សែនស្រងេះស្រងោច! ពេលដឹងប្រវត្តិផ្លូវដែកដ៏កម្សត់របស់កម្ពុជា

2017-05-23 04:30:32
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីផ្លូវដែក កម្ពុជាធ្លាប់មានតាំងពីសម័យអាណានិគមនិយមបារាំងមកម្ល៉េះ ហើយផ្លូវដែកទាំងពីរខ្សែរបស់កម្ពុជា ធ្លាប់ឆ្លងកាត់នូវការបំផ្លិចបំផ្លាញជាច្រើនលើកច្រើនសារ គួរឱ្យស្រណោះបំផុតក្នុងសម័យកាលប្រទេសត្រូវញាំញីដោយសង្គ្រាម ។ នេះបើតាមការឱ្យដឹងពី ឯកឧត្ដម លី បូរិន អនុរដ្ឋលេខាធិការ ក្រសួងសាធារណការ និងដឹកជញ្ជូន ទទួលបន្ទុកផ្លូវដែក ថ្លែងមកកាន់ Sabayក្នុងកិច្ចសម្ភាសន៍ពិសេសមួយ។

ឯកឧត្ដម លី បូរិន

ឯកឧត្ដម លី បូរិន បានឱ្យដឹងទៀតថា កម្ពុជាមានផ្លូវដែកពីរខ្សែ ខ្សែទី ១ ពីភ្នំពេញ ទៅព្រំដែនថៃ និងប៉ោយប៉ែត ប្រវែង ៣៨៦គីឡូម៉ែត្រ។ ផ្លូវដែកមួយខ្សែនេះ ត្រូវបានសាងសង់កំឡុងឆ្នាំ ១៩២៩ ទៅដល់ឆ្នាំ ១៩៤២ ដើម្បីធ្វើដំណើរចេញចូលជាមួយថៃ ហើយត្រូវប្រើរយៈពេលរយៈពេល ៣ ថ្ងៃក្នុងការធ្វើដំណើរ និង ដឹកទំនិញ។ ដូច្នេះក្នុងសម័យដែលបារាំង ត្រួតត្រាប្រទេសកម្ពុជា គឺបានបន្សល់ទុកផ្លូវដែកមួយខ្សែនេះ។

រហូតមក ក្នុងឆ្នាំ ១៩៦០ ក្រោយកម្ពុជាទទួលបានឯករាជ្យពីបារាំងក្នុងសម័យសង្គមរាស្ត្រនិយម ក្រោមព្រះរាជកិច្ចដឹកនាំប្រទេស ដោយព្រះបរមរតនកោដិ ព្រះបាទសម្ដេចនរោត្ដម សីហនុ ផ្លូវដែកនៅកម្ពុជា ត្រូវបានសាងសង់មួយខ្សែទៀត ដើម្បីបម្រើដល់ផលប្រយោជន៍ជាតិ និងសេដ្ឋកិច្ចជាតិ។ ផ្លូវដែកនោះ សាងសង់ពីភ្នំពេញរហូតដល់ កំពង់ផែក្រុងព្រះសីហនុ ប្រវែង ២៦៦គីឡូម៉ែត្រ។ ក្នុងនោះក៏ធ្លាប់មានមនុស្សមួយចំនួនយល់ច្រឡំថា សង់ក្នុងសម័យអាណានិគមនិយមបារាំង តែនេះជាស្នាមព្រះហស្តដ៏ថ្លៃថ្លា របស់ព្រះបរមរតនកោដិ នៃយើង។

តែគួរសោកស្ដាយយ៉ាងក្រៃលែង ប្រទេសធ្លាប់តែរស់ក្រោមដំបូលសន្តិភាព ភាពក្សេមក្សាន្ត ក៏ត្រូវបានបំផ្លាញក្នុងថ្ងៃ ១៨ មិនា ឆ្នាំ ១៩៧០ ក្រោមការធ្វើរដ្ឋប្រហារពី លន់ នល់ ពេលនោះហើយផ្លូវដែកកម្ពុជាក៏ត្រូវបានបំផ្លិចបំផ្លាញគួរឱ្យអាសូរ ក្រោមសន្ធឹកគ្រាប់បែករបស់អាមេរិក។ ផ្លូវដែក ដែលធ្លាប់តែឭសំឡេងគគ្រឹកគគ្រាក់ ប្រែជាស្ងាត់ជ្រងំ ក្រោយពេលប្រទេសកម្ពុជា ក៏ដូចជាជនរួមជាតិទាំងមូលកំពុងវឹកវរក្នុងភ្នក់ភ្លើងសង្គ្រាម។

