រោយខ្នងគ្នា
ជាការពិត នេះជាកំហុសដែលមនុស្សគ្រប់គ្នាសុទ្ធតែធ្លាប់ប្រព្រឹត្តយ៉ាងហោចម្ដង ក្នុងមួយជីវិត។ ប៉ុន្តែអ្វីដែលអាក្រក់បំផុតគឺនៅពេលដែលមនុស្សនិយាយហែកហួរពីមិត្តខ្លួនឯងពីក្រោយខ្នង។ នេះមិនមែនជាមិត្តភាពនោះឡើយ ហើយក៏មិនដឹងគួរហៅថាម៉េចដែរ មនុស្សស្រីគួរខ្វល់ខ្វាយពីបញ្ហារបស់ខ្លួនឲ្យបានច្រើនជាងយកពេលទៅនិយាយពីរឿងរ៉ាវផ្ទាល់ខ្លួនរបស់អ្នកដទៃ។
៣. ប្រកួតប្រជែងគ្នាដើម្បីតែឈ្នះ
នារីៗតែងចូលចិត្តយកខ្លួនឯងទៅប្រៀបធៀបជាមួយនារីដទៃ។ ប៉ុន្តែត្រូវដឹងថា អ្នកមិនមែនរស់ដើម្បីប្រកួតប្រជែងនឹងនរណាម្នាក់ឡើយ។ អ្នកដើរលើផ្លូវរបស់អ្នក គេដើរលើផ្លូវរបស់គេ។ ជំនួសឲ្យការប្រកួត កាច់កុងគ្នា ស្ត្រីគួរតែជួយលើកតម្កើងគ្នា បំពេញចន្លោះខ្វះខាតឲ្យគ្នាទៅវិញទៅមក ទើបប្រសើរ។
៤. សម្លឹងមុខគ្នាដោយក្រសែភ្នែកមិនល្អ
នារីៗចូលចិត្តវាយតម្លៃគ្នា ហើយក៏បង្ហាញវាចេញមកតាមក្រសែភ្នែក។ តែពួកគេគួរតែញញឹមដាក់គ្នាឲ្យកាន់តែច្រើនទើបប្រសើរ។ បើសិនជាមានមនុស្សថ្មីណាម្នាក់សម្លឹងមកអ្នកក្នុងក្រសែភ្នែកមិនល្អ អ្នកគួរញញឹមដាក់ពួកគេវិញ នោះទើបរឿងល្អៗអាចកើតមានបន្តទៀត។
សរុបមក ស្ត្រីគួរតែធ្វើល្អដាក់គ្នាទៅវិញទៅមកឲ្យបានកាន់តែច្រើន។ ត្រូវលើកស្ទួយគ្នា មិនត្រូវជាន់ពន្លិចគ្នាឡើយ ដូច្នេះយើងនឹងអាចរស់នៅដោយសន្តិភាពនិងកាន់តែសប្បាយចិត្ត។ ប្រិយមិត្តមានមតិយោបល់បន្ថែមទៀតទេ ចំពោះបញ្ហារវាងមនុស្សស្រីនឹងមនុស្សស្រី?
ចុចអាន៖សញ្ញា៨យ៉ាង បញ្ជាក់ថាមិត្តប្រុសចង់រៀបការជាមួយអ្នក
ចុចអាន៖កំហុស៧យ៉ាងឪពុកម្ដាយគួរបោះបង់ បើចង់ឲ្យកូនល្អ
ប្រែសម្រួល៖ វ៉ាន់ថន ប្រភព៖ youqueen