សេន ប៊ុនថេន លើកឡើងពីការប៉ះគ្នារវាង ឃីម ឌីម៉ា និង ឆៃ សារ៉ា វគ្គផ្ដាច់ព្រ័ត្រ

2017-06-21 06:42:38
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ល្បីឈ្មោះដែលទើបស្ពាយខ្សែក្រវាត់មកពីប្រទេសបារាំង សេន ប៊ុនថេន ថាសម្រាប់ការប្រកួតនៅវគ្គផ្ដាច់ព្រ័ត្រភេសជ្ជៈគោជល់របស់សង្វៀន CNC ចុងសប្ដាហ៍នេះ កីឡាករ ឆៃ សារ៉ា ពិបាកស៊ី ឃីម ឌីម៉ា ណាស់។

កីឡាករ សេន ប៊ុនថេន

កីឡាករ សេន ប៊ុនថេន លើកឡើងថា បើតាមមើលសមត្ថភាពកីឡាករ ឃីម ឌីម៉ា បច្ចុប្បន្ននេះគឺខ្លាំងពិបាកនិងកីឡាករដទៃទប់ទល់ណាស់។ ចំពោះការប្រកួតវគ្គផ្ដាច់ព្រ័ត្រខ្សែក្រវាត់ទម្ងន់ ៦៣.៥គីឡូក្រាមនេះ គេមានសង្ឃឹមឈ្នះច្រើនបើប្រៀបធៀបជាមួយកីឡាករ ឆៃ សារ៉ា ព្រោះទាំងបទពិសោធ តិចនិកប្រកួត ភាពវ៉ៃឆ្លាត ចិត្តសឿង និយាយជារួមទៅគឺគេមានតែមជាង ហើយ ឌីម៉ា ជាកីឡាករវ៉ៃក្បាច់តែម្ដង មិនចេះតែវ៉ៃអាងកម្លាំងនោះទេ។

គ្រូប្រដាល់នៅក្លឹប Prokout រូបនេះបន្តថា លោកមិនសូវជាបានមើលពីការប្រកួតរបស់ ឆៃ សារ៉ា ច្រើននោះទេ ប៉ុន្តែសំអាងលើសមត្ថភាពរបស់ ឃីម ឌីម៉ា ប្រកួតកន្លងមកកីឡាករមួយចំនួនពិបាកនឹងយកឈ្នះលើគេណាស់ កម្រិតវិជ្ជាគុនប្រហាក់ប្រហែល នាគខ្មៅបន្ទាយមានជ័យម្នាក់នេះនៅកម្ពុជាមានតែ២នាក់ទេ។

កីឡាករ ឃីម ឌីម៉ា ផ្ដួល ខុន ក្រុមថេប

កីឡាករ ឆៃ សារ៉ា ពេលឈ្នះថៃ

សេន ប៊ុនថេន កីឡាករចាស់វស្សារបស់កម្ពុជា គេធ្លាប់បង្ហាញមុខក្នុងកម្មវិធីធំៗជាច្រើននៅក្រៅប្រទេសដូចជាកម្មវិធី Thai Fight និងការប្រកួតនានានៅប្រទេសបារាំង។ សូមរំលឹកថា ការប៉ះគ្នារវាង ឃីម ឌីម៉ា និង ឆៃ សារ៉ា ត្រូវប្រកួតនៅថ្ងៃសៅរ៍ ទី២៤ មិថុនា ឆ្នាំ២០១៧ វេលាម៉ោង ៦ល្ងាចតទៅនៅសង្វៀន CNC៕

អត្ថបទ៖ នួន ស៊ីណា