ម្រេចកំពតមានតម្រូវការខ្ពស់ ខណៈការផ្គត់ផ្គង់មិនទាន់តម្រូវការ

2017-06-16 03:19:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលកិត្តិនាម ម្រេចកំពតកំពុងល្បីរន្ទឺនៅជុំវិញពិភពលោក ដោយទទួលស្គាល់គុណភាពល្អដាច់គេលើម្រេចពីប្រទេសដទៃ ទន្ទឹមនឹងកំណើនតម្រូវការម្រេចកំពតក៏កាន់តែខ្ពស់ឡើង ប៉ុន្ដែការផ្គត់ផ្គង់មិនទាន់តាមតម្រូវការនៅឡើយ។ ផ្អែកតាមប្រធានសមាគមលើកកម្ពស់ម្រេចខេត្តកំពត បានឲ្យដឹងថា ការបញ្ជាទិញម្រេចកំពតឆ្នាំនេះ មានកើនឡើងរហូតដល់ ១០០តោន ឯណោះ។ លោកថា តម្រូវការ គឺកើនឡើងជារៀងរាល់ឆ្នាំ ស្របគ្នានឹងតម្លៃខ្ពស់ជាងគេផងដែរ។

លោក ងួន ឡាយ ជាកសិករដាំម្រេច និងប្រធានសមាគមលើកកម្ពស់ម្រេចខេត្តកំពត បានមានប្រសាសន៍ថា៖ « ការប្រមូលផលម្រេចនារដូវនេះនៅសល់តិចតួចប្រហែល ៥ភាគរយទៀត ហើយនឹងត្រូវបញ្ចប់ការប្រមូលផលនៅចុងខែមិថុនាខាងមុខនេះ « ហើយបើតាមការព្យាករ មានគេបញ្ជាទិញប្រមាណ ១០០តោន ប៉ុន្តែយើងអត់ទាន់ដឹងថា យើងចម្រាញ់ឲ្យត្រូវគុណភាពស្តង់ដារម្រេចកំពតឲ្យបានប៉ុន្មាននោះទេ»។

យ៉ាងណាមិញ តំណាងសមាគមខាងលើ បង្ហាញសុទិដ្ឋិនិយមថា ម្រេចកំពតឆ្នាំនេះ អាចផ្គត់ផ្គង់ទីផ្សារបានប្រមាណជា ៨០តោន ប៉ុណ្ណោះ ក្នុងនោះសមាគមនឹងនាំចេញទៅក្រៅប្រទេសប្រហែល ៧០ភាគយ និងសល់ប៉ុន្មានសម្រាប់តម្រូវការក្នុងស្រុក។

ដោយឡែក ម្រេចកំពតដែលទទួលស្គាល់ដោយពិភពលោក មានគុណភាពល្អដាច់គេ និងរក្សាតម្លៃខ្ពស់រហូតដល់ទៅ ៤២៥ ដុល្លារអាមេរិក ក្នុងមួយគីឡូក្រាម។ យោងតាមប្រសាសន៍ប្រធានសមាគមខាងលើ បានថ្លែងថា ទោះបីជាម្រេចកំពត មានតម្លៃថ្លៃយ៉ាងណាក៏ដោយ ក៏ប្រជាកសិករមិនទាន់អាចផលិតម្រេចគ្រប់គ្រាន់ ដើម្បីផ្គត់ផ្គង់តម្រូវការទីផ្សារបាននៅឡើយ ដោយសារផ្ទៃដីដាំដុះមានតិច ហើយការដាំដុះទៀតសោតក៏ធ្វើតាមលក្ខណៈប្រពៃណី។

ដោយឆ្លងតាមបទពិសោធកន្លងមក នៅឆ្នាំ ២០១៦ ម្រេចកំពតប្រមូលផលបាន ៧៣តោនហើយបានចម្រាញ់ឲ្យត្រូវគុណភាពស្ដង់ដារម្រេចកំពតបានប្រមាណតែ ៥៣ តោន ខណៈឆ្នាំ ២០១៥ ប្រមូលបាន ៦២ តោន និងសម្រេចគុណភាពផ្លូវបាន ៦០តោន។ លោក ងួន ឡាយ បញ្ជាក់ប្រាប់៕

អត្ថបទ៖ ស៊ិន សាវ៉េត