ផ្អើលអ្នកស្រុក! ដើមស្នួល រលើងដួលជិត១ឆ្នាំ ងើបឈរត្រង់ឡើងវិញឯកឯង (មានវីដេអូ)

2017-06-12 08:32:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើមស្នួលធំមួយដើមប្រវែងខ្ទង់៣០ម៉ែត្រ ត្រូវបានខ្យល់កន្ត្រាក់បោកបក់រលើងដួលដាច់ ឫសជិតមួយឆ្នាំទៅហើយ ប៉ុន្តែនៅពេលថ្មីៗនេះបានងើបឈរត្រង់ឡើងវិញដោយឯកឯង បង្កការភ្ញាក់ផ្អើលយ៉ាងខ្លាំងដល់អ្នកស្រុក។

បើតាមព្រឹទ្ធាចារ្យ ហម អេង អាយុ ៥៧ឆ្នាំ បានប្រាប់ថា ដើមស្នួលបុរាណនេះដួលរលំដាច់ឬសពីដីទាំងអស់កាលពីថ្ងៃទី១១ ខែធ្នូ ឆ្នាំ២០១៦។ ម្ចាស់ស្រែ និងព្រឹទ្ធាចារ្យក្នុងភូមិទាំងអស់បានមូលមតិគ្នា ធ្វើពិធីសូត្រមន្តបង្កក់ជូនដល់ម្ចាស់ស្រែដែលដើមឈ្នួលនេះបានដួលរលំលើផងដែរ។

សូមស្ដាប់លោក ហម អេង និយាយ៖

លុះដល់អំឡុងខែបីមុនចូលឆ្នាំខ្មែរទើបនាំគ្នាធ្វើពិធីម្ដងទៀត ដើម្បីសុំអារ ឬកាប់ចេញ កុំឲ្យទើសដល់ម្ចាស់ស្រែដែលជិតដល់រដូវកាលភ្ជួររាស់។ ដើមនិងមែកនានាត្រូវបានអ្នកភូមិយកទៅទុកប្រើប្រាស់តាមផ្ទះអស់ទៅហើយ នៅឡើយតែគល់ធំប្រវែងជាងមួយម៉ែត្រកន្លះប៉ុណ្ណោះ ដែលពុំទាន់យកចេញរួច។

រឿងចម្លែកបានកើតឡើងនៅថ្ងៃទី៥ ខែមិថុនា ឆ្នាំ២០១៧ នាព្រឹកព្រលឹម បុរសម្នាក់បានដឹកគោយកទៅចងដូចសព្វមួយដង ប៉ុន្តែបានប្រទះឃើញគល់ស្នួលងើបឈរត្រង់ឡើងវិញ និងមានដុះចេញកូនថ្មីប្រាំបីដើម ដោយពុំមាននរណាម្នាក់បានធ្វើអ្វីសោះ។ ដំណឹងធ្វើឲ្យមានការភ្ញាក់ផ្អើលនិង ល្បីតៗគ្នាដល់ប្រជាពលរដ្ឋនៅគ្រប់ទិសទីធ្វើដំណើរមកមើលនិងអុជធូបបន់ស្រន់សុំសេចក្ដីសុខយ៉ាងច្រើនកុះករមិនចេះដាច់។

អ្នកស្រុកបន្តលើកឡើងថា ពេលពួកគាត់បាត់របស់មានតម្លៃ ឬកូនចៅមានជំងឺតម្កាត់ ក៏នាំមកបន់ស្រន់ឃើញថាពិតជាពូកែសក្ដិសិទ្ធិមែន។ ដើមឈ្នួលបុរាណដែលត្រូវខ្យល់កន្ត្រាក់បោកផ្ដួល ហើយងើបឈរត្រង់ឡើងវិញនេះស្ថិតនៅក្នុងភូមិរកាពក ឃុំត្រពាំងក្រសាំង ស្រុកបាទី ខេត្តតាកែវ។