ចង់បានផ្ទះតម្លៃមធ្យម និងទាប គួរទិញនៅតំបន់ណា?

2017-06-23 02:42:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ការទិញផ្ទះអាចនិយាយបានថា មិនមែនជារឿងងាយស្រួលឡើយសម្រាប់អ្នកមានប្រាក់ចំណូលមធ្យម ហេតុនេះមុននឹងសម្រេចចិត្តទិញ លោកអ្នកចាំបាច់ត្រូវពិចារណាឲ្យល្អិតល្អន់ និងមានការពិភាក្សាជាមួយអ្នកជំនាញ ដើម្បីទទួលព័ត៌មានសមស្របផងដែរ។

ទន្ទឹមគ្នានេះ ការទិញផ្ទះក្នុងតម្លៃមធ្យម និងទាបហើយមានទីតាំងល្អ គឺពិបាករកណាស់ ជាពិសេស គឺគុណភាពនៃទីតាំងតែម្ដង។ នេះបើតាមប្រសាសន៍អ្នកជំនាញក្នុងវិស័យអចលនទ្រព្យ បានអះអាងប្រាប់ Sabay។

លោក សន សៀប ប្រធានក្រុមហ៊ុន Key Real Estate និងជាអនុប្រធានសមាគមអ្នកវាយតម្លៃអចលនវត្ថុកម្ពុជា បានថ្លែងថា ចរាចរទិញលក់អចលនទ្រព្យពុះកញ្រ្ចោលខ្លាំងនាពេលសព្វថ្ងៃ ច្រើននៅជាយក្រុង ដូចជាខណ្ឌសែន ព្រែកហូរ និងតំបន់ជ្រោយចង្វារនៅហួសគម្រោងអភិវឌ្ឍន៍ OCICជាដើម ដែលនៅទីនោះតម្លៃផ្ទះមធ្យម និងទាប ចាប់ពី ៥ ម៉ឺន ដល់ ១០ម៉ឺនដុល្លារ។

លោកយល់ឃើញថា គម្រោងភាគច្រើនងាកទៅភាគជើង និងទិសខាងលិច ហើយភាគច្រើនគឺខាងសែនសុខ ហើយយើងសង្កេតឃើញទៀតថា បច្ចុប្បន្ននៅខណ្ឌសែនសុខមានប្រជាជនមានជីវភាពមធ្យមកើនឡើងគួរឲ្យកត់សម្គាល់ ខណៈដែលប្រជាជននៅតំបន់ទួលគោក ក៏បានចូលទៅនៅតំបន់នោះផងដែរ។

លោក សន សៀប ប្រធានក្រុមហ៊ុន Key Real Estate និងជាអនុប្រធានសមាគមអ្នកវាយតម្លៃអចលនវត្ថុកម្ពុជា

លោកបន្តថា លំហូរប្រជាជនច្រើនឡើងៗ ទៅកាន់តំបន់ភាគខាងជើងនេះ ដោយសារតែ គម្រោងធំៗលំដាប់អន្តរជាតិបាន និងកំពុងបង្ហាញនៅខ្លួននៅទីនោះ តួយ៉ាង គម្រោងផ្សារទំនើបអ៊ីអន២ ដែលកំពុងសាងសង់យ៉ាងសស្រាក់សស្រាំ។

លោក សន សៀប បានបញ្ជាក់ជារួម « តាមយោបល់ខ្ញុំគិតថា ជុំវិញទិញអចលនទ្រព្យក្នុងតម្លៃមធ្យម សមល្មមនឹងរស់នៅ និងធ្វើអាជីវកម្ម គួរតែមើលនៅតំបន់ដែលខ្ញុំបានរៀបរាប់ខាងលើនេះ បើមិនអ៊ីចឹងទេ ទៅខាងតំបន់ភាគខាងត្បូង ដូចជា ចំការដូង និងតាខ្មៅ។ « ម្យ៉ាងយើងមិនអាចជ្រើសរើសផ្ទះតម្លៃទាបពេក និងតំបន់ឆ្ងាយក្រុងពេកហើយគ្មានមនុស្សនៅបានឡើយ ហើយខ្ញុំគិតថា តម្លៃផ្ទះចាប់ពី ៥ ម៉ឺន ដល់ ១០ម៉ឺនដុល្លារ គឺសមរម្យ សម្រាប់អ្នកមានចំណូលមធ្យម»៕