តារាសម្ដែងស្រី ៨ ដួង មានទីផ្សារខ្ពស់ជាងគេក្នុងឆ្នាំ២០១៤

2014-11-03 18:20:48
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាស្រីវ័យក្មេង ៨ដួងកំពុងមានទីផ្សារខ្ពស់ក្នុងឆ្នាំ២០១៤។ ទីផ្សារតារាទាំង ៨ ដួងនេះ កើនឡើងតាមរយៈការបង្ហាញវត្តមានក្នុងខ្សែភាពយន្ត ថតស្ប៉ត និង សកម្មភាពក្នុងវិស័យសិល្បៈផ្សេងៗទៀត។

១ ឌុច លីដា ហាក់មានទីផ្សារខ្ពស់ជាងគេក្នុងឆ្នាំ២០១៤ ដោយសារតែនាងបានថតខ្សែភាពយន្តរឿង "ស្បែកគង់" ដែលចាយទុនជិត ៧០ម៉ឺនដុល្លារ។ ក្រៅតែពីមានភាពល្បីក្នុងរឿងនេះកញ្ញាកំពុងថតខ្សែភាពយន្តមួយរឿងទៀតចាយទុនជិត ២០ ម៉ឺនដុល្លារ របស់ផលិតកម្ម I Friend Entertainment ។ មានខ្សែភាពយន្តមួយទៀតធ្វើឱ្យនាងទីផ្សារខ្ពស់ក្នុងឆ្នាំ២០១៤ គឺរឿង ដំរីមរកត បានថតចប់រួចរាល់ហើយ។

២ នី មុនីនាថ ជាតារាសម្ដែងគេចាត់ថានៅតែមានទីផ្សារខ្ពស់ដដែលក្នុងឆ្នាំ២០១៤។ មានទីផ្សារដោយសារតែនាងបានថតសម្ដែងខ្សែភាពយន្តជាច្រើនក្នុងឆ្នាំនេះមានដូចជារឿង ព្រលឹង៧ថ្ងៃរបស់ផលិតកម្ម Rick Kids Media ។ ក្រៅតែរឿងដុំមួយនេះ កញ្ញានៅមានខ្សែភាពយន្តភាគពីរទៀតត្រៀមដាក់បញ្ចាំងលើកញ្ចក់ទូរទស្សន៍នាពេលខាងមុខគឺរឿង កំលោះស្រុកស្រែញ៉ែក្រមុំឡប់ និងរឿង បញ្ជីស្នេហ៍កម្មអតីតជាតិ។

៣ ឌី សូនីតា ក៏មានឈ្មោះបោះសំឡេងខ្លាំងក្នុងឆ្នាំ ២០១៤ នេះ ដែរ។ មានឈ្មោះបោះសំឡេងក៏ព្រោះតែនាងបានសម្ដែងខ្សែភាពយន្តមួយរបស់ផលិតកម្ម Rock គឺរឿង why។ អ្វីធ្វើឱ្យទស្សនិកជនចាប់អារម្មណ៍ និងកត់សម្គាល់គឺនាងហ៊ានសម្ដែងឈុតស្រើបស្រាល។ ក្រៅតែពីខ្សែភាពយន្តនេះកញ្ញា ឌី សូនីតា នៅមានខ្សែភាពយន្តជាច្រើនទៀតត្រៀមចេញជាបន្តបន្ទាប់។

៤ ភិន សុដាលីស តារាសម្ដែងមានឪពុកជាចាងហ្វាងផលិតកម្មរូបនេះក៏មានទីផ្សារខ្ពស់មិនចាញ់តារាដទៃទៀតប៉ុន្មានដែរក្នុងឆ្នាំ២០១៤។ នាងបានបង្ហាញខ្សែភាពយន្តបន្តបន្ទាប់មានទាំងចាក់ផ្សាយហើយ និងកំពុងត្រៀមដាក់បញ្ចាំង។ ខ្សែភាពយន្តទាំងនោះមានដូចជា ទឹកចិត្តប្រពន្ធ រឿង ឱកូនសម្លាញ់ និងរឿងដុំ អាព្រឿងងាប់ហើយ ត្រៀមដាក់បញ្ចាំងចុងឆ្នាំនេះ។

