មជ្ឈមណ្ឌលទិន្នន័យអ៊ីនធឺណិតថ្មីមួយទៀតបើកនៅកម្ពុជា
- 2017-02-26 06:25:56
- ចំនួនមតិ 0 | ចំនួនចែករំលែក 0
មជ្ឈមណ្ឌលទិន្នន័យអ៊ីនធឺណិតថ្មីមួយទៀតបើកនៅកម្ពុជា
ចន្លោះមិនឃើញ
ក្រុមហ៊ុនថ្មីមួយទៀតបានបើកមជ្ឈមណ្ឌលទិន្នន័យអ៊ីនធឺណិត (IDC) និងសេវាកម្ម Cloud ដល់សហគ្រាសអាជីវកម្មនៅក្នុងប្រទេសកម្ពុជា ដើម្បីផ្តល់ដំណោះស្រាយការរក្សាទុកទិន្នន័យលើអ៊ីនធឺណិត។
ការបង្កើតមជ្ឈមណ្ឌលទិន្នន័យអ៊ីនធឺណិត (IDC) និងសេវាកម្ម Cloud ដើម្បីឆ្លើយតបការអភិវឌ្ឍអាជីវកម្មនៅក្នុងប្រទេសកម្ពុជា។ នេះបើតាមការបញ្ជាក់របស់លោក Heath Shen អគ្គនាយកក្រុមហ៊ុន GCX។
លោក Heath Shen អគ្គនាយកក្រុមហ៊ុន GCX ឲ្យដឹងថា កំណើនសេដ្ឋកិច្ច និងការរីកលូតលាស់នៃអាជីវកម្មនៅក្នុងប្រទេសកម្ពុជា តម្រូវឲ្យមានហេដ្ឋារចនាសម្ព័ន្ធបច្ចេកវិទ្យា ដើម្បីគាំទ្រដល់ការអភិវឌ្ឍនេះ។
មជ្ឈមណ្ឌលទិន្នន័យអ៊ីនធឺណិត និងការប្រើប្រាស់បច្ចេកវិទ្យា Cloud ផ្តល់សុវត្ថិភាពនិងភាពងាយស្រួលដើម្បីរក្សាទុកឯកសារ និងកម្មវិធីជាដើម នៅលើប្រព័ន្ធអ៊ីនធឺណិត ដែលបច្ចេកវិទ្យានេះ អនុញ្ញាតឲ្យអ្នកប្រើប្រាស់ ចូលបើកមើល ទាញយក និងប្រើប្រាស់ឯកសារគ្រប់ទីកន្លែង គ្រប់ពេលវេលាតាមរយៈឧបករណ៍ផ្សេងៗ។ ការអភិវឌ្ឍបច្ចេកវិទ្យានេះមានតែក្រុមហ៊ុនបច្ចេកវិទ្យាធំៗ ដែលអាចវិនិយោគលើហេដ្ឋារចនាសម្ព័ន្ធស្មុគស្មាញនេះបាន។
អគ្គនាយក អគ្គនាយកក្រុមហ៊ុន GCX បានបញ្ជាក់ថា មជ្ឈមណ្ឌលទិន្នន័យអ៊ីនធឺណិត (IDC) និងសេវាកម្ម Cloud ដែលបើកដំណើរការនេះ បានបំពេញតាមស្តង់ដារសុវត្ថិភាពអន្តរជាតិដ៏តឹងរ៉ឹងបំផុត ដោយអនុវត្តទៅតាមវិទ្យាស្ថានស្តង់ដារអាមេរិកកាំង (ANSI) និងស្តង់ដារឧស្សាហកម្មទូរគមនាគមន៍ (TIA)។
អគ្គនាយករូបនេះមិនបានបញ្ជាក់ពីទំហំនៃការវិនិយោគសម្រាប់ការបង្កើតមជ្ឈមណ្ឌលទិន្នន័យអ៊ីនធឺណិត (IDC) និងសេវាកម្ម Cloud ។ យ៉ាងណានៅថ្ងៃអនាគត ក្រុមហ៊ុនគ្រោងពង្រីកអាជីវកម្មមជ្ឈមណ្ឌលទិន្នន័យនៅកម្ពុជា និងការកសាងមជ្ឈមណ្ឌលទិន្នន័យទី ២ នៅភ្នំពេញ និងមជ្ឈមណ្ឌលទិន្នន័យជាច្រើនទៀតនៅក្នុងទីក្រុងធំៗរបស់ប្រទេសកម្ពុជា ដើម្បីបម្រើឲ្យតម្រូវការរបស់អតិថិជន។