អង្ករកម្ពុជានៅតែអាចនាំចេញទៅសហគមន៍អឺរ៉ុប ដោយសាររកមិនឃើញជាតិគីមី
- 2017-04-20 01:10:56
- ចំនួនមតិ 0 | ចំនួនចែករំលែក 0
អង្ករកម្ពុជានៅតែអាចនាំចេញទៅសហគមន៍អឺរ៉ុប ដោយសាររកមិនឃើញជាតិគីមី
ចន្លោះមិនឃើញ
(ភ្នំពេញ) ៖ នៅក្រៅកិច្ចប្រជុំបូកសរុបលទ្ធផលការងារពាក់ព័ន្ធបទល្មើសនេសាទលើផ្ទៃបឹងទន្លេសាប លោក វេង សាខុនរដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានឲ្យដឹងថា តាមការស្រាវជ្រាវថ្មីរបស់សហភាពអឺរ៉ុប អង្កររបស់កម្ពុជា ពុំមានសារធាតុគីមីនោះទេ គឺកម្ពុជាមានលទ្ធភាពក្នុងការនាំអង្ករចេញ ទៅសហភាពអឺរ៉ុបដដែលពុំមានបញ្ហាអ្វីនោះទេ។
សូមបញ្ជាក់ថា កន្លងទៅថ្មីៗនេះ សហគមន៍អឺរ៉ុប បានព្រមានឈប់ទិញអង្ករកម្ពុជា ប្រសិនបើអង្ករកម្ពុជាមានជាតិគីមី។កាព្រមានគឺស្របពេលរបាយការណ៍ដែលបង្ហាញថា ៣ខែដើមឆ្នាំ២០១៧ការនាំចេញអង្ករមានការកើនឡើងតិចតួចតែប៉ុណ្ណោះ។
សហគមន៍អឺរ៉ុបបានដាក់កំហិតជាថ្មីក្នុងការរឹតបន្តឹងគុណភាព និងសុវត្ថិភាពអង្ករដែលនាំចូលពីបណ្ដាប្រទេសនានាបន្ទាប់ពីកន្លងមករកឃើញថា អង្ករនាំចូលមួយចំនួនមានផ្ទុកជាតិពុល Tricyclazole លើសកំណត់ហើយគ្រោងនឹងអនុវត្តចាប់ពីខែកក្កដាឆ្នាំនេះតទៅ ។
អ្នកជំនាញវិស័យស្រូវអង្ករកម្ពុជាយល់ថា វាពុំមានឧបសគ្គ ឬផលប៉ះពាល់អ្វីសម្រាប់វិស័យស្រូវអង្កររបស់កម្ពុជាទេ តែកម្ពុជាគួរប្រុងប្រយ័ត្នឲ្យបានខ្ពស់ទៅលើការប្រើប្រាស់ថ្នាក់គីមី ។
សហគមន៍អឺរ៉ុបបានទិញអង្ករពីកម្ពុជាប្រហែលជិតពាក់កណ្តាលនៃ បរិមាណអង្ករដែលកម្ពុជានាំចេញសរុបក្នុងមួយឆ្នាំៗ ។ ដូច្នេះ នៅពេលសហគមន៍អឺរ៉ុបរឹតបន្តឹងនូវសារធាតុ Tricyclazoleនេះ កម្ពុជាត្រូវយកចិត្តទុកដាក់ ជំរុញអប់រំណែនាំ និងបង្ការទប់ស្កាត់កុំឲ្យមានបញ្ហាបែបនេះកើតឡើងចំពោះវិស័យស្រូវ អង្ករកម្ពុជា ដែលជាឧបសគ្គក្នុងការនាំអង្ករចេញទៅសហគមន៍អឺរ៉ុប ។
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្ម ធ្លាប់បានបញ្ជាក់ថា “ឆ្លើយតបនឹងការដាក់កំហិតថ្មីក្នុងការរឹតបន្តឹងគុណភាព ពិសេសសុវត្ថិភាពអង្ករនាំចូលទៅកាន់សហគមន៍អឺរ៉ុប មិនឲ្យមានសំណល់ជាតិពុលTricyclazole ក្នុងកម្រិតកំណត់អតិបរិមារលើសពី០,០១ក្រាមក្នុង១គីឡូក្រាមអង្ករ (០,០១ pmm) ដែលពីមុនមានដល់ទៅ ១pmm ឬ១មីលីក្រាមក្នុង១គីឡូក្រាមនោះ អគ្គនាយកដ្ឋានកសិកម្ម ដែលជាសេនាធិការបច្ចេកទេសរបស់ក្រសួងកសិកម្ម រុក្ខាប្រមាញ់ និងនេសាទ បានចាត់ការបង្កើតក្រុមការងារបន្ទាន់មួយដើម្បីសិក្សា និងលើកវិធានការបន្ទាន់ក្នុងការបញ្ចៀសបញ្ហា ក៏ដូចជាការពារទីផ្សារអង្កររបស់កសិករកម្ពុជានៅសហគមន៍អឺរ៉ុប (ទិសដៅនាំចេញអង្ករកម្ពុជាដ៏ធំទាំង៨ ក្នុងចំណោមទិសដៅធំបំផុតទាំង១០)”៕