ជនភៀសខ្លួនបែកគំនិតលក់ទឹកម្ទេសនៅអាមេរិក រហូតក្លាយជាមហាសេដ្ឋី

2016-07-07 23:00:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនភៀសខ្លួនជនជាតិវៀតណាមលោក David Tran បានក្លាយទៅជាមហាសេដ្ឋីលានដុល្លារនៅលើទឹកដីអាមេរិក ដោយគ្រាន់តែលក់ទឹកម្ទេស។ តើគាត់បានរសាត់ខ្លួន និងចាប់ផ្ដើមលក់ទឹកម្ទេសតាំងពីពេលណា?

លោកតា David Tran

លោកតា David Tran អាយុ ៧១ឆ្នាំ បានចាប់ផ្ដើមបើករបរផលិតទឹកម្ទេសច្នៃខ្លួនឯងនៅឆ្នាំ ១៩៧៥ ដោយដាក់ឈ្មោះថា Pepper Sa-te រូបមាន់គកពណ៌ស។ បើគេក្រឡេកទៅមើលកាលអតីតកាលបន្តិច លោកតាធ្លាប់ច្រកទឹកម្ទេសតាមដបតូចៗ រួចធាក់កង់កញ្ចាស់ដើរលក់ផលិតផលខ្លួនឯង។

ក្នុងអំឡុងសង្គ្រាមវៀតណាម លោកតា Tran ធ្លាប់ជាវរសេនីយ៍ត្រីកងទ័ពវៀតណាមខាងត្បូង តែបានរត់ភៀសខ្លួនតាមរថភ្លើងដឹកទំនិញតៃវ៉ាន់ឈ្មោះ Huey Fong។ ប្រភពមិនបានបញ្ជាក់ថាទៅកាន់ទីណាទេ តែគាត់បានអណ្ដែតខ្លួនដល់សហរដ្ឋអាមេរិក និងក្លាយជាមហាសេដ្ឋីក្រុមហ៊ុនចំណីអាហារ Huy Fong Foods បច្ចុប្បន្ន។

ពេលទៅដល់អាមេរិកនៅឆ្នាំ ១៩៧៩ ភ្លាម គាត់គ្មានការងារ គ្មានប្រាក់កាក់ ឬបងប្អូនសាច់ញាតិនៅទីនោះឡើយ តែគាត់បានបន្តធ្វើជាអ្នកច្នៃទឹកម្ទេស ដែលខ្លួនធ្លាប់មានបទពិសោធន៍។ ដំបូងគាត់ផលិតទឹកម្ទេសដោយដៃទទេ ដាក់តាមកន្ត្រកធាក់កង់ដឹកទៅកាន់ទីផ្សារ និងភោជនីយដ្ឋាននានារបស់ប្រជាជនអាស៊ីនៅរដ្ឋ Los Angeles រួចចេះតែល្បីទៅៗដល់ទីក្រុង San Francisco និង San Diego ជាដើម។

គាត់និយាយប្រាប់ថា "សុបិននៅលើទឹកដីអាមេរិករបស់ខ្ញុំ មិនមែនចង់ក្លាយជាមហាសេដ្ឋីអ្វីទេ តែខ្ញុំចាប់ផ្ដើមរបរនេះ ព្រោះខ្ញុំចូលចិត្តទឹកជ្រលក់ស្រស់ និងហិលតិចៗ"។ ទឹកម្ទេសរបស់គាត់មាន ៥រសជាតិគឺ Pepper Sa-te, Sambal Oelek, Chili Garlic, Sambal Badjak និងSriracha ។ដោយសារតែរសជាតិ Sriracha មានភាពពេញនិយម និងផលិតពីម្ទេស Jalapeno ពេលនេះគាត់បានជួលដីគេដាំម្ទេស Jalapeno លើដីទំហំ ១៧០០ហិកតា នៅរដ្ឋកាលីហ្វញ៉ា។

ក្នុងឆ្នាំ ១៩៨០ លោកតា Tran បានផលិតទឹកម្ទេសក្នុងអគារមួយទំហំ ៤៦៤ម៉ែត្រការ៉េ នៅ Chinatown រដ្ឋ Los Angeles ។ រយៈពេល ៧ឆ្នាំក្រោយ គាត់បាន បង្កើតហាងឈ្មោះ Huy Fong ដែលធ្លាប់ជាឱសថស្ថានលើផ្ទៃដី ៦៣១៧ម៉ែត្រការ៉េ នៅទីក្រុង Rosemead រដ្ឋកាលីហ្វញ៉ា ហើយក្រោយមកបានក្លាយទៅជារោងចក្រតែម្ដង។ ក្នុងឆ្នាំ ២០១២ Huy Fong Food រកចំណូលបានប្រមាណ ៦០លានដុល្លារក្នុងមួយឆ្នាំពីការលក់ទឹកម្ទេស និងបន្តកើនឡើង ២០% ពីមួយឆ្នាំទៅមួយឆ្នាំ។

ទឹកម្ទេសរសជាតិ Sriracha ទទួលភាពល្បីរន្ទឺដោយវាយលុកទូទាំងអាមេរិក កាណាដា ម៉ិកស៊ីកូ និង១០ប្រទេសទៀត គិតត្រឹមឆ្នាំ ២០០៩។ រសជាតិនេះមួយដបលក់ត្រឹមតែ ៣,៥ដុល្លារប៉ុណ្ណោះ។ សព្វថ្ងៃលោកតាកំពុងបន្តសង្វាក់ផលិតកម្ម ដោយឲ្យកូនប្រុសរបស់គាត់ធ្វើជាប្រធានក្រុមហ៊ុន និងកូនស្រីជាអនុប្រធាន៕