១៧ចំណុច ដែលអ្នកគួរដឹងមុនធ្វើដំណើរទៅក្រៅប្រទេស

2014-10-28 17:29:32
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់អ្នកធ្លាប់ធ្វើដំណើរទៅក្រៅប្រទេសញឹកញាប់ អាចចាត់ទុកថាជារឿងសាមញ្ញទៅហើយ ព្រោះធ្លាប់មានបទពិសោធន៍ច្រើន។ ចំណែកអ្នកទើបចាប់ផ្ដើមហោះហើរចេញទៅបរទេសលើកទី១ អាចមានអារម្មណ៍ច្របូកច្របល់បន្តិច ដោយសារមិនដឹងថាគួរធ្វើយ៉ាងណា ឬត្រៀមខ្លួនយ៉ាងណា។

គេហទំព័រ Travel Zoo បានបង្ហាញពីការត្រៀមខ្លួនមួយចំនួនមុនពេលចេញដំណើរទៅក្រៅប្រទេសដូចតទៅ៖

ប្រាក់កាស

១. គួរស្វែងរកព័ត៌មានពីអត្រាប្ដូរប្រាក់នៅប្រទេសដែលអ្នកចង់ទៅ ដើម្បីកុំឲ្យខាតបង់ច្រើនព្រោះគេស៊ីហាងឆេង។

២. ពេលចង់ប្ដូរប្រាក់ គួរទៅធនាគារធំៗដោយផ្ទាល់ ជៀសវាងប្ដូរនៅតាមព្រលានយន្តហោះ ឬទីកន្លែងផ្សេងៗ ព្រោះអត្រាប្ដូរប្រាក់នៅក្រៅតែងគិតខុសច្រើនពីធនាគារ និងហាងឆេងប្ដូរប្រាក់ទូទៅ។

៣. គួរដាក់លុយសុទ្ធខ្លះតាមខ្លួនពេលចេញទៅក្រៅប្រទេស ព្រោះកន្លែងខ្លះមិនគិតជាសែក ឬឆូតកាតទេ ជាពិសេសថ្លៃរថភ្លើង និងឡានក្រុង។

កាត ATM 

៤. ត្រូវដឹងថាកាត ATM របស់អ្នកដំណើរការនៅប្រទេសដែលអ្នកមានគម្រោងទៅឬទេ។

៥. ទំនាក់ទំនងទៅកាន់ធនាគារដែលអ្នកបើកគណនី មុនពេលប្រើប្រាស់នៅក្រៅប្រទេស ព្រោះធនាគារខ្លះអាចគិតថាជាការបន្លំពេលធ្វើប្រតិបត្តិការនៅប្រទេសផ្សេងដែលម្ចាស់គណនីរស់នៅ ហើយគេនឹងបិទគណនេយ្យនោះភ្លាមដើម្បីការពារសុវត្ថិភាព។

ព័ត៌មាននានា

៦. ត្រូវដឹងថាប្រទេសដែលអ្នកទៅ គិតថ្លៃចេញចូលប្រទេស ឬអត់។ ប្រទេសខ្លះ តម្រូវឲ្យអ្នកដំណើរបង់ប្រាក់ដើម្បីចេញចូលប្រទេស។ ប្រាក់ទាំងនោះ មិនរាប់បញ្ចូលទៅក្នុងតម្លៃសំបុត្រយន្តហោះទេ ហើយអាចមានតម្លៃចន្លោះពី ២៥ ទៅ ២០០ដុល្លារ។

៧. ទិញសំបុត្រយន្តហោះ សម្រាប់កន្លែងដែលអ្នកចង់ទៅទុកជាមុន។ ការទិញទុកមុនអាចឲ្យអ្នកចំណេញជើងហោះហើរ ជៀសវាងចុះច្រើនកន្លែង។

៨. គួរមានសៀវភៅណែនាំជាប់ខ្លួន ដែលក្នុងនោះមានភ្ជាប់ជាមួយផែនទី ពាក្យគន្លឹះ និងឃ្លាដែលអាចប្រើប្រាស់បាននៅប្រទេសនោះ។

