ឯកឧត្ដម លី បូរិន៖ កុំសង់ផ្ទះ ធ្វើគម្រោង នៅជិតផ្លូវដែកឱ្យសោះ បើមិនចង់មានបញ្ហាថ្ងៃក្រោយ

2017-05-29 06:23:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម លី បូរិន អនុរដ្ឋលេខាធិការក្រសួងសាធារណការ និងដឹកជញ្ជូន ទទួលបន្ទុកផ្នែកផ្លូវដែកនៅកម្ពុជាបានប្រាប់មកកាន់ Sabay ថា ប្រសិនបើចង់សង់ផ្ទះ ឬធ្វើគម្រោងផ្សេងៗ ត្រូវធ្វើឱ្យផុតពីគម្លាតចំណីផ្លូវដែក ឬផ្លូវធម្មតាក៏ដោយ ទើបមិនមានបញ្ហាទៅថ្ងៃក្រោយ។

អនុរដ្ឋលេខាធិការក្រសួងសាធារណការ បានឱ្យដឹងថា សម្រាប់ក្នុងក្រុង ត្រូវសង់ផ្ទះពីអ័ក្សសង្ខាងនៃផ្លូវប្រវែង ២៥ម៉ែត្រ។ ចំណែកក្រៅក្រុង ប្រវែង៣០ម៉ែត្រ ហើយចំពោះតំបន់ព្រៃភ្នំវិញ ប្រវែង១០០ម៉ែត្រពីផ្លូវដែក។ ឯកឧត្ដម លី បូរិន បន្តទៀតថា សេចក្ដីប្រកាសអំពីការប្រើប្រាស់ដីចំណីផ្លូវដែកនេះ មានតាំងពីឆ្នាំ ១៩៨៣ មកម្ល៉េះ ដោយចុះហត្ថលេខាដោយរដ្ឋមន្ត្រី ហើយសេចក្ដីប្រកាសនោះ គឺបានដកស្រង់ពីសម័យសង្គមរាស្ត្រនិយម។ បន្ទាប់មកក្នុងឆ្នាំ ១៩៨៩ មានចេញសេចក្ដីប្រកាសមួយទៀត ដែលចុះហត្ថលេខាដោយសម្ដេចនាយករដ្ឋមន្ត្រី ដោយធ្វើរួមគ្នាទាំងដីចំណីផ្លូវជាតិ និងផ្លូវដែក។

ឯកឧត្ដម លី បូរិន បន្ថែមទៀតថា រហូតមកដល់ឆ្នាំ ២០០៩ គឺចេញអនុក្រឹត្យតែម្ដង ស្ដីពីបញ្ហានេះ ដែលចុះហត្ថលេខាដោយសម្ដេចនាយករដ្ឋមន្ត្រី ស្ដីពីចំណីផ្លូវជាតិ និងផ្លូវដែកនេះ។ លោកប្រាប់ថា បច្ចុប្បន្ននេះ រដ្ឋាភិបាលកំពុងដោះស្រាយបញ្ហាប្រជាពលរដ្ឋ ដែលមានលំនៅឋាន ប្រវែង៣ម៉ែត្រកន្លះពីផ្លូវដែក ហើយក៏ដោះស្រាយរួចរាល់ខ្លះដែរ គឺនៅតែខាងប៉ោយប៉ែតប៉ុណ្ណោះ ដែលនៅតែតវ៉ាមិនទាន់ដោះស្រាយចប់សព្វគ្រប់។

ពាក់ព័ន្ធនឹងបញ្ហាផ្លូវដែកនៅប៉ោយប៉ែតនេះ ឯកឧត្ដម លី បូរិន បានបញ្ជាក់ថា មានប្រជាពលរដ្ឋប៉ះពាល់ចំនួន ៩៤០គ្រួសារ ប៉ុន្តែក្នុងនោះបានចាកចេញអស់ ៩៣៦គ្រួសារហើយ ដោយរដ្ឋាភិបាលបានផ្ដល់ដីឱ្យតែម្ដង ហើយក្នុងនោះ មានទឹក មានភ្លើង តភ្ជាប់ឱ្យគ្រប់គ្រាន់មិនពិបាកទេ។ ដោយឡែក ចំពោះប្រជាពលរដ្ឋដែលមានលំនៅឋាន ក្នុងដីចំណីផ្លូវ ដែលមិនស្ថិតក្នុងអ័ក្ស ៣ម៉ែត្រកន្លះ គឺអាចបន្តរស់នៅបាន ប៉ុន្តែរដ្ឋមិនអាចចេញប័ណ្ណកម្មសិទ្ធិឱ្យនោះទេ៕

ទស្សនាបទសម្ភាសន៍ជាមួយ ឯកឧត្ដម លី បូរិន៖