ក្នុងចិត្តឪពុកម្ដាយនៅតែព្រួយ ទោះបីប្រឡងឌីប្លូមធ្វើតាមសាលារៀងខ្លួន
- 2016-08-09 21:32:44
- ចំនួនមតិ 0 | ចំនួនចែករំលែក 0
ក្នុងចិត្តឪពុកម្ដាយនៅតែព្រួយ ទោះបីប្រឡងឌីប្លូមធ្វើតាមសាលារៀងខ្លួន
ចន្លោះមិនឃើញ
នេះជាថ្ងៃទី២ ហើយក៏ជាថ្ងៃចុងក្រោយសម្រាប់ការប្រឡងសញ្ញាបត្រមធ្យមសិក្សាបឋមភូមិ(ថ្នាក់ទី៩) ទូទាំងប្រទេស។ បើទោះបីការប្រឡងត្រូវប្ដូរការគ្រប់គ្រងសិទ្ធិអំណាចមកតាមសាលារៀងៗខ្លួន ក៏ឪពុកម្ដាយជាច្រើននៅតែព្រួយបារម្ភ និងរង់ចាំដោយភាពអន្ទះសាតាមរបងមណ្ឌលនានា។
អ្នកស្រី ម៉ាលី ដែលកំពុងឈរចាំកូនស្រីមកប្រឡងនៅមណ្ឌលវិទ្យាល័យឥន្ទ្រទេវី បានប្រាប់ Sabay ថា អ្នកស្រីនៅតែព្រួយចិត្តខ្លាំងបើទោះការប្រឡងនេះចេញវិញ្ញាសាតាមសាលារៀងៗខ្លួនក្ដី។ ម្ដាយវ័យ ៤១ឆ្នាំរូបនេះ បាននិយាយថា៖ "មីងនៅតែខ្លាច ព្រោះតែធ្លាក់ដឹងតែខាតអស់មួយឆ្នាំ ហើយខ្លាចកូនខូចចិត្តផង ... ចឹងហើយបានព្រឹកឡើងក្រោកពីងឹត ដាំស្លឲ្យកូនហូបហើយ បានជូនចេញមកជាមួយគ្នា"។
ចំណែកលោក ស្រ៊ុន ដារ៉ា ក៏បានរៀបរាប់ដែរថា៖ "ប្រឡងឌីប្លូមឥឡូវវិញ្ញាសាចេញតាមសាលារៀងខ្លួនមែន តែនៅតែតឹង ព្រោះគេមិនឲ្យយករបស់តាមខ្លួនទេ... តែមិនអីទេ បើចេះជាប់ហើយ មិនពិបាកខ្លាំងដូចបាក់ឌុប"។ លោក ដារ៉ា បានបញ្ជាក់ទៀតថា ការប្រឡងឌីប្លូមឆ្នាំនេះដូចជាមិនសូវមានឪពុកម្ដាយរង់ចាំច្រើនទេ ប៉ុន្តែចំពោះលោកវិញត្រូវតែចំណាយពេលចាំកូន ដើម្បីលើកទឹកចិត្តឲ្យទទួលបាននិទ្ទេសល្អ។
ការប្រឡងសញ្ញាបត្រមធ្យមសិក្សាបឋមសិក្សាប្រព្រឹត្តទៅ ២ថ្ងៃ គឺថ្ងៃទី៨ និងថ្ងៃទី៩ ខែសីហា ដោយមានបេក្ខជនប្រឡងសរុបចំនួន១៥៤ ៥៤២នាក់ និងមានមណ្ឌលប្រឡងចំនួន ១៦៣០មណ្ឌលទូទាំងប្រទេស ។ មុខវិជ្ជាប្រឡងមានចំនួន ១០មុខវិជ្ជា ត្រូវជា ១១ វិញ្ញាសា រួមមាន ១.តែងសេចក្ដី ២.គីមីវិទ្យា ៣.ផែនដី និងបរិស្ថានវិទ្យា ៤.រូបវិទ្យា ៥.ភូមិវិទ្យា ៦.សីលធម៌-ពលរដ្ឋវិជ្ជា ៧.គណិតវិទ្យា ៨.ការសរសេរតាមអាន ៩. ជីវវិទ្យា ១០.ប្រវត្តិវិទ្យា និង ១១.ភាសាបរទេស៕
អត្ថបទ៖ គង់ វិសាល