Ryan Giggs៖ "ខ្ញុំគ្មានថ្ងៃទៅដឹកនាំក្រុម Liverpool ទេ”

2016-10-11 13:07:47
ចំនួនមតិ 0 | ចំនួនចែករំលែក 0

ចន្លោះមិនឃើញ

Ryan Giggs វីរបុរសក្រុមបិសាចក្រហម Manchester United បានលើកឡើងថា ខ្លួនធំដឹងក្ដីឡើងគឺមិនចូលចិត្តក្រុម Liverpool តែម្ដង ហើយទោះជាអនាគតយ៉ាងណា ក៏លោកគ្មានថ្ងៃទៅដឹកនាំក្រុមហង្សក្រហមនោះដែរ។

Ryan Giggs វីរបុរសក្រុមបិសាចក្រហម Manchester United

Man Utd នឹងត្រូវធ្វើដំណើរទៅកីឡដ្ឋាន Anfield ដើម្បីប៉ះក្រុមគូប្រជែងធំ Liverpool ក្នុងការប្រកួត Premier League សប្ដាហ៍ទី៨ នៅថ្ងៃច័ន្ទសប្ដាហ៍ក្រោយ ខណៈដែលក្រុមទាំង២នេះ គឺជាគូប្រជែងគ្នាស្លាប់រស់ច្រើនទសវត្សរ៍មកហើយ។

Giggs ដែលធ្លាប់លេងឲ្យក្រុម Man Utd សរុប៤៨ប្រកួត ពេលប៉ះ Liverpool បាននិយាយនៅទីក្រុង Cardiff កាលថ្ងៃអាទិត្យថា៖ "ខ្ញុំចាប់ផ្ដើមធំឡើងគឺ មិនចូលចិត្តប្រជាជនមកពីទីក្រុង Liverpool តែម្ដង។ ខ្ញុំលេងឲ្យក្រុម Salford នៅ U-11 ហើយពេលនោះ ខ្ញុំតែងតែលេងទល់ជាមួយក្រុមក្មេងៗមកពីទីក្រុង Liverpool”។

Giggs (ឆ្វេង) ធ្វើជាជំនួយការអ្នកចាត់ការ Louis Van Gaal រដូវកាលមុន

ពេលអ្នកសារព័ត៌មានសួរថា តើថ្ងៃអនាគតអាចនឹងទៅដឹកនាំ Liverpool ទេ? អតីតខ្សែបម្រើ Man Utd រូបនេះ បានឆ្លើយថា៖ "អត់ទេ! មិនអាចទេ បើខ្ញុំដឹកនាំ ខ្ញុំនឹងបាត់បង់មិត្តភ័ក្ដិច្រើន។ Liverpool គឺជាក្រុមគូប្រជែងធំសម្រាប់ខ្ញុំ ព្រោះកាលខ្ញុំនៅតូច ពួកគេឈ្នះពានគ្រប់យ៉ាង ហើយពួកគេតែងតែប្រជែងជាមួយយើងជានិច្ច។ ខ្ញុំជឿថា បើអ្នកសួរ Steven Gerrard រឿងទៅដឹកនាំ Man Utd គាត់ក៏ប្រហែលជាឆ្លើយដូចនេះដែរ។ ខ្ញុំតែងតែជាអ្នកគាំទ្រក្រុមបិសាចក្រហម Man Utd”៕