គ្រូនិយាយពាក្យអង់គ្លេសមិនច្បាស់ ធ្វើឲ្យក្មេងស្រីម្នាក់លោតពីលើស្ពានស្លាប់

2017-06-27 03:33:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងស្រីជនជាតិហូឡង់ Vera Mol លោតពីលើស្ពានស្លាប់ដោយមិនបានចងខ្សែ
គ្រូណែនាំជនជាតិអេស្ប៉ាញនិយាយភាសាអង់គ្លេសមិនច្បាស់
គ្រូប្រើពាក្យ No Jump តែក្មេងស្រីឮតែ Now Jump

ក្មេងស្រីអាយុ ១៧ឆ្នាំម្នាក់ ជាជនជាតិហូឡង់ បានលោតចុះពីលើស្ពានស្លាប់ បន្ទាប់ពីទម្លាក់ខ្លួនដោយមិនទាន់បានចងខ្សែសុវត្ថិភាព ព្រោះតែស្ដាប់គ្រូណែនាំជនជាតិអេស្ប៉ាញនិយាយភាសាអង់គ្លេសមិនច្បាស់។

កញ្ញា Vera Mol អាយុ ១៧ឆ្នាំ បានស្ដាប់គ្រូណែនាំនិយាយពាក្យថា «No Jump» មានន័យថា «កុំលោត» តែនាងឮពាក្យថា «Now Jump» មានន័យថា «លោតចុះឥឡូវ» ការស្ដាប់ច្រឡំនេះ ដោយសារការបញ្ចេញសំឡេងភាសាអង់គ្លេសរបស់គ្រូណែនាំខាងលើមិនបានល្អ។

មុនពេលកើតហេតុ គ្រូខាងលើបានរៀបចំខ្សែពួរលើខ្លួនក្មេងស្រីរងគ្រោះរួចហើយ តែមិនទាន់ចងត្រឹមត្រូវ ទើបធ្វើឲ្យនាងលោតដើម្បីកម្សាន្តនេះ ប្រែជាសោកនាដកម្មតែម្ដង។ តាមសេចក្ដីរាយការណ៍ គ្រូណែនាំដដែលរកនិយាយឃ្លាថា Don't Jump តែជៀសវាងខ្លាចនាងច្រឡំក៏និយាយថា No Jump បែរធ្វើឲ្យនាងច្រឡំទាល់តែបាន។

បន្ទាប់ពីកើតឧបទ្ទវហេតុ បុរសជាគ្រូត្រូវបានគេកោះហៅទៅសាកសួរនៅមុខតុលាការ ដោយចោទប្រកាន់ករណីធ្វើឲ្យក្មេងស្រីជនជាតិហូឡង់ស្លាប់។ ចៅក្រមទីក្រុង Cantabria ភាគខាងជើងប្រទេសអេស្ប៉ាញ បានអះអាងថា ការបញ្ចេញសូរសៀងភាសាអង់គ្លេសរបស់គ្រូអេស្ប៉ាញរូបនេះ ពិតជាមិនល្អឡើយ។

ចំណែកក្រុមហ៊ុន Flowtrack ផ្ដល់សេវាលោតបែប Bungee ដែលជួលគ្រូខាងលើអះអាងថា វាជាឧបទ្ទវហេតុ។ ពេលនេះអាជ្ញាធរកំពុងស៊ើបអង្កេតករណីនេះហើយ៕