ក្រពើ ៩២ក្បាល រួចចេញពីកសិដ្ឋាន ក្រោយទឹកជំនន់ជន់ខ្លាំងនៅចិន

2016-07-08 15:58:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងរយៈពេលប៉ុន្មានសប្ដាហ៍កន្លងមកនេះ ទឹកជំនន់បានជន់លិចយ៉ាងខ្លាំង ទៅលើផ្នែកមួយចំនួននៃប្រទេសចិន ជាពិសេសគឺខេត្ត Anhui តែម្ដង។ កម្រិតទឹកបានកើនឡើងខ្ពស់ ប៉ុន្តែវាមិនមែនជាអ្វីដែលប្រជាជនត្រូវព្រួយបារម្ភ តែម្យ៉ាងនោះទេ។ រដ្ឋាភិបាលក្នុងតំបន់បានព្រមានអ្នកស្រុកថា សត្វក្រពើសរុបចំនួន ៩២ក្បាល បានរួចចេញពីកសិដ្ឋានមួយកន្លែង នាដើមសប្ដាហ៍កន្លងទៅនេះ។

យោងតាមប្រភពព័ត៌មានបានឱ្យដឹងថា សត្វក្រពើទាំងអស់នោះបានរួចចេញពីកសិដ្ឋានមួយកន្លែង ក្នុងមជ្ឈមណ្ឌលស្រាវជ្រាវ «Anhui Research Center for Chinese Alligator Reproduction» ស្ថិតក្នុងខេត្ត Anhui ដែលនៅទីនោះ មានសត្វក្រពើរហូតដល់ទៅជាង ១០ ០០០ក្បាលឯណោះ។ សត្វក្រពើដែលបានរួចចេញទៅ គឺជាពូជសត្វក្រពើចិន ឬ Yangtze ដែលជិតផុតពូជទៅហើយ។

យ៉ាងណាក៏ដោយ នៅក្នុងសេចក្ដីព្រមានទៅកាន់អ្នកស្រុក រដ្ឋាភិបាលបាននិយាយប្រាប់ មិនឲ្យអ្នកស្រុកមានការព្រួយបារម្ភឡើយ ដោយសារតែស្ថានភាព គឺស្ថិតក្រោមការគ្រប់គ្រងទាំងស្រុង ហើយសត្វក្រពើមួយចំនួនក៏ត្រូវចាប់បានមកវិញ និងនៅសល់ជាច្រើនក្បាលផ្សេងទៀត ត្រូវបានគេតាមដាន ដឹងថានៅកន្លែងណាហើយ៕