ជើងហោះហើរ United Airline កើតចលាចលគ្រវែងអ្នកដំណើរចេញពីកៅអីរបួសច្រើននាក់

2017-06-22 02:25:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងហោះហើរមួយរបស់ក្រុមហ៊ុនអាកាសចរណ៍ United Airline បានជួបឧបទ្ទវហេតុគួរឲ្យរន្ធត់ជាថ្មី ដោយអ្នកដំណើរចំនួន ១៤នាក់បានរងរបួស អំឡុងពេលមានចលាចលធ្ងន់ធ្ងរ ពេលកំពុងហោះហើរពីទីក្រុង Panama City ទៅកាន់ព្រលានយន្តហោះ George Bush Intercontinental Airport ទីក្រុង Houston រដ្ឋតិចសាស់ សហរដ្ឋអាមេរិក។

មនុស្ស ១០នាក់ ត្រូវបានគេបញ្ជូនទៅកាន់មន្ទីរពេទ្យភ្លាមៗ បន្ទាប់ពីជើងហោះហើរលេខ ១០៣១ បានចុះចតកាលពីវេលាម៉ោង ១៖៣០នាទីរសៀលថ្ងៃអង្គារ។ យន្តហោះបានជួបឧបទ្ទវហេតុក្រឡាប់ចាក់ ខណៈពេលហោះហើរឆ្លងកាត់តំបន់ Cancun ដែលជួបចំហាយព្យុះស៊ីក្លូនត្រូពិក។

តាមសេចក្ដីរាយការណ៍ អ្នកដំណើរមួយចំនួនត្រូវបានយន្តហោះគ្រវែងខ្ទាតចេញពីកៅអីអង្គុយទៅត្រូវនឹងពិតានយន្ដហោះទាំងកម្រោល បណ្ដាលឲ្យរបួសក្បាល ក និងដៃជាដើម។ ពេលកើតហេតុ មានអ្នកដំណើរលើយន្តហោះសរុបទាំងអស់ចំនួន ១៦០នាក់។

ប្រភពពីអ្នកនាំពាក្យក្រុមហ៊ុនអាកាសចរណ៍ខាងលើអះអាងថា United flight 1031 ពិតជាបានកើតមានឧបទ្ទវហេតុប្រាកដមែនដោយអ្នកដំណើរ ៩នាក់ រួមនឹងបុគ្គលិកម្នាក់របួសធ្ងន់ត្រូវបញ្ជូនទៅកាន់មន្ទីរពេទ្យ។

គួររម្លឹកថា កាលពីដើមខែមេសា អ្នកដំណើរអាស៊ីជាគ្រូពេទ្យម្នាក់ ត្រូវបានបុគ្គលិកយន្តហោះអាមេរិក United Airlines វាយហូរឈាមពេញមុខ រួចទាញចេញពីកៅអីអង្គុយរបស់ខ្លួន ដោយសារក្រុមហ៊ុនទទួលកក់សំបុត្រលើសចំនួនកំណត់នៅអាកាសយានដ្ឋាន O'Hare ទីក្រុងឈីហ្កាហ្គូ បង្កឲ្យផ្ទុះកំហឹងពីមនុស្សជាច្រើនជុំវិញពិភពលោក៕