ទីបំផុត ស្រីស្អាត ណា សាឌី ប្រាប់ថា នាងសម្រេចបានក្ដីបំណង១ហើយ!

2017-04-19 07:40:16
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីហក់ចូលមកប្រឡូកសិល្បៈអស់រយៈពេលប្រមាណជាជិត២ឆ្នាំ ស្រីស្អាត ណា សាឌី បានប្រាប់ឲ្យដឹងថា មកទល់នឹងពេលនេះ នាងបានសម្រេចក្ដីប្រាថ្នារបស់នាងមួយហើយ គឺអាជីពជាពិធីការិនីទូរទស្សន៍ ដោយបច្ចុប្បន្នកំពុងកាន់ការនេះនៅទូរទស្សន៍បាយ័ន។

ណា សាឌី ប្រាប់ថា ដើមឡើយ អាជីពជាពិធីការិនីទូរទស្សន៍គឺបំណងប្រាថ្នាធំមួយក្នុងសិល្បៈរបស់នាង ហើយជាលទ្ធផល គឺនាងបានសម្រេចមែន ក្រោយពីចូលសិល្បៈអំឡុងឆ្នាំ ២០១៥ តាមរយៈការប្រកួតហ្វ្រេស៊ី។ ការងារនេះ ដំបូងឡើយ នាងបានចូលបម្រើការងារនៅទូរទស្សន៍ BTV ដែលជាបុត្រសម្ព័ន្ធរបស់ទូរទស្សន៍បាយ័ន ដោយកាន់ផ្នែកព័ត៌មាន។

បើទោះអាជីពជាពិធីការិនី ជាអ្វីដែលនាងប្រាថ្នាក៏ពិតមែន ប៉ុន្តែជំនាញផ្នែកព័ត៌មាន មិនមែនជាចំណង់ចំណូលចិត្តនាងទេ គឺពិធីការិនីផ្នែកសិល្បៈឯណោះ ទើបជាមុខជំនាញដែលនាងប្រាថ្នា។ ទីបំផុត នាងក៏សម្រេចបានបំណងប្រាថ្នានេះទៀត បន្ទាប់ពីថ្នាក់លើមើលឃើញទេពកោសល្យ ហើយបានផ្លាស់ប្ដូរតំណែងនាង។

“ពិធីការិនីព័ត៌មាន ខ្ញុំអត់សូវស្រឡាញ់ ឥឡូវបានមកផ្នែកសិល្បៈ គឺត្រូវចិត្តតែម្ដង ព្រោះទំនោររបស់ខ្ញុំ គឺចូលចិត្តនិយាយលេងបែបសប្បាយៗ ត្រូវនឹងសិល្បៈអីចឹង អត់ត្រូវបែបព័ត៌មានទេ ឥឡូវបានហើយ ក្រោយខ្ញុំខំហាត់ពុតខ្លួនឯងមក។ ខ្ញុំសប្បាយចិត្ត ព្រោះតាំងដើមមកខ្ញុំចង់ធ្វើផ្នែកសិល្បៈនេះណាស់"។ សាឌី ថ្លែង។

ស្រីស្អាតវ័យ ២២ឆ្នាំខាងលើ បានផ្លាស់ពីពិធីការិនីផ្នែកព័ត៌មាននៅ BTV មកទូរទស្សន៍បាយ័នវិញ នៅដើមខែកុម្ភៈឆ្នាំ ២០១៧នេះ។ នាងត្រូវបានថ្នាក់លើ ចាត់ឲ្យកាន់កម្មវិធី "តន្ត្រីខារ៉ាបាវ" រៀងរាល់ថ្ងៃសៅរ៍វេលាម៉ោង ៦ ដល់ ៨យប់ ជាកម្មវិធីផ្សាយផ្ទាល់។ ក្រៅពីនេះ នាងក៏ទទួលបានការងារខាងក្រៅច្រើនដែរ ទាំងពិធីការិនីតាមតន្ត្រីនានា រួមទាំងការងារសម្ដែងផង។

សាឌី ដែលចូលសិល្បៈតាមរយៈការប្រឡងហ្វ្រេស៊ី ជំនាន់ទី១៤ ប្រាប់ថា មកទល់ពេលនេះ នាងសម្ដែងបាន២រឿង មានទី១ "ព្យុះជីវិតចិត្តអ្នកលេង" និងរឿងទី២ "មន្តស្នេហ៍លេខា" ជាប្រភេទរឿងប្រែក្លាយពីប្រលោមលោក បច្ចុប្បន្នកំពុងដំណើរការថត ក្នុងនោះ នាងសម្ដែងជាតួអង្គឈ្មោះ "អេនណា"។

ស្រីស្អាតរូបនេះ អះអាងថា បន្ទាប់រឿង "មន្តស្នេហ៍លេខា" ចាក់បញ្ចាំង នាងសង្ឃឹមថា កេរ្តិ៍នាងនឹងកាន់តែឡើងខ្ពស់មួយកម្រិតទៀត ត្បិតថា នេះជាសាច់រឿងល្បីមួយរបស់ប្រលោមលោក មុនពេលយកមកថតជាវីដេអូភាគទូរទស្សន៍ និងកុនវិញ៕

អត្ថបទ៖ ស៊ុនហ៊ួត