បុរសឥណ្ឌូណេស៊ី ត្រូវពស់ថ្លាន់លេបទាំងមូលគួរឲ្យភ្ញាក់ផ្អើល
- 2017-03-29 00:46:08
- ចំនួនមតិ 0 | ចំនួនចែករំលែក 0
បុរសឥណ្ឌូណេស៊ី ត្រូវពស់ថ្លាន់លេបទាំងមូលគួរឲ្យភ្ញាក់ផ្អើល
ចន្លោះមិនឃើញ
ពីមុនយើងធ្លាប់តែឃើញពស់លេបមនុស្សក្នុងខ្សែភាពយន្ត តែពេលនេះវាបានលេបមនុស្សទាំងមូលពិតមែនដែលជារឿងមិនគួរឲ្យជឿ និងអាណិតបំផុត។
ជនរងគ្រោះត្រូវពស់ថ្លាន់លេប ជាបុរសជនជាតិឥណ្ឌូណេស៊ីមានឈ្មោះ Akbar Salubiro អាយុ ២៥ឆ្នាំ បានបាត់ខ្លួនកាលពីយប់ថ្ងៃអាទិត្យ បន្ទាប់ពីចេញទៅប្រមូលផលដូងប្រេងក្នុងភូមិដាច់ស្រយាលមួយនៅលើកោះ Sulawesi ខាងលិច ប្រទេសឥណ្ឌូណេស៊ី។
ក្រោយជនរងគ្រោះមិនឃើញមកផ្ទះ មិត្តភ័ក្ដិ និងសាច់ញាតិរបស់គាត់បានប្រទះឃើញពស់ថ្លាន់ធំមួយក្បាល កំពុងលូនក្រាបនៅខាងក្រៅគុម្ពោតព្រៃនាល្ងាចថ្ងៃច័ន្ទ និងគិតវាប្រហែលជាលេបអ្វីម្យ៉ាង។
បន្ទាប់ពីមានការសង្ស័យ គេបាននាំអ្នកភូមិទៅមើល រួចសម្រេចចាប់ពស់វះពោះតែម្ដង។ ក្រោយវះពស់ប្រវែង ៧ម៉ែត្រនេះគេឃើញសាកសពមនុស្សនៅខាងក្នុងទើបមានការផ្អើលឆោឡោឡើង។
អ្នកភូមិម្នាក់និយាយថា ដំបូង Akbar បានចេញពីផ្ទះទៅប្រមូលផលដូងប្រេង តែមិនឃើញត្រឡប់មកផ្ទះវិញគេក៏ប្រមូលគ្នាតាមស្វែងរក។ ចំណែកប្រពន្ធជនរងគ្រោះនាង Munu មិនបានស្ថិតនៅកន្លែងកើតហេតុទេ តែទើបឃើញរូបភាព និងវីដេអូតាមព័ត៌មាន។
អ្នកភូមិម្នាក់ទៀតអះអាងថា "នៅយប់ថ្ងៃកើតហេតុ មានគេឮសំឡេងមនុស្សយំចេញពីចម្ការដូងប្រេងតែមិនចាប់អារម្មណ៍។" បើតាមអ្នកជំនាញ ពស់ដ៏សាហាវនេះបានរឹតខ្ទប់ឲ្យជនរងគ្រោះថប់ដង្ហើមសិន ទើបលេបទាំងមូលតាមក្រោយ៕