តារាល្បី ៩ដួង ចូលសិល្បៈតាំងពីក្មេង និងមានកេរ្តិ៍ឈ្មោះដល់សព្វថ្ងៃ
- 2017-02-22 23:11:00
- ចំនួនមតិ 0 | ចំនួនចែករំលែក 0
តារាល្បី ៩ដួង ចូលសិល្បៈតាំងពីក្មេង និងមានកេរ្តិ៍ឈ្មោះដល់សព្វថ្ងៃ
ចន្លោះមិនឃើញ
សិល្បករជាច្រើនដែលមានដុងនិស្ស័យ ឬ ទំនោរចិត្តស្រលាញ់សិល្បៈតាំងពីកុមារភាពមក អ្នកខ្លះទទួលបានកេរ្តិ៍ឈ្មោះបោះសំឡេងរហូតមកដល់បច្ចុប្បន្ន ខ្លះទៀតបោះបង់ក៏មាន។ ថ្ងៃនេះ Sabay នឹងលើកយកតារា ៩រូបដែលចូលសិល្បៈតាំងពីក្មេង ហើយមានកេរ្តិ៍ឈ្មោះមកដល់សព្វថ្ងៃ។
តាមដានខាងក្រោមទាំងអស់គ្នា ថាមានតារាណាខ្លះ៖
១. ឱកសុគន្ធ កញ្ញា មានទំនោរនិស្ស័យស្រលាញ់សិល្បៈតាំងពីអាយុ ១០ឆ្នាំមកម្ល៉េះ។ ក្នុងនោះនាងក៏ធ្លាប់បានចូលប្រលងចម្រៀងរបស់ស្ថានីយទូរទស្សន៍ក្នុងស្រុក២ផងដែរ មានស្ថានីយទូរទស្សន៍ជាតិកម្ពុជា និងស្ថានីយទូរទស្សន៍ខេមរភូមិន្ទប៉ុស្ត៍លេខ៥ ប៉ុន្តែមិនបានទទួលផ្លែផ្កាទេពេលនោះ។
សម្រាប់បទដំបូង ដែលទទួលបាននូវការគាំទ្រខ្លាំង គឺបទ "រឿងស្នេហាខ្ញុំ "សប្បាយណាស់ឬពេលឃើញស្រីយំ" "ស្នាមស្នេហ៍សមុទ្ររាម"។
២.ដាញ់ ម៉ូនីកា កើតនៅថ្ងៃទី៤ ខែវិច្ឆិកា ឆ្នាំ ១៩៨៦ នៅរាជធានីភ្នំពេញ។ នាងបានបញ្ចប់ការសិក្សានៅសកលវិទ្យាល័យភូមិន្ទវិចិត្រសិល្បៈផ្នែករបាំបូរាណ។ សព្វថ្ងៃនាងជាតារាភាពយន្ត និងជាតួសម្ដែងខារ៉ាអូខេដ៏ល្បី។ នាងចូលសម្ដែងភាពយន្តដំបូងនៅអាយុ១៤ឆ្នាំគឺរឿង"កូនពស់កេងកង" នៅឆ្នាំ ២០០១។ សព្វថ្ងៃនាងចេញទៅរស់នៅតាមស្វាមីនៅប្រទេសអូស្រ្តាលីហើយ ប៉ុន្តែកេរ្តិ៍ឈ្មោះនាងនៅតែដក់ជាប់ក្នុងដួងចិត្តប្រិយមិត្តដដែល។
៣. នីកូ ធ្លាប់បង្ហាញខ្លួនតាមកញ្ចក់ទូរទស្សន៍តាំងពីអាយុ៣ឆ្នាំក្នុងកម្មវិធីទូរទស្សន៍ "ចៅពុទ្ធិកម្ជិល" ។ ក្នុងនោះក៏ធ្លាប់បញ្ចេញស្នាដៃសម្ដែងក្នុងរឿង "ភូមិគ្រឹះចម្លែក" តាំងពីលោកនៅតូចមកម្ល៉េះ។
៤. ទេព បូព្រឹក្ស ធ្លាប់បង្ហើបប្រាប់ Sabayថានាងចូលប្រលងចម្រៀងតាំងពីអាយុ ៩ឆ្នាំ តាមរយៈកម្មវិធីមួយ និងបានលុយ ១៦០ ០០០រៀលថែមទៀតផង។
