គ្រូ U16 កម្ពុជា អួលដើមកជាថ្មី ពេលឆ្លើយសំនួរពាក់ព័ន្ធអ្នកគាំទ្រ

2016-07-24 15:41:22
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Inoue Kazunori គ្រូបង្វឹកក្រុមបាល់ទាត់ U16កម្ពុជាអួលដើមកជាថ្មី ពេលឆ្លើយសំនួររបស់ Sabay សួរពាក់ព័ន្ធអ្នកគាំទ្រកម្ពុជាកាលពីយប់មិញនេះ នៅពហុកីឡដ្ឋានជាតិក្រោយក្រុមរបស់លោកទទួលបានលេខ ៤នៃពានរង្វាន់ AFF Smart U-16 Championship 2016 ដែលចាញ់យុវជនថៃ ៣-០។

គ្រូបង្វឹកជនជាតិជប៉ុនរូបនេះបានឲ្យដឹងថា លោកគ្មានអ្វីឆ្លើយបានក្រៅពីអរគុណ ពេលសួរពាក់ព័ន្ធអ្នកគាំទ្រ។ លោកពិតជាសូមអរគុណខ្លាំងមែនទែនអស់ពីបេះដូង លោកគិតថាអ្នកគាំទ្រពិតជាដឹងថាថៃជាក្រុមខ្លាំង ហើយកម្ពុជាមានសង្ឃឹមតិចតួច អាចយកឈ្នះក្រុមភ្ញៀវមួយនេះ ប៉ុន្តែប្រិយមិត្តនៅតែមកលើកទឹកចិត្តច្រើននាកំឡុងពេលក្រុមកម្ពុជាប្រកួត។

គ្រួបង្វឹកដែលមកដឹកនាំកម្ពុជានាខែកុម្ភៈរូបនេះបន្ថែមថា ទឹកចិត្តអ្នកគាំទ្រកម្ពុជាបានធ្វើឲ្យលោកស្រក់ទឹកភ្នែកម្ដងហើយម្ដងទៀត លោកពិតជារកពាក្យអ្វីមកនិយាយអរគុណទៅកាន់ពួកគេមិនបាន។ នាឆ្នាំក្រោយលោក នឹងរៀបចំក្រុមឲ្យបានល្អជាងនេះ ដើម្បីអាចជួយកម្ពុជាឲ្យមានមុខមាត់វិស័យបាល់ទាត់ជាងនេះបន្ថែមទៀត។

ជយលាភីលេខ១៖ អូស្ត្រាលីទទួលបានពាន និងមេដាយមាស ជយលាភីលេខ២៖ វៀតណាម ទទួលបានមេដាយប្រាក់ ជយលាភីលេខ៣៖ ថៃ ទទួលបានមេដាយសំរឹទ្ធ ក្រុម Fair Play៖ កម្ពុជា ទទួលបានពានមួយ