ចុចអានអត្ថបទ៖ ថ្មីបំផុត! ប្រជាជនកម្ពុជានឹងអាចធ្វើដំណើរតាមផ្លូវដែក ទៅកាន់២៧ប្រទេស

មកដល់ឆ្នាំ ១៩៧៥ ក្នុងសម័យ ប៉ុល ពត ផ្លូវដែកទាំងពីរខ្សែនោះ នៅតែបន្តការខូចខាតកាន់តែខ្លាំង ក្រោមស្នាដៃដ៏ខ្មៅងងឹត របស់ខ្មែរក្រហម។ ព្រះអាទិត្យនៅរះ ក្ដីសង្ឃឹម នៅតែមាន រហូតមកដល់ឆ្នាំ ១៩៧៩ ក្រោយថ្ងៃរំដោះ ៧ មករា ផ្លូវដែកកម្ពុជាត្រូវបានជួសជុលឡើងវិញ ប៉ុន្តែគួរឱ្យស្រណោះផ្លូវដែកត្រូវបានបំផ្លាញស្ទើរទាំងស្រុង។ ខ្មែរក្រហម នៅតែបន្តលុកលុយ ចំណែកផ្លូវដែកកាន់តែបន្តខូចខាត ទោះបីខំស្រោចស្រង់មកវិញយ៉ាងណាក៏មិនឈ្នះដែរ។

សង្គ្រាម ត្រូវបានបញ្ចប់ស្រុកទេស ចាប់ផ្ដើមស្ងប់សុខវិញ ទើបមកដល់ឆ្នាំ ២០០៩ រាជរដ្ឋាភិបាលបានធ្វើកិច្ចព្រមព្រៀងសម្បទាន លើផ្លូវដែកនេះទៅឱ្យក្រុមហ៊ុនឯកជន ដោយរដ្ឋាភិបាលខ្ចីលុយពី ADB (ASIAN DEVELOPMENT BANK) ដើម្បីយកមកស្ដារអភិវឌ្ឍផ្លូវដែកឡើងវិញ។ កាលនោះក្រុមហ៊ុន សម្បទានិក Toll Holding Limited របស់ប្រទេសអូស្ត្រាលី បានដេញថ្លៃឈ្នះ ហើយក៏ចាប់ផ្ដើមធ្វើការដឹកជញ្ជូនទំនិញ រកប្រាក់ដើម្បីបង់ឱ្យរដ្ឋាភិបាល ហើយរដ្ឋបង់ទៅឱ្យ ADB វិញ។ នេះជាទិសដៅដំបូងបំផុត ក្រោយប្រទេសសាន្តត្រាណ។

អនុរដ្ឋលេខាធិការ ក្រសួងសាធារណការ បានបន្តទៀតថា គម្រោងចំណាយលើផ្លូវដែកនេះ ត្រូវចំណាយ ៧៣លានដុល្លារ បូកជាមួយប្រាក់បដិភាគរដ្ឋាភិបាលក្នុង១ឆ្នាំលើការជួសជុល។ តែក្រោយមកការចំណាយ បូករួមទាំងការស្ដារស្ពានចាស់ៗ ត្រូវបានកើនរហូតដល់ ១៤០លានដុល្លារ ដែលបន្ថែមដោយ ADB និងជំនួយឥតសំណងពី USAID។

ចុចអានអត្ថបទ៖ ថ្មីបំផុត! ផ្លូវល្បឿនលឿន ពីភ្នំពេញទៅខេត្តព្រះសីហនុត្រឹម ២ ម៉ោង នឹងបើកការដ្ឋាន

ប៉ុន្តែការជួសជុលបានតែពីភ្នំពេញទៅ កំពង់សោម និង ផ្លូវពីស៊ីសាផុន ទៅប៉ោយប៉ែត តែធ្វើមិនទាន់ដល់ព្រំដែនទេ បានត្រឹម ៤២គីឡូម៉ែត្រ ដោយសារអស់ថវិកា។ រហូតមកដល់ឆ្នាំ ២០១៥ រដ្ឋាភិបាលត្រូវចំណាយត្រឹមតែ ២០លានដុល្លារប៉ុណ្ណោះក្នុងមួយឆ្នាំរហូតមកដល់បច្ចុប្បន្ន លើការជួសជុលផ្លូវដែក៕

ទស្សនាប្រវត្តិលម្អិតផ្លូវដែកកម្ពុជា ក្រោមកិច្ចសម្ភាសន៍ពិសេសមួយ៖