ស៊ឹម ប៊ុនស៊្រន់ ៖ ប្រដាល់ក្នុងទ្រុង MMA គ្មានអ្នកអើពើ មិនដឹងពេលណាមានសង្វៀនវិញ

2017-01-04 01:33:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងប្រដាល់ក្នុងទ្រុង MMA ស៊ឹម ប៊ុនស៊្រន់ បង្ហាញអារម្មណ៍ថា បច្ចុប្បន្នកីឡាប្រដាល់ក្បាច់គុនចម្រុះក្នុងទ្រុងហាក់គ្មានអ្នកអើពើសោះ ហើយក៏មិនដឹងពេលណាមានសង្វៀនក្នុងស្រុកវិញដែរ។

សឹម ប៊ុនស្រ៊ន់

ការលើកឡើងរបស់អ្នកលេងគុនចម្រុះរបស់ ស៊ឹម ប៊ុនស៊្រន់ បានចេញមុខនៅសង្វៀនបរទេស បន្ទាប់ពីសង្វៀនប្រដាល់ក្នុងទ្រុងក្នុងស្រុកខ្មែរត្រូវបាត់សូន្យរយៈពេលជិត២ឆ្នាំហើយ។ រូបគេត្អូញត្អែរថា ធ្វើបែបនេះ នឹងអាចឲ្យកីឡាប្រដាល់ MMA មិនរីកចម្រើនទៅមុខទេនៅក្នុងប្រទេសកម្ពុជា។ កូនខ្មែរមានឈាមជ័រជាអ្នកតស៊ូ បើមានកម្មវិធីប្រកួតធំៗ ក្នុងស្រុកញឹកញាប់ មិនយូរមិនឆាប់កីឡាករកម្ពុជា នឹងអាចមានមុខលើឆាកអន្តរជាតិធំៗ ដូចជា UFC ជាដើម។

និយាយពីប្រាក់ចំណូលវិញ ប៊ុនស៊្រន់ ទម្លាយថា រកបានតិចមែនទែនជួលកាលមួយឆ្នាំបានឡើងប្រកួតម្ដង ហើយអ្នកឈ្នះការប្រកួតអាចបាន៣ពាន់ដុល្លារអាមេរិក ស្របពេលអ្នកចាញ់បានត្រឹម២ពាន់ដុល្លារអាមេរិកសម្រាប់ការប្រកួតលក្ខណៈអន្តរជាតិ។ ទោះបីជាសង្វៀនក្នុងទ្រុងត្រូវបានផ្អាកដំណើរមួយរយៈពេលហើយក្តី ក៏កីឡាករប្រដាល់កម្ពុជាមួយចំនួននៅតែអាចលេចមុខប្រកួតក្នុងព្រឹត្តិការណ៍អន្តរជាតិជាបន្តបន្ទាប់រហូតដល់សព្វថ្ងៃ។

រូបគេជាជើងខ្លាំងប្រដាល់ក្នុងទ្រុងមួយរូប ដែលបានចេញទៅប្រកួតនៅលើឆាកអន្តរជាតិជាច្រើនដង។ ប៉ុន្តែមួយប្រកួតចុងក្រោយរបស់គេបានរងរបួសឆ្អឹងប្រអប់ដៃ កំឡុងពេលប្រកួតនៅប្រទេសហ្វីលីពីនជាមួយកីឡាករចិន ដែលឈ្នះដោយពិន្ទុ។ របួសដៃនេះរូបគេត្រូវសម្រាករយៈពេលជិត១ឆ្នាំទើបជាសះស្បើយអាចឡើងប្រកួតវិញបាន៕