របៀបចិញ្ចឹមចង្រិតប្រើដើមទុនតិច តែទទួលបានចំណូលខ្ពស់ដល់ពាន់ដុល្លារ

2017-03-23 02:40:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជីវកម្មចិញ្ចឹមចង្រិត គឺជាមុខរបរថ្មីមួយដែលអាចធ្វើអោយលោកអ្នកទទួលបានប្រាក់ចំណូលខ្ទង់ពាន់ដុល្លារក្នុងមួយខែៗទៀតផង ប្រសិនបើលោកអ្នកយកចិត្តទុកដាក់ក្នុងការចិញ្ចឹមអោយបានត្រឹមត្រូវទៅតាមលក្ខណៈបច្ចេកទេស។ ខាងក្រោមនេះ គឺជាវិធីសាស្ត្រចិញ្ចឹមចង្រិតដោយប្រើដើមទុនតិច តែទទួលបានផលចំណូលខ្ពស់សម្រាប់លោកអ្នកយកទៅអនុវត្ត។

រូបភាពពី លោក ញឿក ភារុម្យ

បើតាមការលើកឡើងរបស់លោក ញឿក ភារុម្យ ជាម្ចាស់កសិដ្ឋានចិញ្ចឹមចង្រិតវ័យក្មេងមួយរូប នៅខេត្តតាកែវបានឲ្យដឹងថា ការចិញ្ចឹមចង្រិតគឺទាមទារនូវការថែទាំឲ្យបានដិតដល់ ព្រោះបើមិនអីចឹងទេ វាងាយនឹងងាប់ខ្លាំងណាស់។ លោកបន្តថាមានកត្តាបីយ៉ាង ដើម្បីធ្វើអោយការចិញ្ចឹមចង្រិតទទួលបានជោគជ័យ៖

១ បច្ចេកទេសចិញ្ចឹម

ជាការពិតណាស់ ការសាងសង់ទ្រុងរបស់ចង្រិតគឺត្រូវតែធ្វើឡើងតាមស្តង់ដាពិតប្រាកដ។ ប្រការនេះគឺដើម្បីអោយមានភាពងាយស្រួលក្នុងការកំណត់បរិមាណ និង វាយតម្លៃពីទម្ងន់សរុបរបស់វា។ មិនតែប៉ុណ្ណោះ ត្រូវរៀបចំសំបុកចង្រិតអោយបានស្អាតល្អ បើមិនដូចនោះទេ វាអាចបណ្តាលអោយចង្រិតងាយឈឺ និង មិនអាចធំធាត់បានល្អនោះឡើយ។ លើសពីនេះទៀត គេត្រូវផ្ដល់អោយពួកវា នូវទឹកស្អាត និង ចំណីដែលមានជីវជាតិចិញ្ចឹមល្អៗ។ ជាពិសេសគេក៏អាចបន្ថែមស្លឹកបាស រឺ បន្លែនានាអោយវាស៊ីផងដែរ ទើបធ្វើអោយចង្រិតកាន់តែរីកធំធាត់បានលឿន ព្រមទាំងមានសុខភាពល្អ។

២ បរិស្ថាននៃទ្រុង

ជាទូទៅចង្រិតចូលចិត្តរស់នៅទីកន្លែងដែលមានសីតុណ្ហភាពទាបជាង៤០អង្សាសេ ហើយចំណុចល្អបំផុតគឺចន្លោះពី ២៥ ទៅ ៣០ អង្សាសេ។ មួយវិញទៀត គេអាចរៀបចំជាខ្សាច់ និង បាញ់ទឹកពេលថ្ងៃត្រង់ដើម្បីរក្សាសីតុណ្ហភាពអោយទ្រុងរបស់វានៅត្រជាក់បានយូរ។ បន្ថែមពីនេះ គេគួរប្រក់ដំបូលដែលអាចកាត់បន្ថយចំហាយក្ដៅចាំងចុះក្រោមពីពន្លឺព្រះអាទិត្យ ព្រោះថាការធ្វើបែបនេះ វាអាចកាត់បន្ថយសីតុណ្ហភាពមួយផ្នែកក្នុងរោងចង្រិតបាន។

៣ ពូជចង្រិត

ការជ្រើសរើសពូជចង្រិតយកទៅចិញ្ចឹម ក៏ជារឿងសំខាន់ណាស់ដែរ។ គេមិនត្រូវមើលរំលងចំណុចមួយនេះនោះទេ ព្រោះថាការជ្រើសរើសពូជខុសអាចនាំអោយលោកអ្នកបរាជ័យក្នុងអាជីវកម្មបាន។ លោក ភារុម្យ បានបញ្ជាក់ថា ពូជចង្រិតខ្លះគឺមិនត្រូវនឹងតម្រូវការរបស់ទីផ្សារនោះទេ ហើយពូជខ្លះទៀតគឺងាយនឹងមានជំងឺ ខ្លះទៀតងាយចាញ់អាកាសធាតុ និង ពុំមានទំហំខ្លួនធំនោះឡើយ។

ដូចនេះគេត្រូវជ្រើសរើសយកពូជសុទ្ធដែលល្អ និង ធន់ជាមួយអាកាសធាតុ។ លោកបានប្រាប់ថា ចំពោះកសិដ្ឋានរបស់លោកផ្ទាល់ គឺបាននាំចូលពងចង្រិត២ប្រភេទពីប្រទេសថៃ ដើម្បីយកមកចិញ្ចឹម។ ទី១គឺពូជចង្រិតខ្មៅ និង ទី២គឺពូជចង្រិតក្រហម ដែលពេលធំពេញវ័យទៅ វាមានប្រវែងដងខ្លួនប្រមាណ៣សង់ទីម៉ែត្រ។ ចំណែកឯតម្លៃវិញគឺក្នុងពងមួយចានថ្លៃ ២,៥ ដុល្លារ ហើយពេលចិញ្ចឹមរយៈពេល ៤៥ ថ្ងៃទើបពួកវាធំពេញវ័យអាចចាប់លក់បាន។ សម្រាប់តម្លៃទីផ្សាយក្នុងស្រុក គឺអាចលក់បាន ២,៥ ដុល្លារក្នុងមួយគីឡូក្រាម ហើយបន្ទាប់ពីគេយកវាទៅបំពងរួច នោះទទួលបានតម្លៃប្រមាណ ១ ដុល្លារក្នុងមួយកំប៉ុងអង្ករ៕