តួឯកប្រុស "និស្ស័យស្នេហ៍ដាវទេព" ប្រើពេល១០ឆ្នាំទើបយកបេះដូងព្រះនាងចៀវៃបាន

2016-05-23 16:45:46
ចំនួនមតិ 0 | ចំនួនចែករំលែក 0

ចន្លោះមិនឃើញ

រសៀលថ្ងៃទី ២០ខែឧសភា សិល្បករល្បីឈ្មោះតៃវ៉ាន់ទាំង២រូបរួមមានតារាសម្ដែង Ruby Lin និង Wallace Huo បានបញ្ជាក់ថាពួកគេកំពុងតែស្រលាញ់គ្នាពិតប្រាកដមែន។

វេលាម៉ោង ១៤ថ្ងៃទី ២០ខែឧសភា តំណាងក្រុមហ៊ុនរបស់តារាសម្ដែងប្រុស Wallace Huo បានបង្ហោះនៅលើបណ្ដាញសង្គមផ្លូវការរបស់ខ្លួនថា៖ "សង្ឃឹមថានឹងទទួលបានពាក្យជូនពររបស់អ្នកទាំងអស់គ្នា។ ពី Ruby Lin”។ ភ្លាមៗក្រោយមក តារាសម្ដែងស្រី Ruby Lin បានចែករំលែកបន្តសារមួយនេះដោយភ្ជាប់ជាមួយរូបបេះដូងផងដែរ។ មួយម៉ោងក្រោយមក ប្រុសសង្ហានិងស្រីស្អាតទាំង២បានបង្ហោះរូបផ្កាកុលាបដែលតួឯករឿង "និស្ស័យស្នេហ៍ដាវទេព" ជូនមិត្តស្រីអាយុលើសខ្លួន៣ឆ្នាំ។

អ្នកគ្រប់គ្រងរបស់ Ruby Lin បានទម្លាយថា៖ "ពួកគេជាមិត្តភ័ក្ដិនឹងគ្នាយូរមកហើយ តែពន្លកស្នេហាទើបតែដុះកាលពីខែមករាក្នុងថ្ងៃខួបកំណើតរបស់ Ruby តែប៉ុណ្ណោះ"។ ទោះយ៉ាងណាទំនាក់ទំនងរបស់ពួកគេមិនមែនទើបតែចាប់ផ្ដើមនោះឡើយ។

តាមការចុះផ្សាយពីសារព័ត៌មានចិន Wallace បានលង់ស្នេហ៍ Ruby លើកដំបូងតាំងពីថតរឿង "Sound of Colors” ជាមួយគ្នានៅឆ្នាំ២០០៦។ ទោះយ៉ាងណាពេលនោះ Ruby កំពុងមានទំនាក់ទំនងស្នេហាមួយរួចហើយនៅពេលនោះ។ ក្រោយ Ruby បែកពីសង្សារចាស់ ក៏មានព័ត៌មានចចាមអារ៉ាមថាអ្នកទាំងពីរសាងស្នេហ៍ជាមួយគ្នា។

នៅពេល Ruby ផលិតរឿងភាគទូរទស្សន៍លើកដំបូងរបស់នាងរឿង "The Glamorous Imperial Concubine” នៅឆ្នាំ២០១១ នាងបានជ្រើសរើស Wallace ជាតួឯកប្រុស។ ពួកគេបានសហការគ្នាយ៉ាងល្អនិងទទួលបានការគាំទ្រខ្លាំងបំផុតនៅពេលនោះ រហូតមានពាក្យចចាមអារ៉ាមអំពីទំនាក់ទំនងស្នេហាពួកគេលេចឮសាជាថ្មី។ ប៉ុន្តែ Ruby បានចេញមុខប្រកែកដាច់អហង្ការថាពួកគេគ្រាន់តែជាមិត្តភ័ក្ដិល្អនឹងគ្នាប៉ុណ្ណោះ។

ក្នុងនាមជាមិត្តស្និទ្ធស្នាល អ្នកទាំងពីរបានទៅជួបសមាជិកគ្រួសារគ្នាទៅវិញទៅមកពេលមានពិធីជួបជុំម្ដងៗ ហើយឪពុករបស់ Ruby Lin ក៏ចូលចិត្ត Wallace ដោយសារភាពស្លូតបូតរបស់គេ។

ប៉ុន្មានឆ្នាំចុងក្រោយនេះ Huo បានចូលរួមកម្មវិធីខួបកំណើតរបស់ Ruby Lin រាល់ឆ្នាំនិងរៀបចំកាដូពិសេសៗជានិច្ច។ ប៉ុន្តែទើបតែកម្មវិធីខួបកំណើតឆ្នាំនេះ ពួកគេសុទ្ធតែទំនេររៀងៗខ្លួន ហើយក៏ចាប់ផ្ដើមសាកល្បង កសាងទំនាក់ទំនងស្នេហាជាមួយគ្នា ក្រោយមានការជំរុញពីមិត្តភ័ក្ដិ ៕