សេរីភាពសារព័ត៌មានកម្ពុជា ជាប់លេខ១ ក្នុងចំណោមប្រទេសអាស៊ានទាំង១០
- 2016-05-03 21:34:01
- ចំនួនមតិ 0 | ចំនួនចែករំលែក 0
សេរីភាពសារព័ត៌មានកម្ពុជា ជាប់លេខ១ ក្នុងចំណោមប្រទេសអាស៊ានទាំង១០
ចន្លោះមិនឃើញ
បើយោងតាមស្ថាប័នព័ត៌មានពិភពលោក Reporters Without Borders កម្ពុជាបានជាប់ជាប្រទេស មានសេរីភាពសារព័ត៌មានខ្លាំងជាងគេ បើធៀបនឹងប្រទេសអាស៊ាន ៩ ផ្សេងទៀត។
លោក ឆាយ សុផល សមាជិកគណៈនាយកក្លឹបអ្នកកាសែតកម្ពុជា ថ្លែងនៅក្នុងទិវាសេរីភាពសារព័ត៌មានពិភពលោក ២០១៦ ថា ស្ថាប័នព័ត៌មានដែលមានមូលដ្ឋាននៅបារីសនេះ បានវាយតម្លៃលើការរំលោភបំពានលើអ្នកកាសែត និងសិទ្ធិសេរីភាពក្នុងការផ្ដល់ព័ត៌មាន ដែលចំណាត់ថ្នាក់នេះតាមពីក្រោយដោយ ឥណ្ឌូណេស៊ី ថៃ ជាដើម។
មិនតែប៉ុណ្ណោះ លោកបានបន្ថែមថា សេរីភាពសារព័ត៌មានកម្ពុជា ក៏ល្អជាងប្រទេសនៅអាស៊ីខាងត្បូង ដូចជា បង់ក្លាដេស ឥណ្ឌា ប៉ាគីស្ថាន និង ស្រីលង្កា ហើយក៏ល្អជាង រុស្ស៊ី និងចិនដែរ។
តាមតួលេខចុងក្រោយ កម្ពុជា មានស្ថានីយទូរទស្សន៍ ១៧ វិទ្យុជិត ២០០ ស្ថាប័នព័ត៌មានបោះពុម្ពខ្ទង់ ៥០០ និង វិបសាយរាប់ម៉ឺន។ នេះបើយោងតាមសម្ដីរបស់លោក កៃ គឹមសុង និពន្ធនាយកកាសែតភ្នំពេញប៉ុស្ដិ៍។ ទិវាសេរីភាពសារព័ត៌មានពិភពលោក ២០១៦ ក្រោមប្រធានបទ «សិទ្ធិទទួលបានព័ត៌មាន ជាសិទ្ធិរបស់អ្នក» នៅសណ្ឋាគារ កាំបូឌីយ៉ាណាព្រឹកមិញ មានការចូលរួមពី ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន អង្គការ UNESCO អង្គការ OHCHR ក្លឹបអ្នកកាសែតកម្ពុជា ស្ថាប័នសារព័ត៌មានធំៗ និងអ្នកកាសែតខ្មែរ បរទេសជាច្រើន។
ទិវានេះធ្វើឡើងនៅខែឧសភាជារៀងរាល់ឆ្នាំ ដើម្បីលើកស្ទួយសេរីភាពសារព័ត៌មាន វាយតម្លៃកម្រិតសារព័ត៌មាន ការពារស្ថាប័នព័ត៌មានពីការវាយប្រហារ និងជាឱកាសរំលឹកដល់អ្នកសារព័ត៌មាន ដែលបានស្លាប់ក្នុងបុព្វហេតុអាជីពរបស់ខ្លួន៕
ស្លាប់ ៨០% ក្នុងគ្រោះថ្នាក់ចរាចរណ៍ ជាអ្នកជិះម៉ូតូអត់ពាក់មួកការពារ
អត្ថបទ៖ អ៊ុំ សុភក្តិ