FFC បានប្រាក់ជាង ២០ម៉ឺនដុល្លារសម្រាប់រ៉ាប់រងសាលាតម្រង់ទិសបាល់ទាត់
- 2017-05-25 02:07:36
- ចំនួនមតិ 0 | ចំនួនចែករំលែក 0
FFC បានប្រាក់ជាង ២០ម៉ឺនដុល្លារសម្រាប់រ៉ាប់រងសាលាតម្រង់ទិសបាល់ទាត់
ចន្លោះមិនឃើញ
សហព័ន្ធកីឡាបាល់ទាត់កម្ពុជា FFC ទទួលថវិកាជាង ២០ម៉ឺនដុល្លារពីក្រុមហ៊ុន Cellcard សម្រាប់ទ្រទ្រង់ការសាងសង់ក៏ដូចជាអភិវឌ្ឍន៍លើគម្រោងសាលាតម្រង់ទិសកីឡាបាល់ទាត់ទូទាំងប្រទេស។
ក្នុងសន្និសីទកាសែតចុះអនុស្សរណៈយោគយល់គ្នារវាងក្រុមហ៊ុនទូរសព្ទខាងលើ និងសហព័ន្ធកីឡាបាល់ទាត់កម្ពុជាលោក អៀន វ៉ាតសុន នាយកប្រតិបត្តិនៃក្រុមហ៊ុនមួយនេះបានឲ្យដឹងថា ក្រុមហ៊ុនរបស់លោក និង FFC ចុះ MOU ចំនួនពីរឆ្នាំ។ ទឹកប្រាក់ជាង ២០ម៉ឺនដុល្លារនេះផ្ដល់ជូនសហព័ន្ធចាត់ចែងប្រើប្រាស់គ្រប់កម្មវិធីរបស់សាលាតម្រង់ទិសកីឡាទូទាំងប្រទេស។
ងាកទៅឯកឧត្ដម សៅ សុខា ប្រធានសហព័ន្ធកីឡាបាល់ទាត់កម្ពុជាបានលើកឡើងថា ការសាងសង់សាលាតម្រង់ទិសនេះក្នុងគោលដៅអភិវឌ្ឍន៍វិស័យបាល់ទាត់យូរអង្វែង។ សាលាបាល់ទាត់ នឹងកើតឡើងនៅតាមបណ្ដាខេត្ត-រាជធានីទូទាំងប្រទេស ហើយលោកសង្ឃឹមថា គម្រោងនេះនឹងទទួលបានផ្លែផ្កាជាទីគាប់ចិត្ត។
លោកបញ្ជាក់ថា គ្រប់កីឡាករ-កីឡាការិនី ដែលមានបំណងចង់ចូលហាត់ក្នុងសាលាបាល់ទាត់ទាំងអស់ គ្រាន់តែចំណាយថវិកាបន្តិចបន្តួចទៅលើសំលៀកបំពាក់ និងស្បែកជើង អាចចុះឈ្មោះចូលរៀនបានដោយសេរី។ ចំណែកសម្ភារៈ ហ្វឹកហាត់ ឬបាល់ទាត់ផ្សេងៗ សហព័ន្ធជាអ្នករ៉ាប់រង រួមទាំងគ្រូបង្វឹកល្អៗផងដែរ។
សូមបញ្ជាក់ថា គម្រោងសាងសង់សាលាតម្រង់ទិសកំណត់យកខេត្តស្វាយរៀងសាងសង់មុនគេ ដោយធ្វើការសម្ពោធនៅថ្ងៃទី២៦ ខែឧសភា ឆ្នាំ២០១៧ ស្អែកនេះវេលាម៉ោង ៤ល្ងាច៕