មិនធម្មតា តារាខ្មែរកាត់ថៃម្នាក់នេះ ច្រៀងបានដល់១០ភាសា

2017-07-03 01:55:05
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងតិច ១០ភាសា លោក តាំង ហ័រណាម ហៅ ប៉ាវផ្លយ ម្ចាស់បទ «អតីត» តារាចម្រៀងកូនកាត់ខ្មែរ-ថៃ អាចច្រៀងបាន នេះបើតាមការបង្ហើបពីសាមីខ្លួនប្រាប់។

លោកបានរៀបរាប់ឲ្យដឹងថា ភាសាទាំងនោះ មាន ភាសាខ្មែរ ចិន ថៃ អង់គ្លេស ជប៉ុន ហ្វីលីពីន ឥណ្ឌូណេស៊ី អេស្ប៉ាញ ឡាវ វៀតណាម ជាដើម។ ខ្មែរ ចិន ថៃ និង អង់គ្លេស លោកអាចច្រៀងបានច្រើនជាងគេ។ «ខ្ញុំច្រៀងបទដែលណាល្បី ច្រៀងបានមិនច្រើនបទទេ គឺ១ភាសា បាន២ទៅ៣បទហ្នឹង»។ ប៉ាវផ្លយ ថ្លែង។

វិធីដែលធ្វើឲ្យតារាចម្រៀងរូបនេះអាចច្រៀងច្រើនភាសាបែបនេះលោកបានបង្ហើបឲ្យដឹងថា គឺយកបទចម្រៀងដែលល្បីនៃប្រទេសទាំងនោះ មកសរសេរជាភាសាអង់គ្លេស ឲ្យត្រូវនឹងប៉ារូបទចម្រៀងរបស់គេ ហើយច្រៀងតាម។ បែបនេះក្ដីលោកថា ការមកច្រៀងតាមនេះ មិនត្រូវសូរសៀងទាំងអស់ឡើយ ព្រោះលោកក៏បានមិនបានយល់ភាសាទាំងអស់នោះដែរ។

ជាការពិតតារាចម្រៀងវ័យ៣៧ឆ្នាំខាងលើ រៀនបានច្រើននោះទេ ពោលគឺត្រឹមតែថ្នាក់ទី៨ប៉ុណ្ណោះ ប៉ុន្តែដោយមានទេពកោសល្យខាងសិល្បៈ និងការព្យាយាម ទើបធ្វើលោកអាចមានសមត្ថភាពច្រៀងបានច្រើនភាសាបែបនេះ។

លោក តាំង ហ័រណាម ហៅ ប៉ាវផ្លយ បានបន្តឲ្យដឹងថា ខ្លួនបានប្រលូកអាជីពជាតារាចម្រៀងជាច្រើនឆ្នាំមកហើយ ទាំងនៅប្រទេសកម្ពុជា និងថៃ ។ ជាមួយគ្នានោះលោកក៏ធ្លាប់សម្ដែង MV ជាច្រើនផលិតកម្មផងដែរ ដូចជា ផលិតកម្មរស្មីហង្សមាស សាន់ដេ កាឡាក់ស៊ីជាដើម។ ប៉ាវផ្លយ ធ្លាប់ច្រៀងនៅតាមភោជនីយដ្ឋានជាច្រើននៅក្នុងរាជធានីភ្នំពេញ មានដូចជា មេកុងឡញ M2 បូសក្លឹប អ័រគីដេ និងភូមិគ្រឹះឆ្ងាញ់ ជាដើម។

លោកទទួលស្គាល់ថា ទោះបីជាបានប្រលូកសិល្បៈច្រើនឆ្នាំបែបនេះក្ដី ប៉ុន្តែប្រជាប្រិយភាពមិនសូវទស្សនិកជនស្គាល់ឡើយ ពោលគឺទើបតែស្គាល់ខ្លាំងតាមរយៈបទ «អតីត» ដែលលោកបានច្រៀងជាមួយលោក Shutter ប៉ុណ្ណោះ។ ឆាប់ៗខាងមុខនេះ លោកគ្រោងនឹងចេញចម្រៀង១បទទៀត ច្រៀងរួមគ្នាជាមួយដៃគូដដែល ហើយតាមរយៈស្នាដៃថ្មីនេះ ប្រជាប្រិយភាពនឹងធ្វើឲ្យមហាជនកាន់តែស្គាល់លោកកាន់ច្បាស់ជាក់ជាមិនខាន៕