ចេះប៉ុន្មានក្បាច់នេះ ធានាថាថតរូបនឹងទូរសព្ទកាន់តែទាក់ទាញ

2014-10-28 15:27:08
ចំនួនមតិ 0 | ចំនួនចែករំលែក 0

ចន្លោះមិនឃើញ

សម័យបច្ចេកវិទ្យាជឿនលឿន និងបណ្ដាញសង្គមសម្បូរបែប ការថត Selfie (ថតប្រើកាមេរ៉ាទូរសព្ទ) បានក្លាយជានិន្នាការដ៏ពេញនិយមក្នុងស្រទាប់មនុស្សវ័យក្មេង។ អីចឹងហើយ ទើប Sabay ចង់ចែករំលែកគន្លឹះខ្លីៗខ្លះដើម្បីឲ្យរូបថតដែលថតដោយ Smartphone របស់មិត្តយើងកាន់តែស្រស់ស្អាត និងទាក់ទាញថែមមួយកម្រិតទៀត។

១. រកជ្រុងដែលស៊ីបំផុតនឹងទម្រង់មុខរបស់អ្នក

មនុស្សម្នាក់ៗមានទម្រង់មុខ ឬដងខ្លួនស្អាតខុសប្លែកពីគ្នា។ អ្នកខ្លះស្អាតពេលមើលពីចំហៀង ខ្លះស្អាតមើលពីមុខចំ ឯអ្នកឯទៀតស្អាតស្អាតពេលមើលបញ្ឆិត។ ដូច្នេះ ពេលនៅម្នាក់ឯង អ្នកអាចសាកល្បងថតម្ដងហើយម្ដងទៀតថា ថតពីជ្រុងណាទើបមុខរបស់អ្នកមើលទៅស្អាតជាងគេ។ បើរកឃើញហើយត្រូវចេះកត់ចំណាំដោយខ្លួនឯង។

២. ញញឹម

ញញឹមក៏មិនខុសពីទម្រង់មុខដែរ។ អ្នកខ្លះស្អាតពេលសើចអស់ ឯខ្លះទៀតស្អាតពេលញញឹមផ្កាត្រកួន (ញញឹមតិចៗ)។ អ្នកអាចថតធ្វើតេស្តលេងថា ញញឹមបែបម៉េចទើបសមនឹងអ្នក។ ស្នាមញញឹមក៏ជាចំណុចទាក់ទាញនៃរូបភាព ជាងរូបថតដែលមានមុខក្រញូវមិនសប្បាយចិត្តដែរ។

៣. រកកន្លែងដែលមានពន្លឺគ្រប់គ្រាន់

មុននឹងថតត្រូវឲ្យច្បាស់ថា កន្លែងដែលអ្នកថតគឺមានពន្លឺគ្រប់គ្រាន់អាចមើលឃើញមុខច្បាស់។ កន្លែងដែលមានពន្លឺខ្លាំងពេកក៏មិនជាល្អដែរ ព្រោះវានឹងធ្វើឲ្យរូបថតរបស់អ្នកមើលទៅស ឬស្លេកខ្លាំង។

៤. កំណត់ពេល

បើអ្នកចង់ថតមួយជំហរខ្លួនគួរកំណត់ពេលកាមេរ៉ាឲ្យថតដោយខ្លួនឯង ដូចជា ៣ ឬ ៥ វិនាទី។ បើអាចគួរប្រើកាមេរ៉ាក្រោយ ព្រោះវាមានទំហំ Mega Pixel ធំ និងមិនបែក Noise (ព្រិលខ្លាំងពេលពង្រីក)។ ចំណាំ៖ ជៀសវាងថតឆ្លុះកញ្ចក់លើកលែងតែគ្មានជម្រើស។

៥. ប្រើកម្មវិធីជំនួយ

បើដឹងថា សម្រស់របស់ខ្លួនមិនបាន គួរប្រើកម្មវិធីជំនួយនៅពេលថតដើម្បីធ្វើឲ្យសាច់ម៉ត់ស្អាតជាងមុន ឬបើអាចក្រោយថតហើយអ្នកគួរយកមក Edit ឲ្យបានស្អាតសិនមុននឹង Post ចេញ។ តែមិនត្រូវដាក់ឲ្យរលោងពេករហូតបាត់បង់ភាពដើមទាំងស្រុងទេ (ឧទាហរណ៍៖ ប្រើកម្មវិធី Camera 360)។

៦. មើល Background

រូបថតស្អាតមិនមែនតែមនុស្សខាងមុខទេ។ ត្រូវឆែកមើលខាងក្រោយខ្នងផងថា មានអ្វីរញ៉េរញ៉ៃឬអត់? បើមាន គួរស្វែងរកជ្រុងផ្សេងដែលល្អសឹមថត។ បើ Background ដដែលៗ ម៉េចមិនសាកប្ដូររសជាតិដូចជាស្វែងរកកន្លែងធម្មជាតិដូចជា ជួរភ្នំ ឬវាលស្រែខៀវស្រងាត់ធ្វើជា Background ម្ដងមើល៍។

៧. ប្ដូរស្ទីលថ្មី

បើថតជ្រុងមួយស្អាតក៏មិនគួរបញ្ចេញតែជ្រុងដដែលៗរហូតដែរ។ ម៉េចមិនសាកប្ដូរស្ទីលដូចជាកាន់តុក្កតា ឱនផឹកកាហ្វេ ឬថតជុំមិត្តភ័ក្ដិពីរបីនាក់ម្ដងមើល៍។ ហើយអ្វីដែលត្រូវចាំ គឺត្រូវពិនិត្យឲ្យច្បាស់ជាមុនសិនមុននឹងសម្រេច Post ឬ Share ឲ្យមិត្តភក្ដិរបស់អ្នកបានឃើញ។

ប៉ុណ្ណឹងគ្រប់គ្រាន់ឬនៅ? បើមានក្បាច់ពិសេស ខុសពីហ្នឹង អាចចែករំលែកក្នុងប្រអប់ Comment ខាងក្រោមណា!

អាន៖ យន្តហោះគ្មានជញ្ជាំងដែលធ្លាប់តែជាក្តីស្រមៃនឹងក្លាយជាការពិត

ប្រែសម្រួល៖ សីហា ប្រភព៖ tomsguide