ចិត្តខ្លាំងមែន! គ្រាន់តែផាកពិន័យតិចតួច ចាក់សាំងដុតឡានចោល

2014-10-31 16:02:54
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសម្នាក់នៅក្រុង Shundu ខេត្តក្វាងតុង បានចាក់សាំងដុតឡានខ្លួនឯង បន្ទាប់ពីត្រូវបុគ្គលិកអគារមួយកន្លែងចាក់សោកង់ឡានជាប់ ហើយពិន័យរឿងចតឡានឥតបង់លុយ។

នៅម៉ោងប្រហែល ៩:៣០ព្រឹក បុរសចិត្តខ្លាំងឈ្មោះ Huang ឃើញឡានខ្លួនឯងត្រូវគេចាក់សោជាប់នៅកន្លែងចតឡាន បន្ទាប់មកលោកបានប្រាប់ឲ្យបុគ្គលិកដោះសោនោះវិញ ប៉ុន្តែគ្មាននរណាធ្វើតាមលោកឡើយ។

លោក Huang បាននិយាយថា “មិនមែនតែខ្ញុំទេ ម្ចាស់ឡាន ៨ទៀត ក៏ក្ដៅស្លឹកត្រចៀកដែរ ពេលឃើញឡានជាប់សោអីចឹងនោះ"។ លោកបានបន្តទៀតថា "អ្នកធ្វើការនៅហ្នឹងប្រាប់ថា គេដោះសោឲ្យវិញ បើព្រមបង់លុយ ៣០យាន់"។

លោក Huang ជាមួយម្ចាស់ឡានផ្សេងទៀត បានឈ្លោះប្រកែកគ្នាជាមួយបុគ្គលិកអគារយ៉ាងយូរ ដោយនិយាយថាការផាកពិន័យនេះខុសច្បាប់ ហើយបុគ្គលិកអគារគ្មានសិទ្ធិចាក់ឡានពួកគេនោះទេ។ ទោះយ៉ាងណា ៦ម៉ោងក្រោយមក ម្ចាស់ឡានផ្សេងទៀតបានបង់លុយពិន័យ លើកលែងតែលោក Huang ដែលទាញដបសាំងយកមកចាក់ស្រោចលើឡានដើម្បីដុត តែត្រូវបុគ្គលិកអគារបញ្ឈប់ទាន់។ លោក Huang បានចាកចេញពីកន្លែងជម្លោះនោះនៅម៉ោង ៣:៣០នាទីល្ងាច បន្ទាប់ពីបុគ្គលិកដោះសោឡានឲ្យ ដោយពុំមានពិន័យអ្វីឡើយ។

គណៈកម្មការអគារធ្លាប់បញ្ជាក់ថា ថ្លៃចតឡាន គឺ ២០០យាន់ (ប្រហែល ៣២ដុល្លារ) ក្នុងមួយខែ។ ម្ចាស់ឡានដែលបង់ ១២ខែមុន គេចុះថ្លៃឲ្យ ២ខែ នៅត្រឹមតម្លៃ ២០០០យាន់ក្នុងមួយឆ្នាំ។ នៅក្នុងនោះ គេបានបញ្ជាក់ទៀតថា ឡានដែលចតដោយមិនបានបង់ថ្លៃ នឹងត្រូវគេចាក់សោ ហើយពិន័យ ៣០យាន់ (ប្រហែល ៥ដុល្លារ) ជាថ្លៃជួសជុលផ្លូវ៕