រឿងរ៉ាវដំណើរដើមទងនៃទិវាមាតា ឬ Mother's Day

2016-05-07 13:30:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិវាមាតាឬ Mother's Dayជាការថ្ងៃនៃការប្រារព្ធធ្វើឡើងមួយក្នុងគោលបំណង គោរពនិងបង្ហាញពីការដឹងគុណចំពោះអ្នកម្ដាយ ទៅតាមទម្លាប់ផ្សេងៗគ្នាពីបណ្ដាប្រទេសជាច្រើននៅលើពិភពលោក។ សម្រាប់ទិវាមាតានាថ្ងៃ ៨ ឧសភា ឆ្នាំ២០១៦ មានរឿងរ៉ាវជាច្រើនដែលជាដំណើរដើមទងទាក់ទងនិងថ្ងៃពិសេសនេះ៖

ទិវាមាតាតាមរឿងប្រវត្តិសាស្ត្រ

ការប្រារព្ធទិវាមាតា អាចទាក់ទងនឹងរឿងប្រវត្តិសាស្ត្របុរាណនៃជនជាតិក្រិកនិងរ៉ូម៉ាំង ដែលពួកគេបានធ្វើពិធីបុណ្យមួយជាកិត្តិយសដល់ម្ដាយទេពធីតា Rhea និងCybele ។ ជាមួយគ្នានោះ នៅក្នុងសាសនាគ្រិស្តក៏មានពិធីបុណ្យមួយដែលអាចទាក់ទងនិងទិវាមាតាផងដែរ គឺពិធីបុណ្យសាសនា "Mothering Sunday” នៅប្រទេសអឺរ៉ុបដែលក្មេងៗអាចជូនអំណោយដល់ម្ដាយរបស់ពួកគេ ដូចជាផ្កា ឬអំណោយផ្សេងៗដើម្បីជាការគោរពនិងកោតសរសើរ ។ ការកកើតការប្រារព្ធទិវាមាតា

ឫសគល់នៃថ្ងៃទិវាមាតានៅសហរដ្ឋអាមេរិកបានកើតឡើងនាសតវត្សទី១៩។ មុនឆ្នាំសង្គ្រាមស៊ីវិល (១៨៦១-១៨៦៥) សកម្មជនសង្គមម្នាក់គឺលោកស្រី Anna Reeves Jarvis បានបង្កើតយុទ្ធនាការមួយឈ្មោះ Mother's Day Work Clubs ដែលបង្រៀនស្ត្រីឲ្យចេះថែទាំក្មេងៗ។ រយៈកាលក្រោយមកទោះជាមានការបញ្ហារាំងស្ទះមួយចំនួនដោយសង្គ្រាមស៊ីវិលនៅសហរដ្ឋអាមេរិក លោកស្រី Anna Reeves Jarvisរួមជាមួយសកម្មជនក្នុងតំបន់ផ្សេងៗទៀតបង្កើតជាយុទ្ធនាការផ្សេងសម្រាប់ស្ត្រីជាមាតាក្នុងការស្វែងរកសន្តិភាពពិភពលោក និងចលនាយុទ្ធនាការសកម្មភាពសង្គមជាច្រើនទៀត។

រហូតដល់ឆ្នាំ១៩០៨ ទិវាមាតានៅសហរដ្ឋអាមេរិកត្រូវបានបង្កើតឡើងក្នុងគោលបំណងគោរពនិងដឹងគុណចំពោះមាតា ដោយមានការចូលរួមបង្កើតផ្សព្វផ្សាយយ៉ាងសកម្មពីសកម្មជនសង្គមម្នាក់គឺ អ្នកស្រី Anna Jarvis ជាកូនស្រីរបស់លោកស្រីAnna Reeves Jarvis។ ទិវាមាតាបានក្លាយជាថ្ងៃបុណ្យឈប់សម្រាកផ្លូវការក្នុងឆ្នាំ១៩១៤នៅសហរដ្ឋអាមេរិក ប្រកាសដោយប្រធានាធិបតី Woodrow Wilson តាមរយៈការប្រឹងប្រែងនៃចលនាយុទ្ធនាការរបស់អ្នកស្រី Anna Jarvis។

នៅឆ្នាំ១៩២០ អ្នកស្រី Anna Jarvisបានអំពាវនាវឲ្យក្រុមហ៊ុនមួយចំនួនឲ្យឈប់យកទិវាគោរពដឹងគុណមាតាទៅជាការផ្សាយពាណិជ្ជកម្មលក់របស់របរផ្សេងៗដូចជាផ្កា ឬកាដូដើម្បីតែផលចំណេញ។ អ្នកស្រីធ្លាប់បានដាក់ពាក្យបណ្ដឹងប្ដឹងទៅក្រុមហ៊ុនមួយចំនួននោះផងដែរ។

ទិវាមាតានិងទំនៀមទម្លាប់នៃការប្រារព្ធផ្សេងៗ

នៅសហរដ្ឋអាមេរិក ទិវាមាតាឬ Mother's Dayការប្រារព្ធទិវានោះគេតែងធ្វើឡើងនាថ្ងៃអាទិត្យទីពីរក្នុងខែឧសភា ដែលមិនអាចកំណត់ពីកាលបរិច្ឆេទច្បាស់លាស់នោះទេ។ ទម្លាប់នៃការប្រារព្ធ ប្រជាជនជាច្រើននិយមជូនអំណោយ កាតជូនពរ ឬផ្កាទៅកាន់ម្ដាយរបស់ពួកគេ។ អំឡុងពេលនោះពួកគេសុំឲ្យអ្នកម្ដាយពួកគេឈប់សម្រាកដូចជាមិនឲ្យធ្វើការងារក្នុងផ្ទះ ឬចម្អិនអាហារជាដើម។ ឥទ្ធិពលនៃទិវាមាតាបានរីកសាយដល់បណ្ដាប្រទេសជាច្រើនដូចជា កាណាដា ម៉ិកស៊ីកូ ចិន ជប៉ុន អាមេរិកខាងត្បូង និងអាហ្វ្រិកផងដែរ។

រយៈពេលក្រោយមក ការប្រារព្ធទាក់ទងនិងការដឹងគុណមាតា បានធ្វើឡើងនៅតាមប្រទេសជាច្រើនទៀត ដែលការប្រារព្ធនោះគឺទាក់ទងនឹងទំនៀមទម្លាប់របស់ប្រទេសរៀងៗខ្លួន។ នៅក្នុងប្រទេសថៃ ជាឧទាហរណ៍ ទិវាមាតាប្រារព្ធឡើងនាខែសីហាគឺចំថ្ងៃបុណ្យចម្រើនព្រះជន្មម្ចាស់ក្សត្រីបច្ចុប្បន្នព្រះនាមSirikit។ នៅប្រទេសអេត្យូពីចំពោះទំនៀមទម្លាប់ការប្រារព្ធដឹងគុណមាតា តែងធ្វើឡើងដោយការច្រៀងចម្រៀងដល់អ្នកម្ដាយ និងការជួបជុំគ្រួសារហូបអាហារជុំគ្នា៕