ស្រាយចម្ងល់រឿងហុងកុងចាយទុន ២ លានដុល្លារថតនៅកម្ពុជា តែស្លៀកឈុតតម្រួតថៃ
- 2017-06-29 07:56:53
- ចំនួនមតិ 0 | ចំនួនចែករំលែក 0
ស្រាយចម្ងល់រឿងហុងកុងចាយទុន ២ លានដុល្លារថតនៅកម្ពុជា តែស្លៀកឈុតតម្រួតថៃ
ចន្លោះមិនឃើញ
បន្ទាប់ពីមានការផ្សព្វផ្សាយសកម្មភាពថតរឿង "The Code of Siem” ដែលបានថតនៅក្រុងភ្នំពេញរួចមក អ្នកលេងបណ្ដាញសង្គមមួយចំនួនប្រតិកម្មទៅនឹងសម្លៀកបំពាក់របស់តួសម្តែង ដែលថតក្នុងស្រុកខ្មែរ តែបែរជាស្លៀកឯកសណ្ឋានតំរួតថៃទៅវិញ។
អ្នកលេងបណ្ដាញសង្គម facebook ម្នាក់ បានបញ្ចេញយោបល់ថា មិនសមត្រង់លេងនៅខ្មែរ តែបែរជាដាក់ប៉ូលីសថៃទៅវិញម៉េចត្រូវ។
ដោយឡែកម្នាក់ទៀតក៏បានសរសេរថា លោកមើលរឿងច្រើនមកហើយ ការដែលគេ(ប៉ូលីស) ឆ្លងដែនទៅប្រទេសផ្សេង គឺត្រូវពឹងលើប៉ូលីសនៅប្រទេសនោះចាត់វិធានការ។
ក្រៅពីប្រតិកម្មខាងលើក៏នៅមានអ្នកលេងបណ្ដាញសង្គមនេះ ផ្សេងៗទៀតប្រតិកម្មប្រហាក់ប្រហែលគ្នាដែរ។ ចំណែកមួយចំនួនទៀត Comment ថាមានមោទនភាពដែលបានមកថតនៅស្រុកខ្មែរ។
ឆ្លើយតបទៅនឹងការប្រតិកម្មនេះ ប្រធានស្ដីទីនៃនាយកដ្ឋានភាពយន្ត លោក ប៉ុក បូរក្ស បានប្រាប់ឱ្យ Sabay ដឹងថា រឿង "The Code of Siem”នេះគឺជារឿងភាគរបស់ផលិតកម្មចិនសៀងហៃ។ រឿងនេះចំណាយទុនប្រមាណ២លានដុល្លារសហរដ្ឋអាមេរិកមកកម្ពុជា ដោយគ្រាន់តែមកថត ២ទៅ៣ឈុតតែប៉ុណ្ណោះ នៅក្នុងស្រុកខ្មែរ។ «រឿងនេះតាមពិតទៅសាច់រឿងទាំងមូលមិនជាប់ពាក់ព័ន្ធនឹងស្រុកខ្មែរឡើយ តែក្រសួងវប្បធម៌និងវិចិត្រសិល្បៈ ទំនាក់ទំនងផលិតកម្មចិនមកថតនៅក្នុងប្រទេសកម្ពុជា ដើម្បីទាញប្រយោជន៍ចូលជាតិតែប៉ុណ្ណោះ»។ នេះជាការលើកឡើងរបស់របស់លោក ប៉ុក បូរក្ស។ លោកបន្ថែមថា សាច់រឿងទាំងមូលគឺកើតឡើងក្នុងប្រទេសចិន និងថៃទេ តែ ផលិតកម្មគ្រាន់តែខ្ចីទីតាំងប្រទេសកម្ពុជាខ្លះជំនួសថៃតែប៉ុណ្ណោះ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