៩. ស្វែងរកព័ត៌មានទាក់ទងនឹងព្រឹត្តិការណ៍ធំៗ ឬកម្មវិធីកម្សាន្តនានានៅប្រទេសនោះ ដើម្បីប្រាកដថាអ្នកមិនខកខានចូលរួម។

គ្រឿងអេឡិចត្រូនិក

១០. ត្រូវយកឆ្នាំងសាកថ្មទៅតាមខ្លួន ព្រោះឆ្នាំងសាកអាចប្រើខុសៗគ្នាទៅតាមប្រទេស ឯទំហំព្រីភ្លើងក៏មិនដូចគ្នាទាំងអស់ដែរ។ លើសពីនេះ ត្រូវដឹងពីកម្លាំងវ៉ុលដែលឆ្នាំងសាកស៊ីផង ព្រោះប្រទេសខ្លះប្រើកម្លាំងភ្លើងខ្លាំង ដែលឆ្នាំងសាកថ្មរបស់អ្នកមិនអាចប្រើការបាន។

១១. ដោនឡូតកម្មវិធីនានាដែលត្រូវការ ដាក់ក្នុងទូរស័ព្ទ ឬកុំព្យូទ័រទុកជាមុន ព្រោះដោនឡូតនៅបរទេសអាចគិតថ្លៃសេវា។

ការរៀបចំ

១២. ត្រូវដឹងពីចំនួនអីវ៉ាន់ដែលជើងហោះហើរនីមួយៗអនុញ្ញាតឲ្យយកតាមខ្លួន ការពារកុំឲ្យគិតថ្លៃបន្ថែមលើអីវ៉ាន់លើស។

១៣. ដាក់ចំណីកំដរមាត់ខ្លះតាមខ្លួន។ ការធ្វើដំណើរទៅបរទេសគឺជារឿងកម្សាន្ត ប៉ុន្តែពេលខ្លះក៏អាចអផ្សុកដែរ ដូចនេះគួរដាក់អ្វីខ្លះកំដរមាត់ រហូតដល់ពេលអ្នករកបានភោជនីយដ្ឋាន ឬហាងអាហារដើម្បីទទួលទាន។

១៤. សាកសួរព័ត៌មានពីក្រុមហ៊ុនធានារ៉ាប់រងសុខភាព និងអាយុជីវិតរបស់អ្នក ថាគេអនុវត្តនៅក្រៅប្រទេស ឬអត់។ បើមិនអនុវត្តទេ ត្រូវបង់បន្ថែមឬយ៉ាងណា ដើម្បីប្រាកដថាអ្នកអាចទៅបរទេសដោយស្ងប់អារម្មណ៍។

លិខិតឆ្លងដែន

១៥. ថតចម្លងលិខិតឆ្លងដែន រួចដាក់តាមខ្លួន ដើម្បីប្រាកដថាទោះជាលិខិតឆ្លងដែនត្រូវគេលួច និងជ្រុះបាត់ ក៏អ្នកនៅតែអាចត្រលប់មកមាតុប្រទេសវិញ ឬបញ្ជាក់អត្តសញ្ញាណថាអ្នកជាប្រជាជននៃប្រទេសណាដែរ។

១៦. ទុកលិខិតឆ្លងដែនថតចម្លង នៅផ្ទះ ឬនៅនរណាម្នាក់ដែលអាចទុកចិត្តបាន។ បន្ថែមពីលើនេះ អ្នកគួរថតទុកក្នុងទូរស័ព្ទ ឬគ្រឿងអេឡិចត្រូនិកផ្សេងៗការពារការបាត់បង់ដោយប្រការណាមួយ។

១៧. គួរចុះឈ្មោះនៅស្ថានទូតខ្លួនឯង ក្នុងប្រទេសដែលអ្នកធ្វើដំណើរទៅ ដើម្បីងាយស្រួលពេលមានបញ្ហានៅក្នុងប្រទេសនោះ គេអាចទាក់ទងអ្នក និងការពារសុវត្ថិភាពដល់អ្នក។

ចុចអាន៖ ពេលទៅថៃ ទេសចរគួរដឹងអ្វីខ្លះ?

ប្រែសម្រួល៖ គង់ វិសាល

ប្រភព៖ travelzoo