ស្រ្តីម្នាក់ប្តឹងកាស៊ីណូ ក្រោយឈ្នះរង្វាន់ធំ ៤៣លានដុល្លារ តែទទួលបានត្រឹម ២ដុល្លារ

2017-06-17 02:52:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីជនជាតិអាមេរិកម្នាក់ បានដាក់ពាក្យប្ដឹងកាស៊ីណូមួយកន្លែង បន្ទាប់ពីឈ្នះរង្វាន់ធំនៅលើម៉ាស៊ីនហ្គេម Slot Machine ចំនួន ៤៣ លានដុល្លារ ប៉ុន្តែត្រូវខាងកាស៊ីណូ ផ្ដល់រង្វាន់ជាអាហារពេលល្ងាច ដែលមានតម្លៃត្រឹមតែ ២,២៥ ដុល្លារជំនួសវិញ ដោយប្រាប់ថា វាគឺជាកំហុសបច្ចេកទេសប៉ុណ្ណោះ។

ស្ត្រីខាងលើមានឈ្មោះថា Katrina Bookman បានថតរូប Selfie ជាមួយម៉ាស៊ីនហ្គេម ដែលបង្ហាញសារជាភាសាអង់គ្លេសថា «printing cash ticket $42,949,672.76» នៅឯកាស៊ីណូ Resorts World Casino ស្ថិតក្នុងទីក្រុង New York កាលពីខែសីហា ឆ្នាំ២០១៦ កន្លងទៅ។ ផ្ទុយទៅវិញ អ្នកស្រី Katrina ត្រូវបានគេនាំចេញទៅខាងក្រៅ ហើយបានប្រាប់ថាអ្នកស្រីឈ្នះត្រឹមតែ ២,២៥ ដុល្លារប៉ុណ្ណោះ។

លោក Alan Ripka មេធាវីរបស់អ្នកស្រី Katrina បានប្រាប់ឲ្យដឹងថា អ្នកស្រីមានសិទ្ធិទទួលបានរង្វាន់ គ្រប់ចំនួនដែលបានបង្ហាញ។

បើតាមពាក្យបណ្ដឹងនៅតុលាការកំពូល Queens County Supreme Court បានឲ្យដឹងថា កណ្ដឹង សំឡេង និង ភ្លើងរបស់ម៉ាស៊ីនហ្គេម Slot Machine រួមទាំងសារនៅលើអេក្រង់ បានប្រាប់អ្នកស្រី Katrina ថាអ្នកស្រីបានឈ្នះរង្វាន់ធំ។

ទោះបីជាយ៉ាងណា អ្នកនាំពាក្យរបស់កាស៊ីណូ Resorts World Casino បាននិយាយថា នៅពេលនោះម៉ាស៊ីនពិតជាដំណើរការខុសប្រក្រតីមែន។ ជាមួយគ្នានេះដែរ គណៈកម្មការ New York State Gaming Commission ក៏បានឲ្យដឹងដែរថា ម៉ាស៊ីនហ្គេមនោះបានបង្ហាញសារថា «បញ្ហាមិនប្រក្រតី ចាត់ទុកជាមោឃៈចំពោះការសង និងលេងទាំងអស់»។

យ៉ាងណាមិញ លោកមេធាវី Ripka បានប្រាប់ប្រព័ន្ធផ្សព្វផ្សាយអាមេរិកថា នៅពេលនោះ ខាងកាស៊ីណូមិនបានឆ្លើយតប ទៅនឹងសំណើសុំការពន្យល់អំពីការខូច ឬដំណើរការមិនប្រក្រតីរបស់ម៉ាស៊ីនហ្គេមនោះទេ៕

ប្រភព៖ BBC ប្រែសម្រួល៖ សេង ឡុង