៥ សុខ សោម៉ាវត្តី ក្រៅតែពីមានឈ្មោះបោះសំឡេងក្នុងនាមជាពិធីការិនីរបស់ស្ថានីយទូរទស្សន៍ បាយ័ន នាងក៏មានទីផ្សារសម្ដែងខ្ពស់ផងដែរក្នុងឆ្នាំ២០១៤ បើទោះជារៀបការហើយមានកូនមួយក្ដី។ ខ្សែភាពយន្តរបស់នាងត្រៀមចេញចុងឆ្នាំនេះមានដូចជារឿង កំណប់ឪខ្ញុំរបស់ Mega Film និង

រឿង ក្រឡអីហ្នឹងវគ្គ២ របស់ផលិតកម្ម LD Picture។ ក្រៅតែពីខ្សែភាពយន្តទាំងពីររឿងខាងលើ សុខ សោម៉ាវត្តី នៅមានសកម្មភាពក្នុងសិល្បៈផ្សេងៗទៀតធ្វើឱ្យនាងមានទីផ្សារខ្ពស់នាឆ្នាំ២០១៤។

៦ នៅ សុនីតា រឿង គំនុំអតីតជាតិ កំពុងចាក់ផ្សារនៅស្ថានីយទូរទស្សន៍ CTN បានធ្វើឱ្យតារាសម្ដែង និងជាតារាម៉ូដែលរូបនេះមានទីផ្សារខ្ពស់មិនចាញ់តារាផ្សេងទៀតប៉ុន្មានទេក្នុងឆ្នាំ២០១៤។ ក្រៅតែពីការថតខ្សែភាពយន្តការបង្ហាញវត្តមានជាច្រើនក្នុងកម្មវិធីផ្សេងៗក្នុងសិល្បៈធ្វើឱ្យនាងកាន់តែមានទីផ្សារខ្ពស់។

៧ សារ៉ាយ សក្ខណា បើទោះជាធ្លាប់ប្រកាសឈប់ពីសិល្បៈទៅរស់នៅជាមួយប្ដីនៅអាមេរិកហើយក្ដីនាងនៅតែមានវត្តមាននៅក្នុងវិស័យភាពយន្តតាមរយៈការបង្ហាញវត្តមានក្នុងខ្សែភាពយន្តនានា។ ការបង្ហាញវត្តមានជាបន្តបន្ទាប់ក្នុងវិស័យភាពយន្តធ្វើតារារូបនេះនៅតែមានទីផ្សារខ្ពស់ដដែលក្នុងឆ្នាំ២០១៤។ ខ្សែភាពយន្តពីររឿងគេជឿជាក់ថាធ្វើឱ្យ សក្ខណា នៅតែមានទីផ្សារខ្ពស់គឺ រឿង បងស្រលាញ់អូន សម្ដែងជាមួយតួថៃ និងរឿង ក្រឡអីហ្នឹងវគ្គ២ របស់ផលិតកម្ម LD Picture។

៨ ជីជី ពិធីការិនីស្រស់ស្អាតរបស់ CTN ក៏មានទីផ្សារសម្ដែងខ្ពស់មិនចាញ់តារាស្រីទាំង ៧ដួងខាងលើនោះទេ។ ខ្សែភាពយន្តបានចាក់រួចរាល់ក្នុងឆ្នាំ២០១៤ មានដូចជា អាបពាក់មួកសុវត្ថិភាពវគ្គ២ និងរឿង អាចារ្យបីសាសន៍ របស់ផលិតកម្ម Rock ធ្វើឱ្យទីផ្សារកញ្ញាខ្ពស់ដដែល។