សេដ្ឋកិច្ចវិទូកម្ពុជា៖ ផលិតផលខ្មែរនៅមានបញ្ហាខ្លះ ដើម្បីទាក់ទាញភ្ញៀវបរទេស

2016-08-16 00:24:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កង្វះអ្នកជំនាញឌីហ្សាញផលិតផល ការដើរទីផ្សារ និង តម្លៃ គឺជា ឧបសគ្គមួយ នៃការលក់ផលិតផល ប្រពៃណីរបស់កម្ពុជា ឬផលិតផលជាអនុស្សាវរីយ៍ ទៅឲ្យភ្ញៀវបរទេស។ នេះជាការលើកឡើងរបស់សេដ្ឋកិច្ចវិទូកម្ពុជា លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ នៃឧត្ដមក្រុមប្រឹក្សាសេដ្ឋកិច្ចជាតិ។

ទាក់ទិនទៅនឹងការទាក់ទាញឲ្យភ្ញៀវបរទេសទិញផលិតផលរបស់ខ្មែរនេះ លោកបណ្ឌិត ក៏បានលើកឡើងដែរថា សព្វថ្ងៃនេះ ភ្ញៀវបរទេសក៏លំបាកនៅក្នុងការជ្រើសរើសផលិតផលរបស់ខ្មែរ ខណៈផលិតផលបរទេស (ប្រទេសជិតខាង) មានលក់នៅក្នុងតំបន់ទេសចរសំខាន់ៗ ដូចជា អង្គរវត្ត ជាដើម។

សេដ្ឋកិច្ចវិទូកម្ពុជារូបនេះ បានលើកឡើងពីចំណុចបញ្ហា ដូចជា៖

១. បញ្ហាឌីហ្សាញ៖ ផលិតផលខ្មែរនៅខ្វះខាតឌីហ្សាញឲ្យទាក់ទាញភ្ញៀវបរទេស។ ការឌីហ្សាញនេះសំដៅការរចនាឲ្យលក្ខណៈជាខ្មែរ តែបែបសម័យ ទើបបរទេសចង់ទិញទុកជាអនុស្សាវរីយក្រោយពីទស្សនាកម្សាន្តនៅខ្មែរ។

២. បញ្ហាគុណភាព និង តម្លៃ៖ វត្ថុអនុស្សាវរីយ៍របស់យើងនៅមានតម្លៃទាប តែគុណភាពក៏ទាបដែរ ដូច្នេះ យើងគួរធ្វើឲ្យវាមានគុណភាព តែតម្លៃក៏ថ្លៃ ហើយភ្ញៀវអាចទិញទុកជាអនុស្សាវរីយ៍ទៅស្រុកគេវិញ។ ទន្ទឹមនឹងនេះ ការផលិតរបស់យើងនៅមានកម្រិត ដែលទាមទារឲ្យមានឆន្ទៈខ្លាំងជាងនេះ។ "បរទេសគេមកលេងស្រុកយើង គេមិនខ្លាចចំណាយទេ តែគេចង់បានផលិតផលល្អ គុណភាព ដើម្បីយកទៅស្រុកគេវិញ"។ លោក បណ្ឌិត ម៉ី កល្យាណ មានប្រសាសន៍។

៣. បញ្ហាទីផ្សារ៖ សព្វថ្ងៃនេះ យើងក៏នៅខ្វះខាតលើយុទ្ធសាស្ត្រផ្សព្វផ្សាយអំពីផលិតផលរបស់ខ្មែរ។ ប្រសិនបើផលិតផលរបស់យើងមានគុណភាព និង តម្លៃសមរម្យ យើងអាចផ្សព្វផ្សាយលក់នៅតំបន់ទេសចរណ៍សំខាន់ៗក្នុងព្រះរាជាណាចក្រកម្ពុជា។ "កន្លែងណាក៏បាន ក៏យើងអាចលក់ ឲ្យតែលក់ដាច់ គឺយើងមានការងារធ្វើហើយ"។

ផលិតផលក្នុងស្រុក ឬ ផលិតផលប្រពៃណីខ្មែរសំខាន់ៗមានដូចជា កន្រ្តកយួរដៃ គ្រឿងចម្លាក់ សំពត់ ហូល ផាមួង ក្រមា កន្សែង និង សូត្រជាដើម។ លោកបណ្ឌិត ម៉ី កល្យាណ បានលើកឡើងថា មែនទែនទៅផលិតផលសូត្រខ្លះ យើងយកវត្ថុធាតុដើមពីប្រទេសថៃ ហើយមកច្នៃលក់នៅទីផ្សារក៏មាន។

រូបតំណាង

តែទោះបីជាយ៉ាងណាក៏ដោយ លោកបានសម្ដែងក្ដីសង្ឃឹមលើយុវជនជំនាន់ក្រោយ ដែលអាចផ្លាស់ប្ដូរនូវទម្លាប់ខាងលើ ដោយពួកគេនឹងបង្កើនបច្ចេកទេស រួមទាំងការស្រាវជ្រាវ តាមទីផ្សារ និង ការរចនាផលិតផលឲ្យទាក់ទាញភ្ញៀវទេសចរណ៍ចង់ទិញផលិតផលរបស់ខ្មែរ។

លោកបានលើកឡើងថា ប្រសិនបើយើងអាចបង្កើនផលិតផលអនុស្សាវរីយ៍ ដោយលក់បានកាន់តែច្រើន គឺមានប្រយោជន៍ច្រើនសម្រាប់សេដ្ឋកិច្ច គឺស្មើនឹងការបង្កើនការងារ បង្កើនចំណូល និង ធ្វើឲ្យភ្ញៀវបរទេសស្គាល់នូវផលិតផលរបស់ខ្មែរ ព្រោះពួកគេបានទិញផលិតផលទាំងនោះទុកជាអនុស្សាវរីយ៍៕

អត្ថបទ៖ វិបុត្រ