បណ្ឌិត ជេត ជាលី បង្ហាញតួនាទីសំខាន់៣ ដែលសាកលវិទ្យាល័យមួយត្រូវមាន

2017-02-15 23:16:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាការពិតណាស់សាកលវិទ្យាល័យគឺជាគ្រឹះស្ថានឧត្ដមសិក្សាសម្រាប់ផ្ដល់ចំណេះដឹងទៅកាន់និស្សិត ដែលប្រាថ្នាចង់បានការសិក្សាអោយស៊ីជម្រៅទៅលើជំនាញដែលខ្លួនស្រលាញ់ចូលចិត្ត ព្រមទាំងជាស្ពានមួយសម្រាប់ចំលងទៅអាជីពការងារនាពេលអនាគតទៀតផង។ យ៉ាងណាមិញ បណ្ឌិត ជេត ជាលី ក៍បានលើកយកនូវតួនាទីសំខាន់៣ ដែលសាកលវិទ្យាល័យមួយត្រូវមានដូចជា៖

បណ្ឌិត ជេត ជាលី សកលវិទ្យាធិការនៃសកលវិទ្យាល័យភូមិន្ទភ្នំពេញ

**១ ការបង្រៀន**

សកលវិទ្យាធិការនៃសាកលវិទ្យាល័យភូមិន្ទភ្នំពេញរូបនេះ បានបញ្ជាក់ថា សាកលវិទ្យាល័យគឺជាទីកន្លែងដែលប្រមូលផ្តុំទៅដោយគ្រូបង្រៀន សាស្ត្រាចារ្យ និស្សិត និង អ្នកស្រាវជ្រាវជាដើម។ នេះជាតួនាទីដ៏សំខាន់បំផុត និង មិនអាចខ្វះបាន ព្រោះថាការបង្រៀន គឺជាការផ្ទេរចំណេះដឹងពីមនុស្សម្នាក់ ទៅមនុស្សម្នាក់ ពីជំនាន់មួយទៅជំនាន់មួយទៀត ដើម្បីធានាអោយមានស្ថេរភាពនៃចំណេះដឹងដល់មនុស្សជំនាន់ក្រោយ។

២ ការស្រាវជ្រាវ

លោកបានបន្តថា ការសិក្សាស្រាវជ្រាវគឺជាការបង្ខិតចំណេះដឹងមនុស្សអោយទៅមុខជានិច្ច ដូចជាការតាមអោយទាន់នូវបច្ចេកវិទ្យាទំនើបៗ ការដោះស្រាយបញ្ហាដោយប្រើវិធីថ្មីៗ និង រហ័ស។ ចំណុចនេះគឺមានសារៈសំខាន់ណាស់ ព្រោះវានឹងបម្រើអោយប្រយោជន៍របស់មនុស្សជាតិទាំងមូល។ ពិសេសសាកលវិទ្យាល័យ រឺ វិទ្យាស្ថានស្រាវជ្រាវនៅប្រទេសអភិវឌ្ឍន៍ តែងទទួលបានមូលនិធិយ៉ាងច្រើនសម្រាប់ផ្គត់ផ្គង់ដល់ការស្រាវជ្រាវ ដោយមូលនិធិទាំងនោះបានមកពីថវិកាជាតិ ក្រុមហ៊ុនបច្ចេកវិទ្យាធំៗ និង ជំនួយសប្បុរសធម៌ របស់ប្រជាជនក្នុងសហគមន៍នានា។

៣ ការបម្រើសហគមន៍

សាកលវិទ្យាល័យគឺជាទីកន្លែងដែលគេពិគ្រោះយោបល់ រកដំណោះស្រាយផ្សេងៗជូនដល់សហគមន៍ រឺ សង្គមជាតិ។ មួយវិញទៀត នៅពេលមានបញ្ហា រឺ ព្រឹត្តិការណ៍អ្វីសំខាន់កើតឡើង សាស្ត្រាចារ្យ រឺ អ្នកជំនាញនៃសាកលវិទ្យាល័យគឺមានតួនាទី ក្នុងការចេញមុខបកស្រាយ រឺ ពន្យល់ទៅកាន់សហគមន៍របស់ខ្លួន ចំពោះរឿងអស់ទាំងនោះ ដោយផ្អែកតាមលក្ខណៈបច្ចេកទេស។

ឆ្លើយតបនឹងចំណុចនេះដែរ លោក បណ្ឌិត ជេត ជាលី បានប្រាប់អោយដឹងថា បច្ចុប្បន្នលោកក៏កំពុងពិភាក្សាយោបល់ជាមួយថ្នាក់ដឹកនាំសកលវិទ្យាល័យទាំងមូលផងដែរ ដើម្បីធ្វើយ៉ាងណាពង្រឹងទាំងផ្នែកគុណភាព និង ផ្នែកស្រាវជ្រាវរបស់សាកលវិទ្យាល័យអោយមានភាពល្អប្រសើរឡើង។