អញ្ចឹងសោះ បានជាអាមេរិកឲ្យ GPS ប្រើជាសាធារណៈ

2017-06-27 06:58:52
ចំនួនមតិ 0 | ចំនួនចែករំលែក 0

ចន្លោះមិនឃើញ

GPS ដែលមានពាក្យពេញថា Global Positioning System មានន័យថាប្រព័ន្ធកំណត់ទីតាំងសកល បង្កើតឡើងដោយសហរដ្ឋអាមេរិក សម្រាប់បម្រើក្នុងវិស័យយោធា ជាពិសេសទ័ពអាកាសរបស់ប្រទេសមហាអំណាចនេះ។

ដំណើរការដំបូងក្នុងឆ្នាំ ១៩៧៣ បច្ចេកវិទ្យានេះប្រតិបត្តិការជាទម្រង់ Satellite-based (ប្រើផ្កាយរណបច្រើនកំណត់ទីតាំង) ហើយមានប្រើប្រាស់សម្រាប់តែយោធាសហរដ្ឋអាមេរិកតែប៉ុណ្ណោះ នឹងមិនមានប្រើជាសាធារណៈព្រោះហេតុផលសុវត្ថិភាព ការគ្រប់គ្រង ឬការប្រើមកវាយបកលើសហរដ្ឋអាមេរិក។ GPS ក៏ត្រូវបានអាមេរិកបំពាក់លើគ្រាប់មីស៊ីល ដើម្បីឲ្យសមត្ថភាព និងកម្រិតវាយប្រហាររបស់វាចំគោលដៅ។

លុះដល់ឆ្នាំ ១៩៨៣ យន្តហោះចម្បាំងរបស់រុស្សីប្រភេទ SU-15 បានបាញ់ទម្លាក់យន្តហោះដឹកអ្នកដំណើររបស់ប្រទេសកូរ៉េខាងត្បូង ដែលបានហោះចូលដែនអាកាសហាមឃាត់របស់ខ្លួនដោយអចេតនា។ ក្រោយឧបទ្ទវហេតុនោះ នឹងយល់ឃើញថា GPS អាចការពារមិនឲ្យឧបទ្ទវដូចនេះទៀត ប្រធានាធិបតីទី ៤០ សហរដ្ឋអាមេរិក លោក Ronald Reagan បានអនុម័តឲ្យមានការប្រើប្រាស់បច្ចេកវិទ្យា GPS ជាសាធារណៈនៅថ្ងៃទី ១៦ ខែកញ្ញា ឆ្នាំ ១៩៨៣។ ប៉ុន្តែ GPS ដែលដាក់ឲ្យប្រើជាសាធារណៈនោះ គឺអាចចាប់បានត្រឹមរយៈចម្ងាយ ១០០ ម៉ែត្រប៉ុណ្ណោះ។

ក្នុងឆ្នាំ ២០០០ ប្រធានាធិបតី ទី ៤២ របស់សហរដ្ឋអាមេរិក លោក Bill Clinton ក៏សម្រេចដាក់ឲ្យបច្ចេកវិទ្យានេះប្រើប្រាស់ជាសាធារណៈកាន់តែទូលាយជាងមុន ដែលការសម្រេចនេះ គឺធ្វើឲ្យបច្ចេកវិទ្យាទំនើបៗជាច្រើនកើតមាន រួមទាំងស្មាតហ្វូនសព្វថ្ងៃនេះ។ បច្ចេកវិទ្យា GPS របស់យោធាសហរដ្ឋអាមេរិកធ្លាប់គាំងរលកសញ្ញា (Signal) ក្នុងទីតាំងមួយចំនួនដូចជានៅ Iraq ដែលមានការរំខានពីរលកសញ្ញាផ្កាយរណប។

សហរដ្ឋអាមេរិកអាចបិទដំណើរការប្រព័ន្ធនេះពេលណាក៏បាន ដែលដូចនេះហើយទើបបច្ចុប្បន្នប្រទេសជាច្រើនជាពិសេសមហាអំណាចនានាបានចាប់ផ្ដើមបង្កើតប្រព័ន្ធ GPS ផ្ទាល់ខ្លួនដើម្បីប្រកួតប្រជែង ហើយបច្ចេកវិទ្យា GPS ដែលដាក់ឲ្យប្រើជាសាធារណៈគឺមិនមានសមត្ថភាពចាប់ទីតាំងបានច្បាស់ដូចប្រើក្នុងវិស័យយោធាទេ៕