៥. លី ច័ន្ទសីហា ចូលសិល្បៈតាំងពីអាយុ ៩ឆ្នាំ ដែលកាលនោះមហាជនស្គាល់នាងតាមរយៈរឿង "កូនកត្តញូ" របស់ផលិតកម្មខេមប្រូ បានបង្កភាពល្បីល្បាញយ៉ាងខ្លាំងក្នុងឆ្នាំ២០០២។ រឿងប្រភេទអប់រំសង្គមនិយាយពីការតស៊ូកម្សត់ស្រក់ទឹកភ្នែកនោះ បាននាំជីវិតកុមារីលី ច័ន្ទសីហា ក្លាយជាតារាមួយដួងរហូតដល់បច្ចុប្បន្ន។
៦. ដែលក្នុងរឿង "កត្តញូ" នេះក៏មានលេចមុខតារាសម្ដែងស្រី ឡោម លក្ខិណា ផងដែរ។ កាលនោះនាងសម្ដែងជាកូនអ្នកមាន តាមធ្វើបាបតួស្រី លី ច័ន្ទសីហា។
៧. ខេង រតនៈ ហៅ ព្រែក៖ បានចូលសិល្បៈនៅអាយុ ១២ ឆ្នាំ តាមរយៈនាយ ក្រឹម ដែលដំបូងបំផុតគឺ បានចូលរួមសម្ដែងរឿង “បញ្ញើក្អែក” របស់ផលិតកម្មហង្សមាស។ ក្រោយមករូបគេសម្ដែងខារ៉ាអូខេចម្រៀងរបស់លោក ព្រាប សុវត្ថិ រួមមានបទ “ភ្លេចសន្យាសាយណ្ហ” និង “ម្អមស្រែ” ជាដើម នៅអំឡុងឆ្នាំ២០០៦ និង រឿង"នេសាទក្រពើ" ដឹកនាំដោយឯកឧត្ដម ម៉ៅ អាយុទ្ធ រដ្ឋលេខាធិការក្រសួងព័ត៌មាន។ បច្ចុប្បន្នកូនប្រុស យាយ យ៉យ រូបនេះ កំពុងកាន់ការងារជាពិធីករនៅទូរទស្សន៍បាយ័ន និង My TV ហើយកំពុងសិក្សាឆ្នាំទី ៤ ជំនាញច្បាប់។
៨. សុខ មេសា ហៅ ចឺម៖ ចូលប្រឡូកសិល្បៈនៅចុងឆ្នាំ ២០១០ ក្នុងវ័យ ១២ ឆ្នាំ តាមរយៈ នាយ ក្រូច ត្រូវជាឪពុកមា។ ផលិតករកម្មវិធីរបស់ CTN សុវណ្ណ រិទ្ធី ហៅតា វ៉ិចទ័រ បានផ្ដល់ឱកាសបណ្ដុះបណ្ដាល និង សម្ដែងដល់អតីតក្មេងប្រុសអ្នកទូលក្រសាំងលក់ក្នុងភូមិរូបនេះ ដូចសមាជិកផ្សេងទៀតដែរ ទោះបីជាជាគេមិនមែនជាបេក្ខភាពប្រលងជាប់កម្មវិធី "មហាកំប្លែង" យ៉ាងណាក្ដី។ ផលិតករកម្មវិធីខាងលើ ធ្លាប់ពោលសរសេរថា កូនប្រុសអ្នកភ្នំស្រង់រូបនេះ មានទេពកោសល្យកំប្លែងមិនធម្មតា។
៩. វណ្ណ នីឡា៖ នរណាក៏ដឹងថា នាងជាកូនស្រីសំណព្វចិត្តរបស់ផលិតករប្រចាំ CTN សុវណ្ណ រិទ្ធី ហៅតា វ៉ិចទ័រ។ តាមរយៈឪពុកជាផលិតករស្រាប់ យុវតីរូបនេះ បានចូលរួមសម្ដែងជាមួយក្រុមកំប្លែងរបស់នាយ ពែកមី តាំងពីអាយុ ១១ ឆ្នាំ។ លោក សុវណ្ណរិទ្ធី បានទទួលស្គាល់កូនស្រីសំណព្វចិត្តរូបនេះ មិនសូវពូកែកំប្លែងនោះទេ ប៉ុន្តែ ពូកែសម្រក់ទឹកភ្នែករហូតអ្នកទៅទស្សនាការសម្ដែងផ្ទាល់ ដាក់នាមជាតារាទឹកភ្នែកទៀតផង។