តារាខ្មែរ ៤ រូបឡើងតុលាការក្នុងឆ្នាំ ២០១៤ នេះ

2014-11-04 12:30:13
ចំនួនមតិ 0 | ចំនួនចែករំលែក 0

ចន្លោះមិនឃើញ

បើគិតមកដល់ចុងឆ្នាំ ២០១៤ នេះ យ៉ាងហោចណាស់ មានតារា ៤ ដួងហើយ បានឡើងតុលាការ។ រឿងរ៉ាវមួយចំនួន ពាក់ព័ន្ធជីវិតឯកជនរបស់ពូកគេប៉ុណ្ណោះ ស្របដែលបញ្ហាខ្លះទៀត បានបាចសាចភាពរង្គោះរង្គើ ប៉ះពាល់វិស័យសិល្បៈទាំងមួលតែម្ដង។ ខាងក្រោមនេះ ជាតារាទាំង ៤ ដួង ដែលធ្លាប់ឡើងតុលាការ៖

១. ឌីជេ ឡាយអិន៖ ត្រូវសាលាដំបូងរាជធានីភ្នំពេញកោះហៅ ឲ្យចូលបំភ្លឺកាលពីព្រឹកថ្ងៃទី ១៣ ខែ តុលា ឆ្នាំ ២០១៤ បន្ទាប់ពីភរិយារបស់លោក បានដាក់ពាក្យបណ្ដឹងសុំលែងលះ ទោះបីជាបានរួមរស់ជាមួយគ្នារហូតមានកូន ៣ នាក់ទៅហើយក្ដី។ ក្នុងពាក្យបណ្ដឹងបានបន្ថែមទៀតថា ភរិយារបស់ ឡាយអិន សម្រេចប្ដឹងលែងរូបលោក ព្រោះអស់មនោសញ្ចេតនា ជាមួយស្វាមីរូបនេះហើយ មិនសង្ឃឹមថា អាចស្តាមនោសញ្ចេតនាឡើងវិញបាននោះទេ ។

នៅមិនទាន់ដឹងថា តុលាការនឹងសម្រេច យ៉ាងណានោះទេ ព្រោះស្ថិតនៅក្នុងដំណាក់កាលសម្រុះសម្រួលគ្នាប៉ុណ្ណោះ។ ទោះបីជាយ៉ាងណា តាមជំហរភាគីទាំងពីរសុទ្ធសឹងតែចង់បានកូនមកចិញ្ចឹមដូចគ្នា។

២. តារាចម្រៀង នាង អូ រស្មី៖ កាលពីព្រឹកថ្ងៃទី ២១ ខែសីហា ២០១៤ សាលាដំបូងរាជធានីភ្នំពេញ បានបើកសវនាការកាត់ទោសតារាចម្រៀង អូ រស្មី ពាក់ព័ន្ធនឹងករណីជួញដូរព្រហ្មចារីក្មេងស្រីវ័យ ១៤ ឆ្នាំ ឲ្យទៅបុរសជាអាណិកជនអ្នកមានទ្រព្យម្នាក់ តបតាមបណ្ដឹងម្ដាយរបស់ក្មេងស្រីរងគ្រោះកាលពីរសៀលថ្ងៃទី ១៨ ខែមករា ២០១៤។

តំណាងអយ្យការចោទប្រកាន់នាងលើបទល្មើសចំនួន២ គឺបទ «សញ្ចរកម្ម មានស្ថានទម្ងន់ទោស» និងពីបទ «នាំចេញដោយមានគោលដៅ» តាមច្បាប់ស្ដីពីការបង្ក្រាបអំពើជួញដូរមនុស្ស និង ការកេងប្រវ័ញ្ចផ្លូវភេទ»។ ទោះបីជាយ៉ាងណា ចៅក្រមជំនុំជម្រះ បានប្រកាសលើកសវនាការសំណុំរឿងនេះទៅពេលក្រោយទៀត ដោយមិនបានកំណត់កាលបរិច្ឆេទជាក់លាក់ថា ពេលណាទេ។

៣. តារាសម្ដែង និង ពិធីការិនី ដួង ហ្សូរីដា៖ ត្រូវសាលារាជធានីភ្នំពេញបានប្រកាសសាលក្រមស្ថាពរ ដោយកំបាំងមុខ កាលពីថ្ងៃទី ៦ ខែ កុម្ភៈ ឆ្នាំ២០១៤ លើបណ្ដឹងចោទប្រកាន់ពីបទ បរិហារកេរ្តិ៍ជាសាធារណៈ ដែលមានអ្នកស្រី តាន់ ធារ៉ា ជាដើមបណ្ដឹង តាំងពីឆ្នាំ២០១៣មកម្ល៉េះ។

កាលនោះ ដួង ហ្សូរីដា ហាក់មិនភ្ញាក់ផ្អើល ឬរួញរាចំពោះសំណងនោះឡើយ ពោលគឺតារាសម្ដែងល្បីឈ្មោះរូបនេះត្រៀមខ្លួន និងលុយសម្រាប់បង់ជំងឺចិត្ត នៅពេលចាញ់ក្ដីក្នុងតុលាការ។

៤. តារាចម្រៀង ណុប បាយ៉ារិទ្ធ៖ ត្រូវបានតំណាងអយ្យការអមសាលាដំបូងរាជធានីភ្នំពេញ ធ្វើការចោទប្រកាន់ជាផ្លូវការពីបទគំរាមកំហែង និងបរិហារកេរ្តិ៍ លើបុរសម្នាក់ឈ្មោះ ចេង រស្មីសេរីវង្ស កាលពីថ្ងៃទី១៦ ខែមករា ២០១៤ ។ រឿងនេះបានចាប់ផ្ដើមឡើងតាំងពីចុងឆ្នាំ ២០១៣ មកម៉េ្លះ បន្ទាប់ពីដើមចោទ បានជួលសម្អាងការរបស់តារាចម្រៀងខាងលើ ហើយក៏មានភាពស្រពិចស្រពិលមួយចំនួនពាក់ព័ន្ធនឹងលុយកាក់។

ប៉ុន្តែ រឿងក្ដីក្ដាំនេះ បានបញ្ចប់ទៅវិញ បន្ទាប់ពីមានការចរចាគ្នា ក្រៅប្រពន្ធតុលាការ និង ឈានដល់ការយោគយល់គ្នា ដោយភាគីដើមចោទយល់ព្រមដកពាក្យបណ្ដឹង។