សារ៉ាយ សក្ខណា ត្រៀមទៅអាមេរិកវិញ!

2014-10-30 18:48:01
ចំនួនមតិ 0 | ចំនួនចែករំលែក 0

ចន្លោះមិនឃើញ

សារ៉ាយ សក្ខណា បានកំណត់ពេលរួចហើយ ដើម្បីឡើងយន្តហោះទៅកាន់សហរដ្ឋអាមេរិកវិញ បន្ទាប់ពីការរស់នៅមួយរយៈខ្លីលើទឹកដីកំណើត ព្រមទាំងបានថតបញ្ចប់រឿង "អូនស្រលាញ់បង" របស់ផលិតកម្មមកពីប្រទេសថៃ និង រឿង "ក្រឡអីហ្នឹង" វគ្គ ២ របស់ផលិតកម្ម LD ។

សារ៉ាយ សក្ខណា បានប្រាប់ Sabay នៅព្រឹកមិញថា នាងមិនបានទទួលសំណើថតរឿងផ្សេងទៀតទេ ខណៈទារកក្នុងផ្ទៃមានអាយុ ៥ ខែ ហើយ ព្រោះរាល់កាយវិការទាំងអស់ មិនមែនចេះតែប្រព្រឹត្តទៅបានដូចពីមុននោះទេ។

សក្ខណា បាននិយាយថា៖ “បើថតរឿងក៏ថតមិនកើតដែរ។ ដូច្នេះបើនៅ ក៏មិនដឹងធ្វើអ្វីទៀតអផ្សុកណាស់ មានតែទៅវិញ ខំប្រឹងរៀនភាសាអង់គ្លេសបន្ថែមផង"។ តារារូបនេះ ត្រូវផ្អាកថតកុនជាបណ្ដោះអាសន្ន រហូតក្រោយពេលសម្រាលកូន ហើយបន្ទាប់មក នឹងធ្វើការពិចារណាថា តើគួរនៅសម្ដែងបន្ត ឬបញ្ចប់ទាំងស្រុងតែម្ដង។

សារ៉ាយ សក្ខណា បានធ្វើដំណើរមកកាន់ប្រទេសកម្ពុជាតាំងពីថ្ងៃទី ១៥ ខែ កញ្ញា មកម្ល៉េះ និង មានរយៈពេល ២ ខែ ក្នុងការស្នាក់នៅប្រទេសកម្ពុជាលើកដំបូង បន្ទាប់ពីបានសម្រេចចិត្តទៅរួមរស់ជាមួយប្ដីលើប្រទេសមហាអំណាចសេដ្ឋកិច្ច និងយោធាខាងលើនេះ។

ទោះបីជាយ៉ាងណា អតីតតារាម៉ូដែលសម្បុរសណ្ដែកបាយរូបនេះ បានបញ្ជាក់ថា បើមិនមានការប្រែប្រួលទេនោះ នាងត្រូវឡើងយន្តហោះទៅកាន់សហរដ្ឋអាមេរិកនៅថ្ងៃទី២៧ ខែវិច្ឆិកា ២០១៤ ដោយរួមដំណើរជាមួយប្ដីរបស់នាង ព្រោះគាត់មិនបណ្ដោយឲ្យភរិយាធ្វើដំណើរម្នាក់ឯងនោះទេ ជាពិសេសដំណាក់កាលពរពោះដូច្នេះ៕