អ៊ិត សំហេង៖ ចាប់ពីថ្ងៃនេះទៅ យុវជនទូទាំងប្រទេសលែងពិបាករកការងារទៀតហើយ

2017-07-03 04:26:26
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលកំពុងធ្វើកំណែទម្រង់ថ្មី ក្នុងការតភ្ជាប់ប្រព័ន្ធអប់រំចំណេះដឹងទូទៅ ប្រព័ន្ធបណ្ដុះបណ្ដាលជំនាញវិជ្ជាជីវៈ និងប្រព័ន្ធការងារជាបណ្ដាញតែមួយ
ប្រព័ន្ធនេះនឹងជួយដល់យុវជន ក៏ដូចជាពលរដ្ឋទាំងអស់ ងាយស្រួលក្នុងការកំណត់អំពីគោលដៅរបស់ខ្លួន ងាយបត់បែន អាចកំណត់ផ្លូវសិក្សាច្បាស់លាស់

- បន្ទាប់ពីមានសមត្ថភាពទាំងចំណេះដឹងទូទៅ ទាំងជំនាញវិជ្ជាជីវៈហើយ គឺយុវជននឹងមានការងារធ្វើសមស្របតាមសមត្ថភាព និងអាចរកប្រាក់ចំណូលបានច្រើនទៀតផង

ថ្លែងនៅក្នុងវេទិកាជាតិស្ដីពីការអប់រំបណ្ដុះបណ្ដាលបច្ចេកទេស និងវិជ្ជាជីវៈ កាលពីព្រឹកមិញនេះ ឯកឧត្ដម អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា រដ្ឋាភិបាលកំពុងធ្វើកំណែទម្រង់ថ្មី ក្នុងការតភ្ជាប់ប្រព័ន្ធអប់រំចំណេះដឹងទូទៅ ប្រព័ន្ធបណ្ដុះបណ្ដាលជំនាញវិជ្ជាជីវៈ និងប្រព័ន្ធការងារជាបណ្ដាញតែមួយ ដើម្បីឆ្លើយតបនឹងសំណួរដែលតែងលើកឡើងថា គួររៀនអ្វី រៀនចប់មានការងារអ្វី? ដូច្នេះចាប់ពីថ្ងៃនេះតទៅយុវជនទូទាំងប្រទេសកម្ពុជា លែងពិបាកទៀតហើយ។

រដ្ឋមន្ត្រីក្រសួងការងារ បានបន្តទៀតថា ប្រព័ន្ធនេះនឹងជួយដល់យុវជន ក៏ដូចជាពលរដ្ឋទាំងអស់ ងាយស្រួលក្នុងការកំណត់អំពីគោលដៅរបស់ខ្លួន ងាយបត់បែន អាចកំណត់ផ្លូវសិក្សាច្បាស់លាស់ ថាតើខ្លួនមានសមត្ថភាពផ្នែកអ្វី ពូកែអ្វី? ដូច្នេះប្រព័ន្ធថ្មីនឹងជួយស្វែងរកដំណោះស្រាយដល់យុវជន តាមរយៈការជួយជ្រោមជ្រែង និងដឹកនាំឆ្ពោះទៅរកអនាគត ដែលយុវជនប្រាថ្នាចង់ទៅដល់។ ឯកឧត្ដមលើកឡើងថា បន្ទាប់ពីមានសមត្ថភាពទាំងចំណេះដឹងទូទៅ ទាំងជំនាញវិជ្ជាជីវៈហើយ គឺយុវជននឹងមានការងារធ្វើសមស្របតាមសមត្ថភាព និងអាចរកប្រាក់ចំណូលបានច្រើនទៀតផង។

ឯកឧត្ដម អ៊ិត សំហេង បានបញ្ជាក់ថា ទៅថ្ងៃខាងមុខគ្រឹះស្ថានបណ្ដុះបណ្ដាលវិជ្ជាជីវៈទាំងអស់នឹងត្រូវចុះបញ្ជី ហើយត្រូវស្ថិតនៅក្រោមការគ្រប់គ្រង របស់គណៈកម្មការជាតិបណ្ដុះបណ្ដាលបច្ចេកទេស និងវិជ្ជាជីវៈ ដើម្បីឱ្យកំណែទម្រង់មួយនេះអាចដំណើរការ។ ក្រៅពីនោះរដ្ឋាភិបាលនឹងសហការជាមួយវិស័យឯកជនទូទាំងប្រទេស ក៏ដូចជាក្រសួងនានា ដើម្បីធ្វើកំណែទម្រង់មួយនេះឱ្យទទួលបានជោគជ័យ។

ឯកឧត្ដម បានបន្ថែមទៀតថា បច្ចុប្បន្ននេះរដ្ឋាភិបាលកំពុងរៀបចំ ប្រព័ន្ធធ្វើតេសសមត្ថភាព ដោយមានការសហការគ្នារវាងក្រសួងអប់រំយុវជន និងកីឡា វិស័យឯកជន និងស្ថាប័នពាក់ព័ន្ធទាំងអស់ ដើម្បីជួយរកការងារឱ្យយុវជនកម្ពុជា៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