ឡានកញ្ចាស់ប្រធានាធិបតីក្របំផុត មានគេសុំទិញ១លានដុល្លារ

2014-11-08 18:40:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីរបស់ប្រទេសអ៊ុយរុយហ្គាយ លោក Jose Mujica បាននិយាយថា មានគេស្នើសុំទិញឡានម៉ាក Volkswagen Beetle ផលិតឆ្នាំ១៩៨៧ របស់លោក ក្នុងតម្លៃ ១លានដុល្លារ។

ប្រធានាធិបតីអ៊ុយរុយហ្គាយ Jose Mujica និងភរិយា នៅក្នុងឡាន Volkswagen Beetle

បុរសដែលមានរហ័សនាមថា "ប្រធានាធិបតីក្រជាងគេលើលោក" បានប្រាប់សារព័ត៌មានមួយថា មេដឹកនាំជនជាតិអារ៉ាប់ម្នាក់បានដាក់សំណើ ១លានដុល្លារ ទិញឡានកញ្ចាស់របស់លោក។ ទោះយ៉ាងណា លោកបាននិយាយថា នោះគ្រាន់ជាសំណើរបស់គេប៉ុណ្ណោះ ហើយលោកមិនគិតថាវាជារឿងសំខាន់ឡើយ។

កាលពីពេលថ្មីៗនេះ ឯកអគ្គរដ្ឋទូតម៉ិកស៊ីកូប្រចាំប្រទេសអ៊ុយរុយហ្គាយ ធ្លាប់បានស្នើទៅលោក Mujica ឲ្យដាក់ដេញថ្លៃឡាននោះនៅប្រទេសម៉ិកស៊ីកូ ហើយគេរំពឹងថាលោកអាចនឹងទទួលបានឡានទំនើបដល់ទៅ ១០គ្រឿងឯណោះជាថ្នូរនឹងឡានកញ្ចាស់របស់លោក។ នេះបើតាមការតាមការបង្ហាញរបស់អ្នកនាំពាក្យស្ថានទូតម៉ិកស៊ីកូម្នាក់។

ប្រធានាធិបតីទី ៤០របស់អ៊ុយរុយហ្គាយរូបនេះបានបញ្ជាក់ថា បើលោកទទួលបានមួយលានដុល្លារពីការលក់ឡាន លោកនឹងបរិច្ចាគលុយទាំងនោះជួយសាងសង់ផ្ទះដល់អ្នកគ្មានជម្រក។ ប្រសិនបើបានឡាន ១០គ្រឿងជាថ្នូរវិញ លោកនឹងផ្ដល់វាទៅឲ្យការិយាល័យសុខភាពសាធារណៈ ឬអ្នកធ្វើយុទ្ធនាការផ្សព្វផ្សាយរបស់លោក។

លោក Jose Mujica ប្រធានាធិបតីទី៤០ របស់ប្រទេសអ៊ុយរុយហ្គាយ

នៅពេលសួរថា ហេតុអ្វីបានជាមានគេចំណាយលុយយ៉ាងច្រើនទិញឡានដ៏តូចរបស់លោក? Mujica បាននិយាយថា "មនុស្សតែងតែចង់បានរបស់ប្លែកៗ យើងត្រូវការរបស់មួយដែលសំខាន់ទុកជានិមិត្តរូប។ វាជារបស់តូចតាចសម្រាប់ពិភពលោកមែន ប៉ុន្តែមានតម្លៃធំធេងសម្រាប់យើង"។ ប្រធានាធិបតីវ័យ ៧៩ឆ្នាំរូបនេះ ថែមទាំងបញ្ជាក់ទៀតថា លោកបានរក្សាទុករបស់ពីរគឺ ញញួរ និងប៉ែល ដែលបន្សល់ទុកពីឪពុករបស់លោក៕

ចុចអាន៖ ប្រើពេល៣២ឆ្នាំជីករូងថ្មទម្លុះភ្នំ សង្ស័យថាទុកនាំមាសចេញ

ចុចអាន៖ ចិត្តខ្លាំងមែន! គ្រាន់តែផាកពិន័យតិចតួច ចាក់សាំងដុតឡានចោល

ប្រែសម្រួល៖ គង់ វិសាល

ប្រភព៖ telegraph