Surface Pro ថ្មីទម្ងន់ត្រឹម ៧០០ ក្រាម តែសមត្ថភាពខ្លាំងកប់លូ!
- 2017-05-24 01:53:26
- ចំនួនមតិ 0 | ចំនួនចែករំលែក 0
Surface Pro ថ្មីទម្ងន់ត្រឹម ៧០០ ក្រាម តែសមត្ថភាពខ្លាំងកប់លូ!
ចន្លោះមិនឃើញ
ពីយប់មិញនេះ Microsoft បានបញ្ចេញកុំព្យូទ័រយួរដៃស៊េរីថ្មី Surface Pro ដែលជាការអាប់ដេតចេញពី Surface Pro 4។ ស៊េរីថ្មីនេះមានការរចនារូបរាងថ្មី, អេក្រង់ថ្មី, Hardware ថ្មី រួមទាំង Software ថ្មីដែលជួយឲ្យវាក្លាយជា Surface លេចធ្លោជាងគេ។
Surface Pro មានកម្រាស់ស្ដើងត្រឹម ៨,៥ ម.ម និង មានទម្ងន់តែ ៧៧១ ក្រាមប៉ុណ្ណោះ ដោយជាត្រកូល Surface ស្រាលជាងគេនាពេលបច្ចុប្បន្ន។ អេក្រង់មានទំហំ ១២,៣ អ៊ីញ ដោយមាន Resolution ២៧៣៦ x ១៨២៤ ជាប្រភេទ PixelSense Display ដែលមានដង់ស៊ីតេរូបភាពដល់ទៅ ២៦៧ ភីកសែលក្នុងមួយអ៊ីញ។
Surface ថ្មីនេះក៏នឹងមានបំពាក់ដោយ CPU ជំនាន់ទី ៧ របស់ Intel គឺ "Kaby Lake” ដោយរួមមានជាប្រភេទ Core m3, Core i5 និង Core i7។ ប្រភេទ Core m3 និង Core i5 គឺមិនមានប្រើកង្ហារឡើយ ហេតុនេះមានសំឡេងស្ងាត់ឈឹងតែម្ដងពេលធ្វើប្រតិបត្តិការ។
ម៉ូដែលប្រើ Core m3 មានបំពាក់ដោយ RAM ទំហំ ៤ GB, អង្គផ្ទុកទិន្នន័យប្រភេទ Flash Storage ទំហំ ១២៨ GB និង ប្រើក្រាហ្វិក Intel HD Graphics 615។
ចំណែកឯម៉ូដែល Core i5 មានជម្រើសចំនួនពីរដោយមានជាប្រភេទ RAM ទំហំ ៤ GB/អង្គផ្ទុកទិន្នន័យ ១២៨ GB និង ជាប្រភេទ RAM ទំហំ ៨ GB/អង្គផ្ទុកទិន្នន័យ ២៥៦ GB អមដោយក្រាហ្វិក Intel HD Graphics 620។
ឯម៉ូដែលប្រើ CPU Core i7 វិញមានជាបីជម្រើស ទីមួយ RAM ទំហំ ៨ GB/អង្គផ្ទុកទិន្នន័យ ២៥៦ GB, ទីពីរ RAM ទំហំ ១៦ GB/អង្គផ្ទុកទិន្នន័យ ៥១២ GB និង ទីបី RAM ទំហំ ១៦ GB/អង្គផ្ទុកទិន្នន័យ ១ TB អមដោយក្រាហ្វិក Intel Iris Plus Graphics 640។
លក្ខណៈសម្បត្តិដទៃទៀតរបស់ Surface ទាំងបីម៉ូដែលខាងលើរួមមានរន្ធ USB 3.0 ចំនួនមួយ, រន្ធ Mini DisplayPort ចំនួនមួយ, រន្ធ microSDXC និង រន្ធដោតកាសចំនួនមួយ។ នៅផ្នែកខាងក្រោយមានកាមេរ៉ាទំហំ ៨ MP និង ខាងមុខមានកាមេរ៉ាទំហំ ៥ MP ដែលអាចថតវីដេអូកម្រិត 1080p បានដូចគ្នា។
លើសពីនេះ Microsoft ក៏បានបង្ហាញពីប៊ិចថ្មី Surface Pen សម្រាប់ប្រើជាមួយ Surface Pro ដោយមានចំណុចសម្ពាធដល់ ៤០៩៦ ចំណុច ខ្លាំងជាងប៊ិចជំនាន់មុនដែលមានត្រឹមជាង ១០០០ ចំណុចប៉ុណ្ណោះ។ យ៉ាងណាក្ដីប៊ិចនេះមិនបាន Free ដូចមុនឡើយ ដោយត្រូវចំណាយ ៩៩ ដុល្លារ បន្ថែមប្រសិនបើចង់បាន។
Surface Pro នឹងមានលក់ជាផ្លូវការលើទីផ្សារបរទេសចាប់ពីថ្ងៃទី ១៥ ខែមិថុនា ដោយមានតម្លៃចាប់ពី ៧៩៩ ដុល្លារស៊េរីទាប រហូតដល់ស៊េរីខ្លាំងផុតលេខដែលមានតម្លៃ ២ ៦៩៩ ដុល្លារ៕