យុវជនមួយក្រុមសុំជំនួយដើម្បីទៅចូលរួមប្រកួតមនុស្សយន្តនៅតៃវ៉ាន់ដើមខែធ្នូខាងមុខនេះ
- 2016-11-10 03:44:16
- ចំនួនមតិ 0 | ចំនួនចែករំលែក 0
យុវជនមួយក្រុមសុំជំនួយដើម្បីទៅចូលរួមប្រកួតមនុស្សយន្តនៅតៃវ៉ាន់ដើមខែធ្នូខាងមុខនេះ
ចន្លោះមិនឃើញ
សិស្សសាលាអន្តរជាតិឡៃហ្គ័រមួយក្រុមតំណាងឲ្យប្រទសកម្ពុជា នឹងទៅចូលរួមប្រកួតមនុស្សយន្តក្នុងកម្មវិធី VEX នៅតៃវ៉ាន់ ចាប់ពីថ្ងៃទី២ ដល់ទី៣ ខែធ្នូ ឆ្នាំ២០១៦ខាងមុខនេះ។ ក្រុមរបស់ពួកគេមានឈ្មោះថា «បត់ជីតស៊ូ» គឺជាក្រុមដំបូងរបស់កម្ពុជា ដែលនឹងចូលរួមការប្រកួតនេះ ដោយត្រូវប៉ះជាមួយបណ្តាប្រទេសផ្សេងៗមានដូចជា ជប៉ុន កូរ៉េ និងសិង្ហបុរី។
ដោយហេតុថាការទៅចូលរួមប្រកួតនៅក្រៅប្រទេសជាលក្ខណៈអន្តរជាតិ ត្រូវការចំណាយថវិកាច្រើន ដូចជាការចំណាយលើសំបុត្រយន្តហោះ កន្លែងស្នាក់នៅ អាហារ និងការចុះឈ្មោះ ដូច្នេះក្រុម «បត់ជីតស៊ូ» មានការខ្វះខាតថវិកា ត្រូវការជំនួយពីសប្បុរសជន និងក្រុមហ៊ុននានា។
ក្រុមនេះមានបទពិសោធន៍ផ្នែកមនុស្សយន្តខ្លះហើយ ប៉ុន្តែលើកនេះពួកគេឈានជើងចូលរួមប្រកួតជាលក្ខណៈអន្តរជាតិ ពួកគេបានតាំងចិត្តខ្ពស់ដើម្បីត្រៀមក្នុងការប្រកួតនេះ ដោយខិតខំប្រើបទពិសោធន៍ថ្មីសម្រាប់ស្រាវជ្រាវបន្ថែមលើការសិក្សាវិស្វកម្ម ។ មិនតែប៉ុណ្ណោះពួកគេមានក្តីរំភើបដែលបានចូលរួមការប្រកួតជាលើកដំបូងដែលតំណាងឲ្យក្រុមកម្ពុជា ហើយសង្ឃឹមថាការប្រកួតនេះនឹងជួយជំរុញដល់ក្រុមសិស្សានុសិស្សវ័យក្មេងផ្សេងៗទៀត ដើម្បីធ្វើអ្វីមួយដែលពួកគេចូលចិត្តបំផុត។
ប៉ុន្មានឆ្នាំមុនសិស្សមួយចំនួននៃសាលាអន្តរជាតិឡៃហ្គ័ ក៏ធ្លាប់ចូលរួមការប្រកួតមនុស្សយន្តដែរ ដែលពេលនោះពួកគេបានទៅចូលរួមនៅប្រទេសសិង្ហបុរី ក្នុងកម្មវិធី First Lego League ដែលជាកម្មវិធីប្រកួតប្រជែង មនុស្សយន្តកម្រិតដំបូង។ សិស្សានុសិស្សបានចូលរួមប្រកួតប្រជែងបីឆ្នាំជាប់ៗគ្នាមកហើយ ដែលជាលទ្ធផលពួកគេទទួលបានពានរង្វាន់សិស្សឆ្នើម និងរង្វាន់លេខពីរផ្នែកគំនិតច្នៃប្រឌិត (ក្នុងឆ្នាំ២០១៤ និង ២០១៦)។នោះ គឺការប្រកួតប្រជែងមនុស្សយន្តកម្រិតខ្ពស់។
សម្រាប់ប្រិយមិត្តដែលមានបំណងចូលរួមវិភាគទានបាន សូមចូលទៅគេហទំព័រ donation.ligerlearning.org។ ចំពោះក្រុមហ៊ុន សហគ្រាសផ្សេងៗក៏អាចចូលរួមបរិច្ចាគបានដែរ ដោយលោកអ្នកនឹងទទួលបានមកវិញនូវការផ្សព្វផ្សាយពាណិជ្ជកម្មតាមរយៈគេហទំព័ររបស់ក្រុម «បត់ជីតស៊ូ» និងតាមរយៈសម្លៀកបំពាក់។
ពួកគេរីករាយចំពោះការចូលរួមគាំទ្ររបស់លោកអ្នក! សម្រាប់ព័ត៌មានបន្ថែមសូមទាក់ទងទៅ អ៊ីម៉ែល ៖ vexrobotics@ligercambodia.org៕